កម្ពុជា បង្កើតឱ្យមានច្បាប់“ការគ្រប់គ្រងទឹកស្អាត​” ដើម្បីធានាគុណភាព សុវត្ថិភាព និងតម្លៃ

ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងអង្គការ  JICA របស់ជប៉ុន បានធ្វើកិច្ចសហប្រតិបត្តិការយ៉ាងល្អជាមួយគ្នា ដើម្បីបង្កើតបាននូវច្បាប់ស្តីពី “ការគ្រប់គ្រងទឹកស្អាត” នៅកម្ពុជាលើកដំបូង ដែលរាជរដ្ឋាភិបាលកម្ពុជាសម្រេចដាក់ឱ្យប្រើប្រាស់ជាផ្លូវការនៅថ្ងៃទី១១ ខែមីនា ឆ្នាំ២០២៣កន្លងទៅ។​

ច្បាប់ស្តីពី “ការគ្រប់គ្រងទឹកស្អាត” នេះ គឺបានកំណត់អំពីក្របខណ្ឌគតិយុត្តសម្រាប់ការគ្រប់គ្រង និងអភិវឌ្ឍន៍ការផ្គត់ផ្គង់ទឹកស្អាតនៃកម្ពុជា។ ការបង្កើតច្បាប់នេះ គឺមានគោលបំណងធានាគុណភាព សុវត្ថិភាព និរន្តរភាព និងតម្លៃសមរម្យ ព្រមទាំងចូលរួមលើកកម្ពស់សុខុមាលភាពសាធារណៈ និងជីវភាពរស់នៅរបស់ប្រជាជនប្រកបដោយបរិយាបន្ន។

មាត្រា៦នៃច្បាប់នេះ បានចែងនូវគោលការណ៍សំខាន់ៗចំនួន៤ស្តីបញ្ហាទឹកស្អាត គឺទី១ ឱ្យមានតម្លាភាពក្នុងការផ្តល់សេវាទឹកស្អាត ទី២ ធ្វើឱ្យមានសមភាព និងមិនមានការរើសអើងរវាងអ្នកផ្តល់សេវា និងអ្នកទទួលសេវាទឹកស្អាត។ ទី៣ លើកទឹកចិត្តដល់អ្នកវិនិយោគគិនជាតិ និងអន្តរជាតិចូលរួមវិនិយោគវិស័យទឹកស្អាតនៅកម្ពុជា និងទី៤ ផ្តល់សេវាផ្គត់ផ្គង់ទឹកស្អាតដោយឈរលើលក្ខខណ្ឌ៤យ៉ាង​ គឺទឹកស្អាតត្រូវមានគុណភាព សុវត្ថិភាព និរន្តរភាព និងតម្លៃសមរម្យ។

ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងអង្គការ JICA របស់ជប៉ុន បានរួមសហការអនុវត្តគម្រោងជាបន្តបន្ទាប់លើវិស័យទឹកស្អាតនៅកម្ពុជា។ ទន្ទឹមនោះ សេចក្តីព្រាងច្បាប់ស្តីពីការគ្រប់គ្រងទឹកស្អាត ត្រូវបានផ្ដួចផ្ដើម និងគាំទ្រក្នុងជំហានដំបូងតាមរយៈគម្រោងពង្រឹងសមត្ថភាពគ្រប់គ្រងវិស័យទឹកស្អាតទីប្រជុំជនកម្ពុជា ​(ជំហានទី៣) ដែលបានអនុវត្តចាប់ពីឆ្នាំ២០១២ ដល់ឆ្នាំ២០១៨។ នេះបើតាមសេចក្តីប្រកាសព័ត៌មានរូមគ្នារវាងក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងអង្គការ JICA កាលពីថ្ងៃទី២៧ ខែមីនា ឆ្នាំ២០២៣។

អង្គការ JICA គឺជាដៃគូអភិវឌ្ឍដ៏យូរអង្វែងលើវិស័យទឹកស្អាតនៅកម្ពុជា។ អង្គការ JICA បានប្តេជ្ញាចិត្តធ្វើការងារយ៉ាងជិតស្និតជាមួយរាជរដ្ឋាភិបាលកម្ពុជា ដើម្បីសម្រេចឱ្យបាននូវការទទួលបានទឹកស្អាត និងសុវត្ថិភាពសម្រាប់ប្រជាជនកម្ពុជាទាំងមូលនាពេលអនាគត៕