មកដឹងកាលបរិច្ឆេទចុងក្រោយ នៃការតាំងបង្ហាញ បេះដូងច្រើនជាងគេលើពិភពលោក

ឆ្លើយតបតាមការសំណូមពររបស់មហាជនដែលមានបំណងទស្សនាការដាក់តាំងបង្ហាញបេះដូងច្រើនជាងគេលើពិភពលោក ជាពិសេសភ្ញៀវទេសចរនៅទីឆ្ងាយអាចចូលរួមទស្សនាបានដោយផ្ទាល់ យុទ្ធនាការ BeyondTheGames នឹងបន្តធ្វើការតាំងបង្ហាញ នៅប្រាសាទអង្គរវត្តរហូតដល់ចុងសប្ដាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឡេក គឹមលីន ប្រធានគ្រប់គ្រងភ្នាក់ងារទេសចរនៅប្រាសាទអង្គរ នៃអាជ្ញាធរជាតិអប្សរា បានឱ្យដឹងនៅថ្ងៃទី១៩ ខែមេសានេះថា ចាប់ពីថ្ងៃទី១៧ ដល់ថ្ងៃទី១៨ ខែមេសា ឆ្នាំ២០២៣នេះ អ្នកទេសចរជាតិ និងអន្ដរជាតិ បានទៅទស្សនា​បេះដូងបត់នៅសួនបេះដូងក្នុងបរិវេណប្រាសាទអង្គរជាង ៣ ម៉ឺន ៦ពាន់នាក់ ភាគច្រើនជាអ្នកទេសចរជាតិ។ លោកបានបន្ដថា មហាជនបានថតរូបជាអនុស្សាវរីយ៍ ហើយបង្ហាញពីភាពសប្បាយរីករាយនូវរូបភាពដោតបេះដូងចេញជារូបរាអក្សរបេះដូងខ្មែរ។

លោក ឡេក គឹមលីន មានប្រសានស៍បន្តថា ក្រុមការងាររៀបចំបេះដូងនឹងដកចេញវិញ ប៉ុន្ដែលោក អំពាវឱ្យប្រជាពលរដ្ឋទៅទស្សនាប្រាសាទអង្គរវត្ដបន្ដទៀត ហើយស្នើឱ្យជួយថែរក្សាបរិស្ថាន គោរពក្រមប្រតិបត្ដិអង្គររួមមាន កុំស្លៀកពាក់ខ្លី សិចស៊ី ហាមប៉ះក្បាច់ចម្លាក់ ស្រែកឡូឡា ហាមជក់បារីជាដើម។

អ្នកទេសចជាតិបានឱ្យដឹងថា ពួកគាត់មានការសប្បាយរីករាយ បើទោះបីពួកគាត់មិនបានទៅទស្សនានាថ្ងៃចូលឆ្នាំខ្មែរក្ដី។ ពួកគាត់បានលើកឡើងថា បេះដូងបត់រាប់លានដែលបានដោតធ្វើជាអក្សរ “បេះដូងខ្មែរ” នៅបរិវេណប្រាសាទអង្គរនេះ បង្ហាញពីភាពអស្ចារ្យនូវស្នាដៃឆ្នៃប្រឌិតបានល្អឯករបស់ខ្មែរ ដែលធ្វើឱ្យអ្នកទេសចរជាតិ និងអន្ដរជាតិចាប់អារម្មណ៍ទៅទស្សនាកម្សាន្ដរាប់លាននាក់ ដែលធ្វើឱ្យពួកគាត់សប្បាយរីករាយ និងបានថតរូបទុកជាអនុស្សាវរីយ៍នៅបេះដូងបត់ដែលមិនធ្លាប់មានកន្លងមក។

គួររំលឹកថា កាលពីល្ងាចថ្ងៃទី១១ ខែមេសា ឆ្នាំ២០២៣នេះ Guinness World Records បានប្រកាសជាផ្លូវការដាក់បញ្ចូល ក្នុងការបំបែកឯតទគ្គកម្មពិភពលោក “បេះដូងច្រើនជាងគេលើពិភពលោក” របស់កម្ពុជា ដែលតាំងបង្ហាញនៅប្រាសាទអង្គរវត្តក្នុងខេត្តសៀមរាប ដែលមានចំនួន ៣ ៩១៧ ៨០៥ បេះដូង៕

អត្ថបទ៖ គឿន វេត