អង្គការភ្លែនអន្តរជាតិកម្ពុជា និងអង្គការដៃគូបន្តគម្រោងសាលារៀនសុវត្ថិភាពនៅកម្ពុជា

អង្គការភ្លែនអន្តរជាតិកម្ពុជា និងអង្គការមូលនិធិសិទ្ធិកុមារដែលជាដៃគូរបស់ខ្លួន បានរៀបចំពិធីសម្ពោធ «គម្រោងលើកកម្ពស់គំនិតផ្តួចផ្តើមសាលារៀនសុវត្ថិភាព» គាំទ្រដោយមូលនិធិព្រូដុនស៍នៅមជ្ឈមណ្ឌលគរុកោសល្យខេត្តសៀមរាប កាលពីថ្ងៃទី២៧ ខែមករា​ ឆ្នាំ២០២៣កន្លងទៅ។

គម្រោងសាលារៀនសុវត្ថិភាព បានធ្វើកិច្ចសហប្រតិបត្តិការតាំងពីឆ្នាំ២០១៦មក ក្នុងគោលបំណង ចង់ឃេីញកុមារនៅក្នុងសហគមន៍ដែលមានហានិភ័យបំផុតក្នុងប្រទេសកម្ពុជា ឲ្យមានភាពធន់នឹងគ្រោះមហន្តរាយ និងមានបរិយាកាសសិក្សាប្រកបដោយសុវត្ថិភាព តាមរយៈការបង្កើនការគាំទ្រពីក្រសួងពាក់ព័ន្ធនានា។

នាយិកាប្រចាំប្រទេសនៃអង្គការភ្លែនអន្តរជាតិកម្ពុជា លោកស្រី គ្វីននេត វ៉ង បានបញ្ជាក់ថា ការសម្ពោធនេះគឺជាជាដំណាក់កាលទី៣ នៃគម្រោងសាលារៀនសុវត្ថិភាព​ ដោយមានការគាំទ្រពី មូលនិធិព្រូដិនស៍ និងអង្គការភ្លែនអន្តរជាតិហុងកុង។ ដំណាក់កាលទី៣នេះត្រូវបានបន្ត ផ្អែកតាមលទ្ធផលនៃដំណាក់កាលទី១ និងទី២ ដែលបានអនុវត្តក្នុងសាលារៀនគោលដៅ ចំនួន៦០ នៅខេត្តស្ទឹងត្រែង និងពង្រីកទៅសាលារៀនគោលដៅថ្មី ចំនួន៣៦ទៀត ក្នុងខេត្ត សៀមរាប និង រតនគិរី។

លោកស្រី គ្វីននេត វ៉ង មានប្រសានស៍ថា «គម្រោងសាលារៀនសុវត្ថិភាពនេះ នឹងផ្តោតលើការពង្រឹងនិរន្តរភាពនៃកម្មវិធីសាលារៀនសុវត្ថិភាពនៅក្នុងសាលារៀនគោលដៅចំនួន៩៦ តាមរយៈការបង្កើនភាពជាម្ចាស់ និងការគាំទ្រពីរដ្ឋាភិបាល ជាពិសេសមន្ទីរអប់រំ យុវជន និងកីឡាខេត្ត ការិយាល័យអប់រំ យុវជន និងកីឡាស្រុក និងសហគមន៍មូលដ្ឋាន»។ លោកស្រីសង្ឃឹមថា គម្រោងនេះនឹងជួយឱ្យកុមារសិក្សាប្រកបដោយសុវត្ថិភាព គ្មានការភ័យខ្លាចផ្សេងៗផងដែរ។

អង្គការភ្លែនអន្តរជាតិកម្ពុជា នឹងជំរុញ និងពង្រឹង ការពង្រីកគំនិតផ្តួចផ្តើមសាលារៀនសុវត្ថិភាពនេះ    ទូទាំងប្រទេសដើម្បីសម្រប និងដាក់ចេញនូវគោលការណ៍ណែនាំសាលារៀនសុវត្ថិភាព ស្របតាមក្របខណ្ឌសាលារៀនសុវត្ថិភាពកម្ពុជាឆ្នាំ ២០២២ ដល់ ២០៣០។ ក្នុងនោះក៏មានដាក់បញ្ចូលនូវ ​ទស្សនៈទានបម្រែបម្រួលអកាសធាតុ ទៅក្នុងសៀវភៅណែនាំសម្រាប់គ្រូបង្រៀនសម្រាប់សាលាបឋមសិក្សាស្តីពី ការបន្ស៊ាំខ្លូននឹងការប្រែប្រួលអាកាសធាតុ និងការកាត់បន្ថយគ្រោះភ័យនៃមហន្តរាយថែមទៀត។

ចំណែក លោក លី សាលីន ប្រធានស្តីទីផ្នែកធនធានមនុស្ស នៃក្រុមហ៊ុនព្រូដិនស៍កម្ពុជា បានលើកឡើងថា ការដាក់បញ្ចូលនូវទស្សនៈទានប​ម្រែបម្រួលអាកាសធាតុក្នុងកម្រោងនេះ ពិតជាសំខាន់ខ្លាំងណាស់ ហើយក៏ជាការប្តេជ្ញាចិត្តរបស់ក្រុមហ៊ុនលើគម្រោងនេះផងដែរ។ លោកជឿជាក់ថា ការលើកកម្ពស់ការយល់ដឹងក្នុងចំណោមមនុស្សជំនាន់ក្រោយ គឺជាជំហានដ៏សំខាន់មួយក្នុងការដោះស្រាយបញ្ហានេះជាប្រព័ន្ធ។

សូមជម្រាបថា កិច្ចសហការគម្រោងសាលារៀនសុវត្ថិភាព បានចាប់ផ្តើមពីខែកក្កដា ឆ្នាំ២០១៦ ដល់ខែមិថុនា ឆ្នាំ២០១៩ (ដំណាក់កាលទី ១) ហើយដំណាក់កាលទី ២ ចាប់ពីខែកញ្ញា ឆ្នាំ ២០១៩ ដល់ខែសីហា ឆ្នាំ២០២២។ ដំណាក់កាលទី៣នេះ បន្តពីខែកញ្ញា ឆ្នាំ២០២២ ដល់ខែសីហា ឆ្នាំ២០២៥ ។

ក្នុងនោះក៏មានការបណ្តុះបណ្តាល និងផ្តល់ជំនួយបច្ចេកទេសដល់អ្នកកាន់កាតព្វកិច្ចអប់រំថ្នាក់ក្រោមជាតិ ដូចជានាយកសាលា គ្រូបង្រៀន សមាជិកគណៈកម្មាធិការគាំទ្រសាលារៀន ក្រុមប្រឹក្សាឃុំ មន្ត្រីរាជការនៃមន្ទីរអប់រំ យុវជននិងកីឡាខេត្ត និងមន្ត្រីរាជការខេត្ត ចំនួន ២៧៦នាក់ (ដំណាក់កាលទី ១) ។ ចំណែកចំនួន ១៣៦៩នាក់ (ដំណាក់កាលទី២) ដើម្បីធានាថាសិស្សានុសិស្សស្ថិតក្នុងបរិយាកាសសិក្សាប្រកបដោយសុវត្ថិភាព៕