ឯកអគ្គរាជទូចអង់គ្លេស រំភើបចិត្តពេលបានឃើញ កណ្ដុរ និងសុនកដោះមីនកម្ពុជា

លោក Dominic Williams ឯកអគ្គរាជទូតអង់គ្លេសប្រចាំកម្ពុជា មានទឹកចិត្តរំភើប នៅពេលបានឃើញ សត្វកណ្ដុរ និងសុខក (ឆ្កែ) ដោះមីន នៅថ្ងៃទី១៩ ខែឧសភា ឆ្នាំ២០២៣នេះ។

លើបណ្ដាញសង្គមផ្ទាល់ខ្លួន លោក Dominic Williams លើកឡើងថា លោកបានមកខេត្តព្រះវិហារ សម្រាប់ការចាប់ផ្តើមនៃគម្រោងថ្មីរបស់អង្គការ APOPO’s HeroRATs ដើម្បីទាក់ទាញការគាំទ្រពីវិស័យឯកជនសម្រាប់សកម្មភាពដោះមីន។

លោក Dominic Williams បានបញ្ជាក់បន្ថែមថា៖ “លើស​ពី​នេះ​ទៀត ខ្ញុំ​រំភើប​ចិត្ត​ដែល​បាន​ឃើញ​សត្វ​កណ្ដុរ និង​ឆ្កែ​ដ៏​អស្ចារ្យ​ដែល​ជួយ Apopo ជម្រះ​វាល​មីន!”។

លោក Dominic Williams បានលើកឡើងថា ចក្រភពអង់គ្លេសគាំទ្រផែនការរបស់រដ្ឋាភិបាលកម្ពុជា សម្រាប់ប្រទេសកម្ពុជាគ្មានមីននៅឆ្នាំ២០២៥ ហើយចក្រភពអង់គ្លេសកំពុងផ្តល់ជំនួយផ្នែកហិរញ្ញវត្ថុដល់គម្រោងនេះ។

លោក Dominic Williams បញ្ជាក់បន្ថែមថា៖ “យើង​សង្ឃឹម​ថា វា​នឹង​ជួយ​ដល់​ការ​អភិវឌ្ឍ និង​ជីវភាព​កាន់​តែ​ប្រសើរ​សម្រាប់​ប្រជាជន​ខេត្ត​ព្រះវិហារ។ គម្រោងប្រភេទថ្មី​របស់ Apopoនេះ ជា​គម្រោងប្រភេទដំបូង​បង្អស់។ បើទទួលបានជោគជ័យ ប្រទេសដទៃអាចធ្វើតាមគំរូរបស់កម្ពុជា!”។

គួរបញ្ជាក់ថា លោក Dominic Williams អាចនិយាយភាសាខ្មែរ ហើយជារឿយៗលោកតែងបង្ហាញចំណាប់អារម្មណ៍ស្រឡាញ់ខ្មែរ ទាំងអាហារ និងសម្ភារប្រើប្រាស់ផ្សេងៗ។ លោកចង់ឱ្យប្រជាជនកម្ពុជាចងចាំលោកជាអគ្គរាជទូតដែលស្រឡាញ់កម្ពុជា ហើយដែលធ្វើការលើប្រធានបទដែលមានសារៈសំខាន់សម្រាប់ប្រជាជនកម្ពុជា។   

សម្រាប់ការបំពេញការងារនៅកម្ពុជាពេលនេះ លោកអគ្គរាជទូតនិយាយថា គោលដៅផ្ទាល់ទី១ របស់លោក គឺចង់ពង្រឹងទំនាក់ទំនងពាណិជ្ជកម្ម និងសេដ្ឋកិច្ចប្រទេសទាំង២ គោលដៅទី២ លោកចង់គាំទ្រសិទ្ធិប្រជាជនទាំងអស់ ពិសេសកុមារ ស្រ្តី អ្នកស្រឡាញ់ភេទដូចគ្នា ជនជាតិភាគតិច និងជនពិការ៕

អត្ថបទ៖ ច័ន្ទ វីរៈ