សម្ដេចតេជោ ហ៊ុន សែន ៖ នយោបាយចិននាពេលនេះ មិនមានការប្រកាសធ្វើសត្រូវជាមួយប្រទេសណាមួយនោះទេ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា លើកឡើងថា បើទោះបីជាមានប្រទេសខ្លះរិះរកវិធីប្រឆាំងចិន តែចិនមិនមានប្រកាសធ្វើសត្រូវជាមួយនឹងប្រទេសណាមួយនោះទេ។

ការលើកឡើងរបស់សម្ដេតេជោ ហ៊ុន សែន បានធ្វើឡើងក្នុងពិធីសំណេះសំណាលជាមួយកម្មករ-និយោជិត ទស្សនាពិព័រណ៍សមិទ្ធផល និងពិធីសម្ពោធដាក់ឲ្យដំណើរការរោងចក្រផលិតសំបកកង់ ដើម្បីអបអរសាទរខួបលើកទី ១០ នៃគំនិតផ្តួចផ្តើមខ្សែក្រវ៉ាត់មួយ ផ្លូវមួយ នៅតំបន់សេដ្ឋកិច្ចពិសេស ក្រុងព្រះសីហនុ នៅព្រឹកថ្ងៃទី ២២ ខែឧសភា ឆ្នាំ ២០២៣នេះ។

សម្ដេចតេជោ ហ៊ុន សែន បានថ្លែងថា នយោបាយរបស់ប្រទេសចិននាពេលនេះ មិនមានប្រកាសធ្វើសត្រូវជាមួយនឹងប្រទេសណាមួយនោះទេ ទោះបីជាមានប្រទេសខ្លះ បានរិះរកវិធីរារាំង និងប្រឆាំងចិនក៏ដោយ។

សម្ដេចតេជោ ហ៊ុន សែន ថ្លែងបែបនេះថា «យើងពិនិត្យមើលនយោបាយរបស់ចិននៅពេលនេះ មិនមានការប្រកាសធ្វើជាសត្រូវជាមួយប្រទេសណាទេ ទោះបីអ្នកដទៃបានរកវិធីរារាំងចិន ឬប្រឆាំងចិន ក៏ប៉ុន្តែចិនមិនដែលដាក់ចេញ នូវគោលនយោបាយរារាំង ឬក៏ធ្វើជាសត្រូវជាមួយប្រទេសណាទេ»។

បើតាមសម្ដេចតេជោ ហ៊ុន សែន ដោយសារនយោបាយរបស់ចិនបែបនេះហើយ ទើបធ្វើឲ្យគំនិតផ្តួចផ្តើមខ្សែក្រវ៉ាត់មួយ ផ្លូវមួយ ចេះតែរីកចម្រើនទៅមុខ៕