រដ្ឋបាលខេត្តកំពង់ចាមរៀបចំកន្លែងបញ្ចាំងបន្តព្រឹត្តិការណ៍ប្រកួតស៊ីហ្គេម

រដ្ឋបាលសាលាខេត្តកំពង់ចាមបានត្រៀមរៀបចំកន្លែងបញ្ចាំងផ្ទាំង LED (ស្លាយ) ពីព្រឹត្តិការណ៍ប្រកួតស៊ីហ្គេម និងអាស៊ានប៉ារ៉ាហ្គេម នាពេលខាងមុខនេះ ដែលកម្ពុជាធ្វើជាម្ចាស់ផ្ទះក្នុងឆ្នាំ ២០២៣ នេះ ដែលជ្រេីសយកទីតាំងលេីសូនច្បារមុខសាលាខេត្ត និងតាមក្រុងស្រុកមួយចំនួនផងដែរ។

ក្រោយពីប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសឲ្យរដ្ឋបាលរាជធានី-ខេត្តទាំងអស់រៀបចំទីកន្លែងសមរម្យដាក់ LED ផ្សាយបន្តបន្ទាល់នូវព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម។

លោក ស្រី សុភក្ត្រ័ អភិបាលរងខេត្តកំពង់ចាម និងជាអ្នកនាំពាក្យបានឲ្យដឹងថា រដ្ឋបាលខេត្តកំពង់ចាម ក្រោមការដឹកនាំពីលោក អ៊ុន ចាន់ដា អភិបាលខេត្តកំពង់ចាម បានរៀបចំឲ្យការដាក់ផ្ទាំង LED ផ្សាយបន្តបន្ទាល់នូវព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាហ្គេម នៅពេលខាងមុខនេះ ដោយបានជ្រើសយកទីតាំងលើសួនច្បារមុខសាលាខេត្ត និងឲ្យអាជ្ញាធរក្រុង-ស្រុកទាំង ១០ នៃខេត្តកំពង់ចាម ត្រូវរៀបចំកន្លែងផ្សាយបន្តដែរដូចនៅតាមទីប្រជុំជន ឬតំបន់ណាផងដែរ។

គួរបញ្ជាក់ថា ពិធីបើកកីឡាស៊ីហ្គេម លើកទី៣២ នឹងប្រព្រឹត្តទៅនាថ្ងៃទី០៥ ខែឧសភា ឆ្នាំ២០២៣ នៅពហុកីឡដ្ឋានជាតិមរតកតេជោ។ ប៉ុន្ដែមុនឈានដល់ពិធីបើកផ្លូវការ ប្រភេទកីឡាមួយចំនួន នឹងត្រូវចាប់ផ្ដើមការប្រកួតមុន ដូចជាកីឡាបាល់ទាត់ ដែលនឹងចាប់ផ្ដើមការប្រកួតពីថ្ងៃទី២៩ ខែមេសានេះតទៅ៕

អត្ថបទ៖ ឡេក ចាន់ពេជ្រ