ជប៉ុន គ្រោងបើកកសិដ្ឋានដាំម្ទេសស្តង់ដារនៅសៀមរាប សម្រាប់នាំចេញទៅទីផ្សារអន្តរជាតិ

ប្រធានកសិដ្ឋានដាំបន្លែស្តង់ដារនៃប្រទេសជប៉ុន គ្រោងបើកកសិដ្ឋានដាំម្ទេសស្តង់ដារជប៉ុន លើផ្ទៃដី ៧២ហិកតា ក្នុងស្រុកអង្គរធំ ខេត្តសៀមរាប ដើម្បីនាំចេញផលិតផលម្ទេសដែលមានស្ដង់ដារ ទៅកាន់ទីផ្សារអន្តរជាតិ ក៏ដូចជាដើម្បីឱ្យបរទេសស្គាល់កាន់តែច្បាស់ពីផលិតផលដែលដាំតាមស្តង់ដារបច្ចេកទេសនៅកម្ពុជា។

លោក ណា​បេ​ស៊ី​ម៉ា កា​ស៊ូ​ហ៊ី​តុ បានឱ្យដឹងបន្តទៀតថា កសិដ្ឋានដាំម្ទេសស្តង់ដារជប៉ុន ដែលគ្រោងនឹងសាងសង់នេះ គឺជាបច្ចេកទេសថ្មី ហើយនឹងបានផលច្រើន និងជាគំរូមួយសម្រាប់កសិកម្មនៅក្នុងស្រុកផងដែរ ខណៈបច្ចុប្បន្ននេះ​មានអ្នកបញ្ជាទិញ ក្នុងមួយខែរហូតដល់ ៥០០តោនជារៀងរាល់ខែ ហើយផែនការនេះមិនមែនលក់នៅក្នុងស្រុកនោះទេ គឺនាំចេញទៅក្រៅប្រទស។

ប្រធានកសិដ្ឋានដាំបន្លែស្តង់ដារជប៉ុន បានបញ្ជាក់ថា ^«ចំពោះការដាំដំណាំម្ទេសនេះដែរ សម្រាប់ពលរដ្ឋដែលមាន​ដីសម្រាប់ដាំដំណាំ លោកសន្យាបង្រៀនទាំងផ្នែកបច្ចេកទេស ផ្តល់ពូជ និងទទួលទិញនៅផលដំណាំ​របស់ប្រជា​កសិករ^»។

លោក ណា​បេ​ស៊ី​ម៉ា កា​ស៊ូ​ហ៊ី​តុ បន្ថែមថា ^«កសិដ្ឋានមួយនេះ ទៅថ្ងៃអនាគតវានឹងបង្ហាញឲ្យពិភពលោកដឹងថា ផលិតផលដែលផលិតនៅក្នុងប្រទេសកម្ពុជាគឺជាផលិតផលដែលមានគុណភាពខ្ពស់ ហើយពិភពលោកនឹង​ទទួលស្គាល់ផលិផលរបស់កម្ពុជាដែលដាំតាមស្តង់ដារបច្ចេកទេស^»។

អ្វីដែលកាន់តែពិសេសជានេះទៅទៀតនោះ គឺពេលចាប់ផ្ដើមផលិតបាន យើងក៏ចាប់ផ្ដើមកែច្នៃខ្នាតតូចមួយទៀត​ទៅជាគ្រឿងទេសនៅក្នុងប្រទេសកម្ពុជា ក៏ដូចជាប្រទេសអាស៊ាន គឺចូលចិត្តញ៉ាំស៊ុប ដូច្នេះពួកយើងនឹងកែច្នៃទឹក​ម្ទេសមួយ​ដែលជាប្រភេទម្ទេសកសិកម្មដាំនៅក្នុងទឹកដីខេត្តសៀមរាបផ្ទាល់តែម្ដង។

ដើម្បីទទួលបានការផលិតទ្រង់ទ្រាយធំបែបនេះ ក៏ដូចជាការផ្សព្វផ្សាយទាក់ទាញទីផ្សារពិភពលោកឱ្យបានឃើញ ប្រទេសកម្ពុជាដែលអាចផលិតបាននៅផលិតផលដែលមានស្តង់ដារ ពេលនោះនឹងអាចទាក់ទាញនៅភ្ញៀវទេសចរណ៍ និងវិនិយោគគិនធំៗផ្សេងៗទៀត មកវិនិយោគនៅក្នុងទឹកដីខេត្តសៀមរាបកាន់តែច្រើន។

លោក ណា​បេ​ស៊ី​ម៉ា កា​ស៊ូ​ហ៊ី​តុ ក៏សង្ឃឹមថា កសិដ្ឋាននេះ នឹងក្លាយជាគំរូមួយដើម្បីឲ្យប្រជាកសិករ ដែលចង់ដាំម្ទេសអាចទៅសិក្សាស្រាវ និងរៀនសូត្រពីកសិដ្ឋានបាន។ លោកក៏ជឿជាក់ថា ពេលដែលកសិដ្ឋាន​នេះបានដំណើរការនឹងមានអ្នកបញ្ជាទិញផ្សេងៗទៀតកាន់តែច្រើនថែមទៀត។

ជាមួយគ្នានេះ លោក សោម សមស័ក្ក នាយកទីចាត់ការហិរញ្ញវត្ថុខេត្តសៀមរាប និងក្រុមការងារបានដឹកនាំក្រុម​វិនិយោគិន​ជនជាតិជប៉ុន ចុះទៅពិនិត្យទីតាំងគ្រោងបើកកសិដ្ឋានដាំម្ទេសស្តង់ដារជប៉ុន ស្ថិតក្នុងភូមិត្រពាំងទូក ឃុំជប់តាត្រាវ ស្រុកអង្គរធំ ខេត្តសៀមរាប កាលពីថ្ងៃទី១០ ខែមិថុនា ឆ្នាំ២០២៣ ។

លោក ពៅ ប៊ុនធឿន អភិបាលស្រុកអង្គរធំ ថ្លែងបានកោតសរសើរចំពោះលោក សោម សមស័ក្ក ដែលបាននាំអ្នក​វិនិយោគផ្នែកកសិកម្ម ឱ្យមកវិនិយោគក្នុងមូលដ្ឋានរបស់លោក និង ថ្លែងអំណរគុណដល់លោក NABESHIMA KATSUHITO ប្រធានកសិដ្ឋានដាំបន្លែស្តង់ដារជប៉ុន ដែលបានមកវិនិយោគនៅក្នុងស្រុកអង្គរធំខេត្តសៀរាប លោកសង្ឃឹមថា កសិដ្ឋាននេះ និងជួយបណ្តុះបណ្តាលដល់ប្រជាកសិករ អោយមានជំនាញតាមបច្ចេកទេស និងមានការងារធ្វើរបានកាន់តែច្រើនថែមទៀតផងដែរ៕

អត្ថបទ៖ ផល​ ធារិត