ក្រសួងវប្បធម៌ទទួលបានហូលពិតាន ៤០ផ្ទាំង សម្រាប់រក្សាទុកនៅសារមន្ទីរជាតិ

អង្គការគាំពារកុមារខ្មែរ បានប្រគល់ជូនហូលពិតានចំនួន ៤០ផ្ទាំង ទៅក្រសួងវប្បធម៌ដើម្បីជាសម្បត្តិរដ្ឋរក្សាទុកនៅសារមន្ទីរជាតិ និងដើម្បីឱ្យកូនខ្មែរជំនាន់ក្រោយ ភ្ញៀវអន្តរជាតិបានស្គាល់ពីហូលតម្បាញរបស់ខ្មែរផងដែរ។ នេះបើតាមទំព័រហ្វេសប៊ុក របស់ក្រសួងវប្បធម៌ និងវិចិត្រសិល្បៈ។

ការប្រគល់ជូននេះ ធ្វើឡើងនៅថ្ងៃទី៤ ខែកុម្ភៈ ឆ្នាំ២០២៥ ក្នុងឱកាសក្រុមអង្គការគាំពារកុមារខ្មែរ ដឹកនាំដោយលោកស្រី Harumi Sekiguchi លោកស្រី ចាន់ ស្រី និង លោក ព្រំ ប៊ុនធឿន ជួបសម្តែងការគួរសមជាមួយ លោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ នៅសារមន្ទីរជាតិកម្ពុជា។

ក្រសួងវប្បធម៌បញ្ជាក់ថា គោលបំណងនៃការផ្តល់ហូលពិតាននេះ គឺដើម្បីធានាបាននូវនិរន្តរភាពនៃការអភិរក្ស ថែរក្សា និងផ្សព្វផ្សាយពីភាពប្រណិត និងល្អឯក នៃមរតកតម្បាញសូត្រខ្មែរ។ លើសពីនោះ ក្រុមការងារចង់ផ្តល់លទ្ធភាពនិងភាពងាយស្រួលដល់ក្រុមអ្នកតម្បាញសូត្រខ្មែរ ដែលមានបំណងចង់សិក្សាឈ្វែងយល់ពីទម្រង់ និងក្បាច់រចនានានានៅលើផ្ទាំងសូត្រ អាចចូលមកពិនិត្យផ្ទាល់បាននៅសារមន្ទីរជាតិ ដោយទាក់ទងផ្ទាល់មកសារមន្ទីរជាមុន ដើម្បីក្រុមការងារអាចរៀបចំសមុច្ច័យទាំងនោះទាន់ពេលវេលា ដោយពុំចាំបាច់ចំណាយពេលវេលារង់ចាំ។

បន្ថែមពីនេះ ក្រសួងលើកឡើងថា៖ «សមុច្ច័យទាំង៤០ផ្ទាំងនេះ ជាបណ្តុំសមុច្ច័យដ៏សំខាន់ដែលបានឆ្លុះបញ្ចាំងពីភាពសម្បូរបែបនៃការបន្តមរតកបេតិកភណ្ឌអរូបីនៃវិស័យតម្បាញខ្មែរនារយៈពេលជាងមួយសតវត្សរ៍កន្លងមកនេះ។ ក្បាច់លម្អដែលមាននៅលើផ្ទាំងសូត្របានរំលេចពីទិដ្ឋភាពទូទៅនៃជីវភាពប្រចាំថ្ងៃនិងជំនឿនានាដែលខ្មែរគោរពប្រតិបត្តិ ជាពិសេសគឺផ្ទាំងរឿងទាក់ទងនឹងពុទ្ធប្រវត្តិ»។

តាមរយៈការប្រគល់ជូននេះ សារមន្ទីរជាតិ សង្ឃឹមថាសាធារណជន នឹងពិនិត្យលទ្ធភាពនៃការប្រគល់សមុច្ច័យផ្សេងៗទៀតមកសារមន្ទីរទុកជាសម្បត្តិជាតិ ដូចដែលក្រុមការងារជប៉ុននេះបានធ្វើនាថ្ងៃនេះ ដ្បិតសមុច្ច័យទាំងនោះ នឹងក្លាយទៅជាឯកសាររស់សម្រាប់ការផ្សព្វផ្សាយ និងសិក្សាឈ្វែងយល់មរតកអរូបីដែលដូនតាខ្មែរបានបន្សល់ទុក។

សូមជម្រាបថា លោកស្រី Harumi Sekiguchi ក្រុមការងារជប៉ុនដែលបានជូនហូលនេះទៅក្រួងវប្បធម៌ពេលនេះ ក៏ធ្លាប់ប្រគល់ហូលពិតានទៅសារមន្ទីរជាតិកម្ពុជាចំនួន២លើករួចហើយកាលពីឆ្នាំ២០១៤ ពោល គឺ លើកទី១ ចំនួន ២៣ផ្ទាំង និង លើកទី២សរុបចំនួន ២ផ្ទាំង៕