ព័ត៌មានជាតិ
លោកស្រី ជា សិរី រំពឹងថា កម្ពុជា នឹងចូលជាសមាជិកប្រព័ន្ធទូទាត់អន្តរធនាគារចិនឆាប់ៗនេះ
តាមរយៈជំនួបទ្វេភាគីរបស់ប្រមុខរដ្ឋាភិបាលនៃប្រទេសកម្ពុជា និងចិននៅទីក្រុងប៉េកាំងនាពេលថ្មីៗនេះនឹងជួយពន្លឿននីតិវិធីដើម្បីឱ្យកម្ពុជា ចូលជាសមាជិកប្រព័ន្ធទូទាត់អន្តរធនាគារចិន (CIPS)។ នេះជាការលើកឡើងរបស់លោកស្រី ជា សិរី ឧបការីទេសាភិបាល និងជាអគ្គនាយកបច្ចេកទេស ធនាគារជាតិនៃកម្ពុជា កាលពីរសៀលថ្ងៃទី១៣ ខែកុម្ភៈ ឆ្នាំ២០២៣ ដើម្បីពន្យល់ពីលទ្ធភាពដែលកម្ពុជា អាចចូលជាសមាជិក CIPS និងអត្ថប្រយោជន៍ដែលទទួលពីភាពជាសមាជិករបស់ប្រព័ន្ធនេះ។
លោកស្រី ជា សិរី បានបង្ហាញសុទិដ្ឋិនិយមថា ដំណើរការក្នុងការចូលជាសមាជិកប្រព័ន្ធ CIPS នឹងវិវត្តជាវិជ្ជមាន ដោយសារការយល់ដឹងពីលក្ខណ្ឌជាសមាជិក CIPS និងភាពអំណោយផល ពីជំនួបទ្វេភាគីរបស់ប្រមុខរដ្ឋាភិបាលនៃប្រទេសកម្ពុជា និងចិននាពេលថ្មីៗនេះ។
លោកស្រី មានប្រសាសន៍ថា៖ «ធនាគារជាតិនៃកម្ពុជា បានសិក្សាលម្អិត ពីតម្រូវការក្នុងការចូលជាសមាជិកប្រព័ន្ធ CIPS តាំងពីប្រព័ន្ធនេះបានបង្កើតឡើងដំបូងនៅឆ្នាំ ២០១៥មក អ៊ីចឹងធនាគារជាតិបានដឹងថាតើគេត្រូវការអ្វីខ្លះ ដែលមិនមែនជារឿងថ្មីទេសម្រាប់យើង។ ទីពីរថ្នាក់ដឹកនាំរបស់ប្រទេសទាំងពីរបានជជែកគ្នា ហើយក៏បានឯកភាពគ្នាជាគោលការណ៍រួចទៅហើយ។ ការណ៍នេះសង្ឃឹមថានឹងជួយពន្លឿននីតិវិធីដើម្បីឱ្យកម្ពុជាចូលជាសមាជិក CIPS ឆាប់ៗ»។
លោកស្រី ជា សិរី បានបន្តថា ការចូលជាសមាជិក CIPS នឹងផ្តល់អត្ថប្រយោជន៍ ជាច្រើនដល់កម្ពុជាដូចជា ផ្តល់ជាជម្រើសបន្ថែមក្នុងការទូទាត់ទៅកាន់ពិភពលោកនិងតំបន់ ។ សម្រួល និងជំរុញពាណិជ្ជកម្មការវិនិយោគ និងទេសចរ ជាពិសេសពាណិជ្ជកម្មទ្វេភាគីជាមួយ ប្រទេសចិននិងប្រទេសទទួលការទូទាត់ជាប្រាក់យ៉ន់ និងសម្រួលការវិនិយោគទុនបម្រុងអន្តរជាតិ របស់កម្ពុជាជាប្រាក់យ៉ន់។
លោកស្រី ជា សិរី បានបន្តទៀតថា«មិនប្រាកដថា រាល់ប្រតិបត្តិការតាម CIPS មានតម្លៃទាបជាងប្រព័ន្ធទូទាត់ថ្នាក់អន្តរជាតិ( SWIFT)ហើយក៏មិនប្រាកដថារាល់ប្រតិបត្តិការតាម SWIFT មានតម្លៃទាបជាង CIPS ទេ។ ដូច្នេះកាលណាមានពីរជម្រើស យើងចំណេញ។ អ៊ីចឹងខាងណាចំណាយទាបជាង ខាងណាអាចឱ្យយើងចំណេញជាង យើងទូទាត់តាមខាងនោះ»។
គួរបញ្ជាក់ថា CIPS ប្រព័ន្ធទូទាត់ថ្នាក់អន្តរជាតិដូចទៅនឹងប្រព័ន្ធSWIFT ដែរ គឺផ្ដល់នូវសេវាផាត់ទាត់ និងទូទាត់សម្រាប់សមាជិកដើម្បីទូទាត់ឆ្លងដែនជាប្រាក់យ៉ន់ចិន ដែលបច្ចុប្បន្ន CIPS មានសមាជិកផ្ទាល់ចំនួន ៧៦និងសមាជិកប្រយោលចំនួន ១២៦៥គ្រឹះស្ថាន ដែលក្នុងនោះ មកពីតំបន់អាស៊ីចំនួន៩៦៥ ទ្វីបអឺរ៉ុបចំនួន១៨៥ ទ្វីបអាហ្វ្រិក៤៦ អាមេរិកខាងជើង ២៩ ទ្វីបអូសេអានី ២៣ និងអាមេរិកខាងត្បូង១៧ដែលមកពី១០៦ប្រទេស៕ សំអឿន
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១៩ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង