ក្រុមគ្រូពេទ្យអាមេរិកផ្តល់បទពិសោធន៍ពីការថែទាំសុខភាព និង ជំនាញឯកទេសវះកាត់

ក្រុមគ្រូពេទ្យអាមេរិកផ្តល់បទពិសោធន៍ពីការថែទាំសុខភាព និង ជំនាញឯកទេសព្យាបាលជំងឺវះកាត់ដោយឆ្លុះឡាប៉ារ៉ូស្តូបពិច (Laparoscopic) វះកាត់ពោះវៀន ឬសដូងបាត បូសអន្ទង់ ដុំពកក វះកាត់កែលំអ ពិការដៃ មុខមាត់ ដល់គ្រូពេទ្យកម្ពុជា។

ថ្លែងក្នុងឱកាសចុះពិនិត្យព្យាបាលជំងឺវះកាត់ដល់ពលរដ្ឋកម្ពុជា នៅថ្ងៃទី២៣ ខែមករានេះ លោកសាស្ត្រាចារ្យ Elliott Brender ស្ថាបនិករបស់អង្គការ SFC(Surgeons for Cambodia) ប្រចាំនៅសហរដ្ឋអាម៉េរិក មានប្រសាសន៍ថា សម្រាប់ឆ្នាំ២០២៣នេះ គឺជាបេសកកម្មលើកទី១១ ដោយចាប់ផ្តើមតាំងពីឆ្នាំ២០០៨ ដែលក្រុមគ្រូពេទ្យសហរដ្ឋអាមេរិក បានចុះមកពិនិត្យ ពិគ្រោះ ព្យាបាលជំងឺជូនប្រជាពលរដ្ឋនៅកម្ពុជាដោយឥតគិតថ្លៃ ហើយបេសកកម្មលើកទី១១នេះ បានចុះទៅពិនិត្យ ពិគ្រោះព្យាបាលជំងឺ ទៅកាន់រាជធានី-ខេត្តចំនួន៤ គឺទី១. វះកាត់ ព្យាបាលនៅខេត្តសៀមរាប, ទី២. ខេត្តបាត់ដំបង, ទី៣. ខេត្តព្រះសីហនុ និងទី៤. មន្ទីរពេទ្យមិត្តភាពខ្មែរ-សូវៀត ដើម្បីផ្លាស់ប្តូរបទពិសោធន៍ ថែទាំសុខភាព និងបណ្តុះបណ្តាលគ្រូពេទ្យកម្ពុជា ឱ្យមានជំនាញឯកទេស ព្យាបាលជំងឺ វះកាត់ដោយឆ្លុះឡាប៉ារ៉ូស្តូបពិច (Laparoscopic) វះកាត់ពោះវៀន ឬសដូងបាត បូសអន្ទង់ ដុំពកក វះកាត់កែលំអ ពិការដៃ មុខមាត់។

លោកសាស្ត្រាចារ្យ ងី ម៉េង ប្រធានមន្ទីរពេទ្យមិត្តភាពខ្មែរ-សូវៀត មានប្រសាសន៍ថា ក្រុមគ្រូពេទ្យឯកទេស ​នៃប្រទេសទាំងពីរ ធ្វើការពិនិត្យ-ពិគ្រោះ និងព្យាបាលជំងឺ វះកាត់ដោយឆ្លុះឡាប៉ារ៉ូស្តូបពិច (Laparoscopic) វះកាត់ពោះវៀន ឬសដូងបាត បូសអន្ទង់ ដុំពកក វះកាត់កែលំអ ពិការដៃ មុខមាត់ ចាប់ពីថ្ងៃទី២១ ដល់ថ្ងៃទី២៥ ខែមករា ឆ្នាំ២០២៣​ ក៏ដូចជាការបណ្តុះបណ្តាលដល់ក្រុមគ្រូពេទ្យ និងចែករំលែកបទពិសោធន៍គ្នា​ទៅវិញទៅមក៕

អត្ថបទ៖ សំអឿន