ពលរដ្ឋក្នុងភូមិវត្តតាមិម រីករាយក្រោយទទួលបានផ្លូវបេតុងមួយខ្សែ

ផ្លូវបេតុងមួយខ្សែដែលមានប្រវែងប្រមាណជិត២០០០ម៉ែត្រ ត្រូវបានស្ថាបនាឡើងដោយរដ្ឋបាលខេត្ត និងមន្ទីរសាធារណការ និងដឹកជញ្ជូនខេត្ត ដើម្បីអោយប្រជាពលរដ្ឋបានធ្វើដំណើរ។

ថ្មីៗនេះមន្ទីរសាធារណការ និងដឹកជញ្ជូនខេត្ត បានដាក់កម្លាំងចុះរៀបចំចាក់បេតុងលើផ្លូវមួយខ្សែ ចាប់ពីក្បាលស្ពានរថភ្លើង រហូតដល់ស្ពានផ្សារខ្វែង ស្ថិតក្នុងភូមិវត្តតាមិម ឃុំអូរដំបង១ ស្រុកសង្កែ ដែលមានទទឹង៧ម៉ែត្រ និងបណ្តោយជិត២.០០០ម៉ែត្រ ដែលកន្លងមកផ្លូវនេះ មានការលំបាកខ្លាំងក្នុងការធ្វើដំណើរ ដោយសារតែជង្ហុក និងដីភក់ច្រើន។

បច្ចុប្បន្នគេសង្កេតឃើញថា នៅក្នុងក្រុងបាត់ដំបងទាំងមូលក៏មានការជួសជុល និងស្ថាបនាផ្លូវជាច្រើនខ្សែផងដែរ និងដាក់បង្កប់លូខ្នាតធំបន្ថែម ដោយសារតែផ្លូវចាស់ៗមានសភាពទ្រុឌទ្រោម។

រាល់ទង្វើរបស់អាជ្ញាធរខេត្ត បានធ្វើអោយប្រជាពលរដ្ឋក្នុងភូមិវត្តតាមិមមានការរំភើបរីករាយ ក្រោយពីពួកគាត់ទទួលបានផ្លូវមួយខ្សែនេះ ងាយស្រួលក្នុងការធ្វើដំណើរប្រចាំថ្ងៃ ៕

អត្ថបទ៖ សោ និយមរ័ត្ន