លោកស្រី ជា សិរី ជំរុញឱ្យពលរដ្ឋដាក់ប្រាក់ក្នុងធនាគារកុំទុកក្រោមខ្នើយ

លោកស្រី ជា សិរី ឧបការីទេសាភិបាល និងជាអគ្គនាយកបច្ចេកទេសធនាគារជាតិនៃកម្ពុជា បានជំរុញដល់ប្រជាពលរដ្ឋដាក់ប្រាក់ក្នុងធនាគារកុំទុកប្រាក់ក្រោមខ្នើយ ដើម្បីបង្កើតទម្លាប់ឱ្យចេះសន្សំលុយនិងធានាបាននូវសុខសុវត្តិភាពខ្ពស់។

នៅក្នុងឱកាសចូលរួមជា វាគ្មិនកិត្តិយសធ្វើបទឧទ្ទេសនាមក្រោមប្រធានបទ «សារៈសំខាន់នៃរូបិយវត្ថុ» ជូនសមណៈសិស្ស និងសាស្ត្រាចារ្យពីពុទ្ធិកសកលវិទ្យាល័យកាលពីថ្មីៗនេះ លោកស្រី ជាសិរី បានមានប្រសាសន៍ថា «បើកាលណាមានកុងក្នុងធនាគារ គឺអាចឱ្យយើងចេះសន្សំលុយហើយការសន្សំនេះមិនចាំបាច់មានប្រាក់ច្រើនទើបសន្សំបាននោះទេគឺសន្សំចាប់ពីបន្តិចៗឡើងទៅ ហើយចាប់ពីតូចទៅធំហើយការសន្សំនេះ យើងទទួលបានការប្រាក់ទៀតផងជាជាងយើងទុក​លុយ​នៅក្រោមខ្នើយ»។

លោកស្រី​បានបន្ត​ទៀត​ថា ជាងនេះទៀត ការសន្សំលុយក្នុងកុងធនាគារ ក៏មានភាពងាយស្រួលក្នុងការទូទាត់ប្រចាំថ្ងៃ និងមានសុខសុវត្តិភាពខ្ពស់ជាងមុនមិនមានភ័យខ្លាចគេឆក់ប្លន់ទៀតផង។

លោកស្រីបានពន្យល់ថា «មានអ្នកខ្លះថាពេលដាក់លុយក្នុងកុងធនាគារពេលទូរស័ព្ទបាត់លុយ ដែលនៅក្នុងកុងក៏បាត់ដែរ។ ត្រង់ចំណុចនេះមិនមែនអីចឹងទេ បើទោះបីជាទូរស័ព្ទបាត់ក៏ដោយក៏យើងអាចទៅកាន់ធនាគារឱ្យបុគ្គលិកភ្ជាប់កាបូបលុយអេឡេចត្រូនិចឡើងវិញបាន ដោយមិនមានការបាត់បង់លុយនោះទេ»។

ទន្ទឹមនឹងនេះ លោកស្រីជំរុញឱ្យប្រជាពលរដ្ឋប្រើប្រាស់ប្រាក់រៀលឱ្យបានកាន់តែច្រើនផងដែរដើម្បីជួយពង្រឹងសេដ្ឋកិច្ចនិងអធិបតេយ្យភាពជាតិកាន់តែរឹងមាំ។

សម្រាប់កម្ពុជាការប្រើប្រាស់ប្រាក់រៀលតែមួយគត់ នឹងលើកកម្ពស់ប្រសិទ្ធភាពនយោបាយរូបិយវត្ថុនិងការអភិវឌ្ឍសង្គម-សេដ្ឋកិច្ចជាតិឱ្យកាន់តែរីកចម្រើនប្រកបដោយបរិយាបន្នដូចពាក្យស្លោកមួយបានពោលថា ប្រាក់រៀលតែមួយ លើកស្ទួយទីផ្សារ ផ្លែផ្កាសេដ្ឋកិច្ច។

លោកស្រីពន្យល់ថា «ពីព្រោះនៅលើក្រដាសប្រាក់តែងតែមានរូបភាពប្រាង្គប្រាសាទ ព្រះមហាក្សត្រនិងវីរបុរសជាតិ ហើយការចាយវាយប្រាក់រៀលដល់ទីណាប្រៀបបាននឹងការបង្ហាញថា ទឹកដីកម្ពុជាទៅដល់ទីនោះ។ ដូចនេះការចាយវាយប្រាក់រៀលកាន់តែទូលំទូលាយ បានសេចក្តីថាគឺជាការពង្រីកអធិបតេយ្យភាព និងបូរណភាពទឹកដីខ្មែរឱ្យកាន់តែរឹងមាំ»។

លោកស្រីបានបញ្ជាក់ថា ការប្រើប្រាស់ប្រាក់រៀលគឺជាការរក្សាស្ថិរភាពថ្លៃ ពោលគឺការគ្រប់គ្រងការផ្គត់ផ្គង់រូបិយវត្ថុនៅលើទីផ្សារឱ្យសមស្របតាមតម្រូវការ និង​ធានាបាននូវស្ថិរភាពថ្លៃមួយដែលអំណោយផលដល់ការអភិវឌ្ឍសេដ្ឋកិច្ច ,ការប្រើប្រាស់ប្រាក់រៀល តែមួយនឹងជួយឱ្យអ្នកលក់ និងអ្នកទិញមិនចាំបាច់ចំណាយពេលវេលា និងកម្រៃក្នុងការដោះដូររូបបិយប័ណ្ណទៅវិញទៅមក ,ចរាចរណ៍ប្រាក់រៀលទូលំទូលាយនឹងសម្រួលដល់ការគ្រប់គ្រងតម្លៃប្រាក់រៀលប្រកបដោយការបត់បែននិងប្រសិទ្ធភាពខ្ពស់ ដែលនឹងសម្រួលដល់ពាណិជ្ជកម្មនិងលើកកម្ពស់ភាពប្រកួតប្រជែង នៃការនាំចេញ៕

អត្ថបទ៖ សំអឿន