មានលក្ខខណ្ឌទាំង៩ចំណុច ទើបអាចឆ្លងកាត់ការចូលប្រឡងក្របខណ្ឌនគរបាលកម្ពុជា​បាន

បណ្ឌិត្យសភានគរបាលកម្ពុជា ប្រកាសប្រឡងប្រជែងជ្រើសរើសនិស្សិតអាហារូបករណ៍ ឱ្យចូលសិក្សាថ្នាក់បរិញ្ញាបត្រ វិទ្យាសាស្ត្រនគរបាល ចំនួន២០០កន្លែង សិក្សារយៈពេល៤ឆ្នាំ សម្រាប់ឆ្នាំ២០២០ដើម្បីក្លាយជានាយនគរបាលបន្តវេន ក្នុងក្របខណ្ឌមន្រ្តីនគរបាលជាតិកម្ពុជា នៃក្រសួងមហាផ្ទៃ។

យោងសេចក្ដីជូនដំណឹងរបស់បណ្ឌិត្យសភានគរបាលកម្ពុជា បានឱ្យដឹងថា ទីកន្លែងផ្ដល់ពាក្យ និងទទួលពាក្យ ធ្វើឡើងនៅបណ្ឌិត្យសភានគរបាលកម្ពុជា ស្ថិតក្នុងភូមិស្ដៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្ដាល ចាប់ពីថ្ងៃទី១៣ ដល់ថ្ងៃទី២៥ ខែមករា ឆ្នាំ២០២១ ។

សេចក្ដីជូនដំណឹង បានឱ្យដឹងទៀតថា បេក្ខជន ទាំងពីរភេទ ត្រូវមានសញ្ជាតិខ្មែរ មានសញ្ញាប័ត្រមធ្យមសិក្សាទុតិយភូមិ អាយុយ៉ាងច្រើន២៥ឆ្នាំ គិតត្រឹមថ្ងៃប្រឡង កម្ពស់បុរស១,៧០ម៉ែត្រឡើង និងមានទម្ងន់ចាប់ពី៦០គីឡូឡើង ដោយសមមាត្រនឹងកម្ពស់ ចំពោះនារី ត្រូវមានកម្ពស់១,៦០ម៉ែត្រឡើង និងមានទម្ងន់ចាប់ពី៤៨គីឡូឡើង ដោយសមមាត្រនឹងកម្ពស់(ទាំងពីរភេទ នៅលីវ)មានសុខភាពល្អ កាយសម្បទាមាំមួន ពុំធ្លាប់មានពិរុទ្ឋភាពកន្លងមក និងឆ្លងកាត់ការធ្វើតេស្តកាយសម្បទា មុននឹងផ្ដល់ពាក្យសុំប្រឡង៕