​កម្ពុជា-ឡាវ​ឯកភាព​ផ្លាស់ប្ដូរអ្នកទោស​ឱ្យបានមុនចូលឆ្នាំថ្មីប្រពៃណីជាតិ​

កម្ពុជា​-ឡាវបានឯកភាព​សម្រេចធ្វើការផ្លាស់ប្ដូរអ្នកទោសឱ្យបានរួចរាល់​មុនពេលចូលឆ្នាំថ្មីប្រពៃណី​ជាតិចូលមកដល់។ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា មានប្រសាសន៍នៅក្នុងសន្និសីទសារព័ត៌មានរួមរវាងសម្ដេចតេជោ ហ៊ុន សែន និងលោក សនសៃ ស៊ីផាន់ដន នាយករដ្ឋមន្ត្រីឡាវ អំឡុងពេលសម្ដេចបំពេញទស្សនកិច្ចនៅប្រទេសឡាវ។

អំឡុងពេលនោះ សម្ដេចតេជោ ហ៊ុន សែន បានថ្លែងថា កិច្ចព្រមព្រៀង​ចំនួន ៣ ដែលប្រទេសទាំងពីរបានចុះហត្ថលេខា​បង្ហាញយ៉ាងច្បាស់អំពីកិច្ចខិតខំប្រឹងប្រែង​នៃភាគីទាំងពីរក្នុងការ​ពង្រឹងមិត្តភាព​សាមគ្គីភាព​ជាមួយភាពជាដៃគូយុទ្ធសាស្ត្រគ្រប់ជ្រុងជ្រោយ​ និងយូរអង្វែង​។

​ជាមួយគ្នានោះ កម្ពុជា-ឡាវ ក៏បានឯកភាពគ្នាតភ្ជាប់​រវាងខេត្តចំប៉ាសាក់ជាមួខេត្តព្រះវិហារ​ និងខេត្តអាតាពើ ជាមួយខេត្តរតនគិរី​ដែលនេះ ជាការផ្ដល់នូវអំណោយផលសម្រាប់ទំនាក់ទំនង​រវាងប្រជាជន និងប្រជាជន​។

បើតាមសម្ដេចនាយករដ្ឋមន្ត្រីភាគីទាំងពីរក៏បានពិភាក្សាគ្នាទាក់ទិននឹងការតភ្ជាប់ផ្លូវដែក​រវាងកម្ពុជា និងឡាវជាមួយ​បណ្ដាប្រទេសដទៃទៀត។

វិស័យទេសចរណ៍​ដែលមានការតភ្ជាប់វិស័យទេសចរណ៍តាមផ្លូវគោក និងផ្លូវអាកាស ដែលអាចតភ្ជាប់បណ្ដាទីក្រុង ដែលអាចផ្ដល់ឱកាសសម្រាប់ប្រជាជនប្រទេសទាំងពីរ៕