ការរឹតត្បិតចំពោះអាជីវករជួលសម្លៀកបំពាក់បុរាណមកថតរូបក្នុងបរិវេណសារមន្ទីរ មានមូលហេតុ ៣

ចំពោះការរឹតត្បិតចំពោះអាជីវករមួយចំនួន ដែលផ្តល់សេវាសម្លៀកបំពាក់បុរាណ មកថតរូបនៅក្នុងបរិវេណសារមន្ទីរជាតិ កន្លងមក គឺដោយសារតែមានមូលហេតុមួយចំនួន ពុំមែនដោយសារតែសារមន្ទីរជារបស់អ្នកណា ឬសារមន្ទីរជាតិកម្ពុជា មិនគាំទ្រដល់វិស័យឯកជន ក្នុងការផ្សព្វផ្សាយលើកតម្លៃវប្បធម៌ខ្មែរឡើយ។ សេចក្តីជូនដំណឹងនេះ ធ្វើឡើងបន្ទាប់ពី កាល​ពី​ពេល​ថ្មីៗ​កន្លងមក មានអាជីវករជួល​សម្លៀកបំពាក់​បុរាណ​មួយ​ចំនួន កើតមានការយល់ច្រឡំ និងបានលើកជាសំណួរនៅលើបណ្តាញសង្គមថា “តើសារមន្ទីរជារបស់អ្នកណា? ជារបស់ជាតិ ឬក៏ជារបស់ឯកជន?”​

បើតាមសេចក្តីជូនដំណឹងរបស់ក្រសួងវប្បធម៌និងវិចិត្រសិល្បៈ សារមន្ទីរជាតិគឺស្វាគមន៍ចំពោះសាធារណជន និងអាជីវករ​ទាំងអស់ ដែលមានបំណងចូលរួមផ្សព្វផ្សាយពីវប្បធម៌ខ្មែរនាពេលកន្លងមក។ ក្នុងនោះ បានបញ្ជាក់ទៀតថា ការដែលរឹតត្បិត​ចំពោះអាជីវករ​មួយចំនួន ដែលផ្តល់សេវាសម្លៀកបំពាក់បុរាណមកថតរូប នៅក្នុងបរិវេណសារមន្ទីរជាតិកន្លងមក គឺដោយសារតែមានមូលហេតុ ៣ ខាងក្រោមនេះ៖

១.អាជីវករមិនបានទាក់ទងស្នើសុំការអនុញ្ញាតពីសារមន្ទីរជាតិ មុននឹងបញ្ចូលទីតាំងសារមន្ទីរជាតិ ជាផ្នែកមួយនៃសេវាកម្មអតិថិជន នៅក្នុងការជួលសម្លៀកបំពាក់ថតរូប។

២.អាជីវករបានប្រើប្រាស់ស្ថាប័នរដ្ឋ នៅក្នុងការផ្តល់សេវាកម្ម សម្រាប់ផលប្រយោជន៍ផ្ទាល់ខ្លួនដោយគ្មានការអនុញ្ញាត។ ក្នុងករណីនេះ សារមន្ទីរជាតិចាំបាច់មានវិធានការណ៍ទប់ស្កាត់មួយចំនួន រាប់ទាំងការហាមឃាត់ ឬផ្អាកសកម្មភាព​ថតផ្ទាល់ខ្លួន​តែម្តង រហូតដល់សារមន្ទីរជារតិបានទទួលការណែនាំ ឬអនុញ្ញាតពីក្រសួងវប្បធម៌ និងវិចិត្រសិល្បៈ ជាមុន​សិន។ ដើម្បីជៀសវាងទាក់ទងទៅក្រសួងជំនាញ (ក្រសួងវប្បធម៌​ និងវិចិត្រសិល្បៈ) ដើម្បីសុំការឯកភាពលើគំរូម៉ូត សម្លៀកបំពាក់​ដែល​ត្រូវប្រើប្រាស់​ជូនដល់អតិថិជន។

៣.កន្លងមក មានករណីនៃការប្រើប្រាស់សម្លៀកបំពាក់បុរាណខុសឆ្គងមួយចំនួន ជាពិសេសទៅលើការប្រើប្រាស់ពណ៌ ការរចនគ្រឿងអលង្ការ ម្កុដ និងស្បៃបន្ថែមលើឈុតបុរាណ ហេតុនេះហើយ ទើបសារមន្ទីរជាតិ​ស្នើឲ្យមានការឆ្លង​យោបល់​ពី​អ្នកជំនាញ​របស់ក្រសួងជាមុនសិន ដើម្បីជៀសវាងកំហុសឆ្គង ក្នុងការផ្សព្វផ្សាយដែលប្រាសចាកទម្រង់ដើម និងគ្មានមូលដ្ឋានច្បាស់លាស់។

ដើម្បីជៀសវាងកើតមានបញ្ហាដូចដែលបានរៀបរាប់ខាងលើ សារមន្ទីរជាតិកម្ពុជាទទូចស្នើសុំអាជីវករទាំងអស់ ដែលមានបំណង​ចង់ចូលរួមផ្សព្វផ្សាយ​វប្បធម៌ខ្មែរ ត្រូវទាក់ទងទៅក្រសួងជំនាញជាមុនសិន ដើម្បីឆ្លងយោបល់លើគំរូម៉ូតសម្លៀកបំពាក់​ដែលនឹងដាក់ជួលថត ឬស្លៀកពាក់ ពិសេសត្រូវសុំការអនុញ្ញាតចូលថតរូប ក្នុងបរិវេណខាងមុខអាគារសារមន្ទីរជាតិ។

ក្នុងនោះ អគ្គនាយកដ្ឋានបេតិកភណ្ឌនាយដ្ឋានសារមន្ទីរ ក៏សម្តែងក្តីព្រួយបារម្ភដែរថា ទម្រង់នៃការផ្សព្វផ្សាយនោះ អាចប្រាសចាក​ពី​ទម្រង់ដើម ព្រោះមិនបានពិគ្រោះយោបល់ជាមួយអ្នកជំនាញ និងអាចបណ្តាលឲ្យមានការប៉ះពាល់ដល់វប្បធម៌​​ដ៏ល្អផូរផង់​របស់ខ្មែរយើង។ លើសពីនេះ នាយដ្ឋានសារមន្ទីរបញ្ជាក់ដែរថា ទាំងអស់នេះក៏ជាការជួយ​ក្រើនរំលឹក នៅក្នុងនាមសេនាធិការរបស់ក្រសួងជំនាញ ហេតុនេះសូមឲ្យសាធារណជន និងអាជីវករមេត្តាយោគយល់ ចំពោះវិធានការណ៍នានាដែលយើងបានដាក់ចេញទៅ។ នៅក្នុងករណីមានមន្ទិលមិនច្បាស់លើសេចក្តីជូនដំណឹងនេះ គឺអាចទំនាក់ទំនងសួរបញ្ជាក់តាមរយៈ Messenger, សារអេឡិចត្រូនិច [email protected] ឬទូរស័ព្ទលេខ ០២៣ ២១១ ៧៥៣ (នៅរៀងរាល់ម៉ោងធ្វើការ)៕