ប្រធានសមាគមអំពាវនាវពលរដ្ឋខ្មែរគាំទ្រសាច់ជ្រូកចិញ្ចឹមក្នុងស្រុកចៀសវាងប្រើសាច់បង្កកនាំឱ្យប៉ះពាល់សុខភាព

លោក ស៊្រុន ពៅ ប្រធានសមាគមអ្នកចិញ្ចឹមសត្វកម្ពុជា បានលើកឡើងថា ស្ថានភាពទីផ្សារជ្រូកនៅកម្ពុជា នាពេលបច្ចុប្បន្ន មិនសូវល្អប្រសើរប៉ុន្មានទេ ដោយសារការចិញ្ចឹមលើសតម្រូវការ បណ្តាលឱ្យសល់ ធ្វើឱ្យអ្នកចិញ្ចឹមត្អូញត្អែរពីការខាតបង់ប្រាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលដែលរដូវនេះ មានកម្មវិធីច្រើន លោក ស៊្រុន ពៅ បានអំពាវនាវដល់ពលរដ្ឋដែលមានពិធីការ បុណ្យ និងម្ចាស់ភោជនីយដ្ឋាន ជួយផ្គត់ផ្គង់សាច់ជ្រូក ដែលចិញ្ចឹមក្នុងស្រុក មានគុណភាពល្អ ដើម្បីរួមចំណែកជួយ​ទីផ្សារសម្រាប់កសិករ និងអ្នកចិញ្ចឹម។

ប្រធានសមាគមរូបនេះ បានសង្កត់ធ្ងន់ថា ការផ្គត់ផ្គង់ចំណីអាហារនៅតាមកម្មវិធីការបុណ្យ និងភោជនីយដ្ឋាន មានសារៈសំខាន់ សូមកុំប្រើប្រាស់សាច់ដែលគ្មានគុណភាពនាំឱ្យប៉ះពាល់ដល់សុខភាពអ្នកបរិភោគ។ លោកបានបញ្ជាក់ដូច្នេះថា« ផលិតផលក្នុងស្រុកយើងធ្វើបានហើយលក់អត់ដាច់ ដោយសារផលិតផលយើងផលិតថ្លៃ រីឯរបស់នាំចូល(សាច់បង្កក) អត់ស្តង់ដារ ​របស់ដែលគេទុកចោល យើងយកមកលក់ឱ្យប្រជាពលរដ្ឋ យកមកធ្វើចំណីអាហារ និងប្រើប្រាស់នៅក្នុងពិធីបុណ្យការផ្សេងៗ»។

បើតាមលោក ស៊ុ្រន ពៅ កន្លងមកសមាគមបានពិនិត្យឃើញថា មានការនាំចូលសាច់បង្កកខូចគុណភាព ដោយត្រូវបានសមាគមឃាត់ទុក និងកម្ទេចចោលជាបន្តបន្ទាប់។ លោកថា « សូមម្ចាស់ដើមបុណ្យ ម្ចាស់ដើមការ មេត្តាជួយមើលចុងភៅ កុំឱ្យគាត់ទៅទិញយកសាច់ដែលគេចោល ឬមិនត្រឹមត្រូវយកមកស្លឱ្យភ្ញៀវហូប ដើម្បីចំណេញ នាំឱ្យខូសសុខភាពអ្នកបរិភោគ»។

មិនពិបាកមើលនោះទេ ផលិតផលក្នុងស្រុកដូចជា ជ្រូក មាន់ ទា មានសាច់ទន់ស្រស់ ខុសពីសាច់ក្លាសេ មានសភាពរឹង តែបើទន់ ក៏ទន់ស្លេក និងខ្មៅ។ នេះជាការពន្យល់របស់លោក ស៊្រុន ពៅ។

លោកលើកឡើងថា សាច់ជ្រូកមានសារៈសំខាន់ណាស់ ក្នុងវិស័យចំណីអាហារនៅកម្ពុជា។ លោកថា ទោះជាអ្នកខ្សត់​ខ្សោយយ៉ាងណា ក៏អាចមានលទ្ធភាពទិញសាច់ជ្រូកបរិភោគបានដែរ។​

ដោយសារការចិញ្ចឹមជ្រូកនៅកម្ពុជាច្រើនហូរហៀ ធ្វើឱ្យមានកំណើនលើសតម្រូវការទីផ្សារ រហូតដល់មានការនាំចេញ​ទៅប្រទេសជិតខាងថែមទៀត។ ​​ប៉ុន្តែកំណើននៃការនាំចេញនេះ មានចំនួនតិចតួចប៉ុណ្ណោះ។ ប្រធានសមាគមអ្នក​ចិញ្ចឹមសត្វកម្ពុជា បានលើកឡើងថា បច្ចុប្បន្ននេះ ជ្រូករស់លក់បានតម្លៃ ៨០០០រៀល ក្នុងមួយគីឡូក្រាមប៉ុណ្ណោះ ដែលធ្វើឱ្យអ្នកចិញ្ចឹមខាតអស់ប្រហែល ៥០ដុល្លារ ក្នុងជ្រូកមួយក្បាល។ លោកថា ការខាតបង់នេះ ដោយសារវត្ថុ​ធាតុដើម ដូចជា ចំណីឡើងថ្លៃ រួមផ្សំនឹងវិបត្តិសេដ្ឋកិច្ច ធ្វើឱ្យតម្លៃជ្រូកលើទីផ្សារធ្លាក់ចុះ នាំការចិញ្ចឹមរបស់ពលរដ្ឋ​សល់ច្រើនលើសតម្រូវការ។

ទាក់ទិននឹងការនាំចូលសាច់បង្កក កន្លងមកគេសង្កេតឃើញថា មន្រ្តីពាក់ព័ន្ធតែងតែធ្វើការបង្រ្កាបជាហូរហែ ប៉ុន្តែ​បញ្ហានេះ នៅតែមិនទាន់បញ្ចប់នៅឡើយ៕