គណបក្សប្រជាធិបតេយ្យមូលដ្ឋាន បានសម្រេចចុះបញ្ជីគណបក្ស និងបញ្ជីបេក្ខជនឈរឈ្មោះបោះឆ្នោត សម្រាប់ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ ឆ្នាំ ២០២៣ បើទោះបីជាថ្នាក់ដឹកនាំមួយចំនួននៃគណបក្សនេះ បានចាកចេញជាបន្តបន្ទាប់ក៏ដោយ។

គណៈកម្មាធិការជាតិរៀបចំការបោះឆ្នោត (គ.ជ.ប) បានទទួលពាក្យសុំចុះបញ្ជីគណបក្សនយោ​បាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ របស់គណបក្សប្រជាធិបតេយ្យមូលដ្ឋាន សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣ នៅទីស្ដីការ គ.ជ.ប កាលពីព្រឹកថ្ងៃទី ៨ ខែឧសភា ឆ្នាំ ២០២៣។ លោក យ៉េង វីរៈ ប្រធាន​គណបក្ស​ប្រជាធិបតេយ្យ​មូលដ្ឋាន បានយកឯកសារទៅដល់ដោយផ្ទាល់នៅ គ.ជ.ប។

សូមជម្រាបថា គិតមកដល់រសៀលថ្ងៃទី ៨ ខែឧសភា ឆ្នាំ ២០២៣ ដែលជាថ្ងៃចុងក្រោយនៃការទទួលពាក្យសុំចុះបញ្ជីគណបក្សនយោបាយ និងបញ្ជីបេក្ខជនឈរឈ្មោះបោះឆ្នោត មានគណបក្សនយោ​បាយប្រមាណជា ១៧ បានចុះបញ្ជី។ ការចុះបញ្ជីគណបក្សនយោបាយ និងបញ្ជីបេក្ខជនឈរឈ្មោះបោះឆ្នោត សម្រាប់ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ មានរយៈពេល ១៥ថ្ងៃ ចាប់ពីថ្ងៃទី ២៤ ខែមេសា ដល់ថ្ងៃទី ៨ ខែឧសភា ឆ្នាំ ២០២៣៕