ឯកឧត្តមបណ្ឌិត ហ៊ុន ម៉ាណែត៖ ភារកិច្ចរបស់គណបក្សប្រជាជនកម្ពុជា គឺការបម្រើ សង្គ្រោះ កសាង ការពារ និងអភិវឌ្ឍជាតិ

ភារកិច្ចដែលឥតកែប្រែរបស់គណបក្សប្រជាជនកម្ពុជា គឺការបម្រើ សង្គ្រោះ កសាង ការពារ និងអភិវឌ្ឍជាតិ សំដៅធ្វើយ៉ាងណាឱ្យប្រជាជនរស់នៅប្រកបដោយក្តីសុខសាន្ត ហើយគ្រប់មូលដ្ឋានភូមិស្រុកនៅទូទាំងប្រទេស ក៏ទទួលបានការអភិវឌ្ឍរីកចម្រើនប្រកបដោយនិរន្តរភាព។ ក្នុងន័យនេះ សូមមន្ត្រីរបស់គណបក្សប្រជាជនគ្រប់រូប បន្តចូលរួមបម្រើ រែកពន់ និងសម្រេចភារកិច្ច និងសមិទ្ធផលវិជ្ជមាននានាបន្ថែមទៀត ដើម្បីនាំស្នាមញញឹមជូន​ប្រជាជនយើង។ ខ្មែររួមគ្នា ខ្មែរកាន់តែរីកចម្រើន និងអាចរស់នៅជាមួយគ្នាដោយភាព​សុខដុមរមនា និងសុភមង្គល។ នេះជាការលើកឡើងរបស់ឯកឧត្តមបណ្ឌិត ហ៊ុន ម៉ាណែត នៅក្នុងពិធីបើកការដ្ឋានសាងសង់ផ្លូវបេតុងចំនួន២ ខ្សែ ប្រវែងប្រមាណ ៣២ គ.ម និងពិធីកាត់ឫសសីមា និងសម្ពោធឆ្លងសមិទ្ធផលនានា នៅវត្តឥន្ទរិទ្ធី (ហៅវត្តបារាយណ៍) ស្ថិតក្នុងភូមិបារាយណ៍ ឃុំឈូក ស្រុកក្រូចឆ្មារ ខេត្តត្បូងឃ្មុំ នៅថ្ងៃទី២៦ ខែមីនា ឆ្នាំ២០២៣ តំណាងសម្តេចតេជោ ហ៊ុន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។

នាឱកាសនេះដែរ ឯកឧត្តមបណ្ឌិត ក៏បានសម្តែងនូវការអបអរសាទរ និងក្តីអនុមោទនាត្រេកអរចំពោះការកកើត​ឡើងនូវសមិទ្ធផលថ្មីៗ ជាបន្តបន្ទាប់ នៅក្នុងទីអារាមវត្តបារាយណ៍ដ៏មានវ័យចំណាស់ប្រមាណ ៨៥ មួយនេះ ។ សមិទ្ធផលគួរជាទីមោទនៈទាំងអស់នេះ កើតឡើងពីសទ្ធាជ្រះថ្លារបស់ សម្ដេចតេជោ នាយករដ្ឋមន្ត្រី និង សម្ដេច​កិត្តិព្រឹទ្ធបណ្ឌិត ព្រមទាំង ឯកឧត្តម ជា សុផារ៉ា ឧបនាយករដ្ឋមន្ដ្រី រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់ ក៏ដូចជាការចូលរួមចំណែកបំពេញកុសលពីសំណាក់ពុទ្ធបរិស័ទ្ធជិតឆ្ងាយ ក្នុងការសាងសង់ដើម្បីតម្កល់​ទុកក្នុងព្រះពុទ្ធសាសនា និងសម្រាប់ជូនលោកតាលោកយាយ និងពុទ្ធបរិស័ទជិតឆ្ងាយ ប្រើប្រាស់ជួបជុំធ្វើបុណ្យទាន ទៅតាមគន្លងប្រពៃណីសាសនា។

ឯកឧត្តមបណ្ឌិត បានចូលរួមត្រេកអរជាមួយប្រជាពលរដ្ឋនៅស្រុកក្រូចឆ្មារ និងស្រុកត្បូងឃ្មុំ ក៏ដូចជានៅទូទាំងខេត្តត្បូង​ឃ្មុំទាំងមូល ចំពោះសមិទ្ធផលផ្លូវបេតុងថ្មីចំនួន ២ ខ្សែ ប្រវែងប្រមាណ ៣២ គ.ម ដែលទើបនឹងប្រកាសបើក​ការដ្ឋានសាង​សង់នៅពេលនេះ ហើយដែលផ្លូវនេះនឹងជួយសម្រួលដល់ការតភ្ជាប់ និងការធ្វើដំណើរពីតំបន់​មួយទៅតំបន់មួយ ព្រមទាំងជួយលើកកម្ពស់ជីវភាពរស់នៅ និងការប្រកបរបរប្រចាំ​ថ្ងៃរបស់ប្រជា​ពលរដ្ឋឱ្យកាន់​តែធូរធារីកចម្រើនកើនទ្បើងបន្ថែមទៀត។  

ជាមួយគ្នានេះ ឯកឧត្តមបណ្ឌិត ក៏បានអរគុណចំពោះប្រជាពលរដ្ឋស្រុកក្រូចឆ្មារដែលតែងជឿទុកចិត្តមកលើ សម្តេចតេជោ នាយករដ្ឋមន្ត្រី តាមរយៈការចូលរួមជាមួយរាជរដ្ឋាភិបាលក្នុងសកម្មភាពនានា  ជាពិសេសការ​ស្ម័គ្រចិត្តទទួល​ចាក់វ៉ាក់សំាងប្រឆាំងនឹងជំងឺកូវីដ-១៩ ដែលជួយឱ្យកម្ពុជាអាចគ្រប់គ្រងស្ថានការណ៍នៃការឆ្លងរីករាល​ដាលក្នុងសហគមន៍បានយ៉ាងលឿន និងស្ថិតក្នុងចំណោមប្រទេសដែលបើកសកម្មភាព​សង្គម-សេដ្ឋកិច្ចឡើងវិញបាន​មុនគេ រហូតធ្វើឱ្យសេដ្ឋកិច្ចកម្ពុជាងើបឡើងវិញយ៉ាងលឿនពីវិបត្តិនៃជំងឺកូវីដ-១៩ ៕