ព័ត៌មានជាតិ

បេះដូងក្រដាសបត់ជិត៤លានបេះដូងនៅក្នុងបរិវេណប្រាសាទអង្គរ បានរើចេញនៅថ្ងៃនេះ

បានផុស

៣ years មុន

នៅ

ថ្ងៃចន្ទ ២៤ មេសា ២០២៣

ដោយ

សៀមរាប ៖ បេះដូងក្រដាសបត់ជិត៤លានបេះដូង និងជាបេះដូងច្រើនជាងគេលើពីភពលោក បានដោតជាអក្សរខ្មែរ និងជារូបបេះដូង នៅបរិវេណប្រាសាទអង្គរវត្ដ ត្រូវបានដក រៀបចំទុកវិញ បន្ទាប់ពីបានបំបែកឯតទគ្គកម្មបេះដូងច្រើនជាងគេលើពិភពលោក ដោយ Guinness World Records នៃយុទ្ធនាការ Beyond The Games កាលពីថ្ងៃទី១១ ខែមេសា ឆ្នាំ២០២៣កន្លងមក។

លោក ធុន សីហា យុវជនស្ម័គ្រចិត្ដនៃក្រុមការងារ Beyond The Games បានឱ្យដឹងនៅថ្ងៃទី២៤នេះថា បេះដូងដែលរៀបជាអក្សរខ្មែរនិងរូបបេះដូង បានដក ប្រមូល រៀបចំទុកដាក់ហើយ នៅព្រឹកថ្ងៃទី២៤ ខែមេសា ឆ្នាំ២០២៣នេះ ប៉ុន្ដែបេះដូងជាទ្រង់ដែកត្រីកោណបានរុះរើកាលពីថ្ងៃទី២៣ ដើម្បីយកទៅដាក់បង្ហាញជាសួននៅរាជធានីភ្នំពេញបន្ដទៀត ដែលធ្វើឡើងនៅវិមានឈ្មះឈ្នះនាថ្ងៃទី២៨ខែមេសាឆ្នាំ២០២៣ខាងមុខនេះ នៅក្នុងកម្មវិធី Beyond The Games ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្ដថា បេះដូងបត់ក្រដាសនេះ បានរៀបចំនៅបរិវេណប្រាសាទអង្គរចាប់ពីថ្ងៃទី៧ខែមេសា ហើយនៅថ្ងៃទី១១ខែមេសាបានប្រកាសបំបែកកំណត់ត្រាពិភពលោក បេះដូងច្រើនជាងគេ ដោយ Guinness World Records នៃយុទ្ធនាការ Beyond The Games។ក្រោយពីការរៀបចំជារូបអក្សរខ្មែរ និងរូបបេះដូងមានភ្ញៀវទេសចររាប់លាននាក់ទៅទស្សនា។

ជាមួយគ្នានោះដែរ មន្ដ្រីអាជ្ញាធរជាតិអប្សរាពីររូបដែលជាក្រុមអ្នកមើលថែរក្សាបេះដូងបត់ បានឱ្យដឹងថា ក្រោយពីបេះដូងបត់បានបង្ហាញឱ្យពិភពលោកបានឃើញ នៅបរិវេណប្រាសាទអង្គរកន្លងមក បានទាក់ទាញអ្នកទេសចរជាតិអន្ដរជាតិយ៉ាងច្រើនកុះករទៅទស្សនា និងថតផ្ដិតយករូបភាពជាអនុស្សាវរីយ៍ ជាក់ស្ដែងក្រោយចូលឆ្នាំ មានអ្នកទេសចរជាតិនិងអន្ដរជាតិទៅទស្សនាជិតមួយម៉ឺននាក់ក្នុងមួយថ្ងៃ។

មន្ដ្រីដដែលបានបន្ដថា បើទោះបីបេះដូងបត់នេះ បានដកចេញវិញក្ដី ក៏ប៉ុន្ដែទស្សនីយភាពបេះដូងច្រើនជាងគេលើពិភពលោកនេះ បានបង្កភាពសប្បាយរីករាយ និងមានអនុស្សាវរីយ៍ដែលមិនអាចបំភ្លេចបាន។ ពួកគាត់បានសម្ដែងការសោកស្ដាយដែរ ក៏ប៉ុន្ដែដោយសារបេះដូងនេះជាក្រដាសមិនអាចទុកយូរបាន នាំឱ្យខូចខាត ដោយសារភ្លៀងខ្យល់ជាដើម ហើយរំពឹងថា ឆ្នាំក្រោយៗទៀត ក្រុមការងារបាយ័នឌឺហ្គេមនឹងមានកម្មវិធីល្អៗជាច្រើនទៀត ដើម្បីទាក់ទាញអ្នកទេសចរទៅកំសាន្ដនិងបង្កើតស្នាមញញឹមដល់កូនខ្មែរគ្រប់ៗរូប។

គិតចាប់ពីថ្ងៃទី១១ ដល់ថ្ងៃទី២៤ ខែមេសា ឆ្នាំ២០២៣នេះ បេះដូងចំនួន ៣,៩១៧,៨០៥ បេះដូង បានបំបែកកំណត់ត្រាពិភពលោកជាបេះដូងច្រើនជាងគេដែលបានរៀបចំជាអក្សរខ្មែរ និងរូបបេះដូង បានបង្ហាញនៅបរិវេណប្រាសាទអង្គរវត្ដមានរយៈពេល១៤ថ្ងៃមកហើយ៕

ដោយ ៖ គឿនវេត