រាជរដ្ឋាភិបាល នឹងមិនដកបណ្ណក្រីក្រពីពលរដ្ឋវិញ​ដោយសារនិន្នាការនយោបាយទេ

ក្រសួងសង្គមកិច្ចអតីតយុទ្ធជន និងយុវនីតិសម្បទា បានអះអាងថា រដ្ឋាភិបាលនឹងមិនធ្វើការដកហូតបណ្ណក្រីក្រ និងបញ្ឈប់ការបើកប្រាក់ដល់គ្រួសារទទួលផលពីកម្មវិធីឧបត្ថម្ភសាច់ប្រាក់ ដោយសារការប្រកាន់និន្នាការ​នយោបាយដូចការលើកឡើងរបស់បក្សនយោបាយ ឬជនឆបោកមួយចំនួននោះទេ។

នៅក្នុងសេចក្តីប្រកាសព័ត៌មានរបស់ក្រសួងសង្គមកិច្ចអតីតយុទ្ធជន និងយុវនីតិសម្បទាចុះថ្ងៃទី២៤ឧសភាបានឱ្យដឹងថា ការលើកឡើងបែបនេះ មានគោលបំណងចង់ឱ្យបងប្អូនប្រជាជន ជាពិសេសគ្រួសារអ្នកទទួលផល​ពីកម្មវិធីបើក​សាច់ប្រាក់ឧបត្ថម្ភជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំកូវីដ-១៩ មានការភ័យខ្លាច និងខឹងសម្បារជាមួយនឹងក្រុមប្រឹក្សាឃុំសង្កាត់ ដែលកំពុងដឹកនាំបច្ចុប្បន្ន ឬរាជរដ្ឋាភិបាលកម្ពុជា។

ជាមួយគ្នានេះដែរ ក្រសួងសូមឱ្យប្រជាជនទាំងអស់ កុំចាញ់បោកជនខិលខូចមួយចំនួនដែលបានដើរឃោសនា​បោកប្រាស់ថា ក្នុងករណីប្រជាជនចង់បានបណ្ណក្រីក្រ ដើម្បីទទួលបានប្រាក់ឧបត្ថម្ភពីសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ១៩នោះ តម្រូវឲ្យគ្រួសារក្រីក្រត្រូវបង់ប្រាក់ដែលទង្វើខាងលើនោះ មិនត្រឹមត្រូវនោះឡើយ ព្រោះការផ្ដល់បណ្ណក្រីក្រត្រូវបានធ្វើឡើងតាមនីតិវិធីនៃការកំណត់អត្តសញ្ញាណ​កម្មគ្រួសារ​ក្រីក្ររបស់ក្រសួងផែនការ ដោយមិនមានការរើសអើងនិន្នាការនយោបាយ និងយកកម្រៃណាមួយនោះឡើយ គឺប្រកបដោយអភិក្រមជាមន្ត្រីបម្រើរាស្ត្រ។

ទន្ទឹមនឹងនេះ ក្រសួងសូមឱ្យអ្នកទទួលផលទាំងអស់ ប្រើប្រាស់ថវិកាដែលទទួលបានពីកម្មវិធីឲ្យបានត្រឹមត្រូវ​ដោយជៀសវាងការប្រើប្រាស់​ក្នុងគោលបំណងបម្រើឲ្យអបាយមុខផ្សេងៗ ដែលនាំឲ្យប៉ះពាល់ដល់​ការអនុវត្តគោលនយោបាយរបស់រាជរដ្ឋាភិបាលក្នុងការផ្ដល់ការអន្តរាគមន៍ជំនួយសង្គមជាសាច់ប្រាក់។

ក្នុងករណីពិនិត្យរកឃើញមានអ្នកទទួលផលដែលប្រើប្រាស់ខុសគោលដៅបែបនេះ ស្នើឲ្យអាជ្ញាធរមូលដ្ឋាន​ធ្វើការអប់រំដល់អ្នកទទួលផលទាំងនោះ ជាលាយលក្ខណ៍អក្សរបើក្នុងករណីអ្នកទទួលផលទាំងនោះ នៅមិនរាងចាល​នោះទេមេឃុំចៅសង្កាត់ត្រូវធ្វើការប្រជុំពិភាក្សាជាមួយក្រុមប្រឹក្សាក្នុងការធ្វើបច្ចុប្បន្នភាពបណ្ណក្រីក្រនោះឡើងវិញ។

លើសពីនេះទៀត ក្រសួងបានស្នើសុំគ្រួសារក្រីក្រ និងងាយរងគ្រោះទាំងអស់ត្រូវបន្តគោរពនូវវិធាន​ការរបស់រាជ​រដ្ឋាភិបាល​ក្នុងការបង្ការ និងទប់ស្កាត់ការរីករាលដាលដោយអនុវត្តនូវវិធានការ៣កុំ៣ការពារនៅគ្រប់ទីកន្លែង បើទោះបីជាស្ថានភាពឆ្លងជំងឺកូវីដ១៩ មានសភាពល្អប្រសើរយ៉ាងណាក៏ដោយ និងចូលរួមចាក់វ៉ាក់សាំង​ឲ្យបានគ្រប់គ្នាៗតាមការកំណត់របស់រដ្ឋាភិបាលដើម្បីធានាបាននូវការកាត់ផ្ដាច់ខ្សែចង្វាក់នៃការឆ្លងជំងឺកូវីដ១៩ និងរស់នៅក្នុងគន្លងនៃបរិបទថ្មី។

គួរបញ្ជាក់ថា ចាប់តាំងពីថ្ងៃទី ២៥ខែ មិថុនាឆ្នាំ ២០២០ រហូតមកដល់ថ្ងៃទី២៤ខែឧសភាឆ្នាំ២០២៣នេះ រដ្ឋាភិបាល​បានបើកសាច់ប្រាក់ឧបត្ថម្ភជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំកូវីដ១៩ បានចំនួន១៣ជុំ មាន៣៥លើក ដែលមានទឹកប្រាក់ចំនួន៤២២៧០៤៧៤៣១០០០រៀល(បួនពាន់ពីររយម្ភៃប្រាំពីរប៊ីលាន​សែសិបប្រាំពី​លានបួនរយសាមសិបមួយពាន់គត់) ឬស្មើនឹងប្រមាណ១០៥៦,៧៦លានដុល្លារអាមេរិកដោយមានប្រជាពលរដ្ឋចំនួន ៧០៤៥៣៥គ្រួសារ ដែលមានសមាជិកចំនួន ២៧៨២២១១នាក់៕

អទ្ថបទ៖ សំអឿន