ព័ត៌មានជាតិ

លោក ឡាំ សុភ័ក្រ ៖ ក្រោយជួសជុលប្រាសាទតុបខាងលិចរួច នឹងជួសជុលខឿនវិហារខាងមុខប្រាសាទបន្តទៀត

បានផុស

៣ years មុន

នៅ

ថ្ងៃព្រហស្បតិ៍ ៩ កុម្ភៈ ២០២៣

ដោយ

លោក ឡាំ សុភ័ក្រ អ្នកសម្របសម្រួលគម្រោងជួសជុលរបស់វិទ្យាស្ថានជាតិណារ៉ា បញ្ជាក់ថា ក្រោយពីជួសជុលប្រាង្គកណ្ដាល នៃប្រាសាទតុបខាងលិចនេះរួចរាល់ នឹងធ្វើការជួសជុលខឿនវិហារខាងមុខប្រាសាទជាបន្តទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមផេកផ្លូវការរបស់ក្រសួងវប្បធម៌ និងវិចិត្រសិល្បៈ បានប្រកាសនៅថ្ងៃទី ៩ ខែកុម្ភៈ ឆ្នាំ ២០២៣ នេះ ឲ្យដឹងថា អាជ្ញាធរជាតិអប្សរា គ្រោងបញ្ចប់ការងារជួសជុលប្រាសាទតុបខាងលិច នាពេលដ៏ខ្លីខាងមុខ។

ក្រសួងវប្បធម៌ និងវិចិត្រសិល្បៈ បន្តថា ក្រុមអ្នកបច្ចេកទេសអាជ្ញាធរជាតិអប្សរា សហការជាមួយវិទ្យាស្ថានជាតិណារ៉ាប្រទេសជប៉ុន កំពុងជំរុញការងារជួសជុលប្រាង្គកណ្ដាល នៃប្រាសាទតុបខាងលិច ឲ្យរួចរាល់ក្នុងអំឡុងពេល ៤ ឬ ៥ ខែ ខាងមុខ។

ការជួសជុលប្រាសាទដែលសាងឡើងក្នុងសតវត្សទី ១០ មួយនេះ មានការលំបាកយ៉ាងខ្លាំង និងប្រើពេលវេលាយូរ ដោយថ្មប្រាសាទមួយចំនួនធំ ត្រូវបាត់បង់ និងខូចគុណភាព។ រហូតមកដល់ពេលនេះ ការងារជួសជុលសម្រេចបានជិត ៩០ ភាគរយហើយ។

ដោយឡែកកិច្ចការនៅសេសសល់ គឺរៀបផ្គុំហោជាងទី ២ ឡើងវិញ ដែលជាផ្នែកចុងក្រោយ នៃការងារ គ្រោងនឹងបញ្ចប់នាពេលដ៏ខ្លីខាងមុខ តាមដែលអាចធ្វើបាន។

បើតាមការបញ្ជាក់របស់លោក ឡាំ សុភ័ក្រ អ្នកសម្របសម្រួលគម្រោងជួសជុលរបស់វិទ្យាស្ថានជាតិណារ៉ា បានឲ្យដឹងថា «បន្ទាប់ពីការជួសជុលប្រាង្គកណ្ដាលនេះរួចរាល់ យើងនឹងធ្វើការជួសជុល ខឿនវិហារខាងមុខប្រាសាទបន្តទៀត»។

សូមជម្រាបថា ប្រាសាទតុបខាងលិច ស្ថិតនៅក្នុងបរិវេណក្រុងអង្គរធំ (ទិសនិរតីប្រាសាទបាយ័ន) ដែលជាប្រាសាទបែបព្រះពុទ្ធសាសនា មានតួប្រាង្គចំនួន ៣ ឈរនៅលើខឿនតែមួយ បែរមុខទៅទិសខាងកើត។

ប្រាសាទនេះ គេយល់ថា កសាងនៅសតវត្សទី ១០ ប៉ុន្តែប្រាសាទទាំងមូលដែលឃើញក្នុងពេលសព្វថ្ងៃ គឺមានការកែបន្ថែមបន្ថយបន្តពីរូបរាងដើម ធ្វើឡើងចាប់ពីសតវត្សទី ១៣-១៧៕

អត្ថបទ ៖ ពិសី

Related Topics:ជួសជុល លោក ឡាំ សុភ័ក្រ ប្រាសាទតុបខាងលិច

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា