ឧកញ៉ា សំ សុខនឿន៖ ពលរដ្ឋមួយចំនួន​យល់ថា អចលនទ្រព្យនឹងជាប់គាំង តែខ្ញុំគិតខុស​ពីគេបន្តិច

ស្របពេលដែលប្រជាពលរដ្ឋមួយចំនួន កំពុងមានការព្រួយបារម្ភអំពីទីផ្សារអចលនទ្រព្យនៅកម្ពុជា មានអ្នកជំនួញផ្នែកនេះខ្លះ បានមើលឃើញពីសក្តានុពល និងអំណាចនៃផលចំណេញរយៈពេលវែង ក៏កំពុងតែប្រមូលទិញដីធ្លីជាបន្តបន្ទាប់។

អ្នកវិនិយោគអចលនទ្រព្យ ឬបងប្អូនខ្មែរយើងមួយចំនួនយល់ឃើញថា អចលនទ្រព្យនឹងជាប់គាំង តែខ្ញុំគិតខុសពី​គេបន្តិចហើយមើលទៅ។ នេះជាប្រយោគដែលសរសេរដោយលោកឧកញ៉ាវ័យក្មេង សំ សុខនឿន ប្រធាន​សមាគមអចលនទ្រព្យសកល និង​ជា​ប្រធាន​ក្រុមហ៊ុន Sam SN Realty ។

លោកឧកញ៉ា សំ សុខនឿន បានសរសេរនៅលើហ្វេសប៊ុកផ្លូវការដូច្នេះថា« ខ្ញុំសម្រេចចិត្តទិញដីទំហំ 15.5 ហិកតា កាលពីខែមិថុនា ឆ្នាំ២០២៣នេះ ក្នុងតម្លៃ $10/m2 ដោយរង់ចាំរយៈពេល ៥ឆ្នាំក្រោយ ឬ៧ឆ្នាំក្រោយ, តើ៥ឆ្នាំក្រោយ ឬ៧ឆ្នាំក្រោយ ដីនេះនឹងមានតម្លៃប៉ុន្មាន?

មូលហេតុដែលលោកឧកញ៉ា សំ សុខនឿន ហ៊ានសម្រេចចិត្តវិនិយោគលើអចលនទ្រព្យនាពេលនេះ និងសន្និដ្ឋាន​ពីសញ្ញាណវិជ្ជមាន រយៈពេល ៥ទៅ ៧ឆ្នាំខាងមុខ ដោយសារហេតុផលបី រួមមាន ៖ ទី១. កម្ពុជា ជាប្រទេស​បន្តការរីកចម្រើនយ៉ាងឆាប់រហ័ស តម្លៃដីបន្តឡើងជាខ្លាំង។ ទី២. ភ្នំពេញបន្តរីកជារៀងរាល់ឆ្នាំ ហេដ្ឋារចនា​សម្ព័ន្ធបន្តសាងសង់រៀងរាល់ថ្ងៃ, និងទី៣. ការទិញនេះមានតម្លៃទាប បើធៀបនឹងទីក្រុងភ្នំពេញពេលនេះ។

ជាការកត់សម្គាល់ប្រធានសមាគមអចលនទ្រព្យសកលលោកឧកញ៉ា សំ សុខនឿន តែងតែធ្វើការវិនិ​យោគ​តាមអ្វីដែលលោកបានព្យាករណ៍ ដោយសម្រេចបានជោគជ័យជានិច្ច។

ភ្ជាប់ជាមួយនឹងការលើកឡើងរបស់លោកឧកញ៉ា សំ សុខនឿន នាពេលថ្មីៗនេះ លោក វង្សី វិស្សុត រដ្ឋមន្ត្រីប្រតិ​ភូអមនាយករដ្ឋមន្ត្រី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានលើកឡើងថា វដ្តនៃវិបត្តិសេដ្ឋកិច្ច តែងតែកើតឡើងនារយៈពេល ១០ឆ្នាំម្តង។ លោកបានកត់សម្គាល់ថា នៅពេលដែលសេដ្ឋកិច្ចងើបឡើង​ដល់ចំណុច​មួយដែលខ្ពស់បំផុត នឹងធ្លាក់ចុះមកវិញដល់ចំណុចសូន្យ ដែលបញ្ហានេះកើតឡើងរវាង ១០ឆ្នាំម្តង។ ជាក់ស្តែងនៅក្នុង​អំឡុងវិបត្តិឆ្នាំ ២០០៨ ដែលគ្រប់យ៉ាងកំពុងរីកចម្រើន ស្រាប់តែមានវិបត្តិហិរញ្ញវត្ថុកើតឡើងយ៉ាងទាន់ហន់។ វិបត្តិនេះត្រូវបានគេមើលឃើញថា កើតឡើងដោយសារតែអ្នកប្រើប្រាស់ និងអ្នកមានប្រាក់ មានគំនិតសុទិដ្ឋិនិយម​ច្រើនជ្រុលលើកំណើនសេដ្ឋកិច្ចអាមេរិក ដែលកំពុងតែបោះពួយយ៉ាងលឿន ហើយធនាគារ ក៏ចាប់ផ្តើមបង្ហូរឥណទាន​លើសលប់ ដែលច្រើនរហូតដល់ធនាគារខ្លួនឯង ត្រូវក្ស័យធនបិទទ្វារជាបន្តបន្ទាប់។

បន្ទាប់ពីធ្លាក់ដល់ចំណុចអស់កន្លែងធ្លាក់ សេដ្ឋកិច្ច ក៏ចាប់ផ្តើមងើបឡើងវិញខ្ពស់បំផុតនៅឆ្នាំ ២០១៨-២០១៩។ ប៉ុន្តែត្រឹមតែរយៈពេល ១០ឆ្នាំប៉ុណ្ណោះ វិបត្តិកូវីដ-១៩ បានបំផ្លាញកំណើនសេដ្ឋកិច្ចដែលកំពុងលូតលាស់នេះរាបដល់ដី។

ទោះយ៉ាងណា កំណើនសេដ្ឋកិច្ចកម្ពុជា បានងើបឡើងវិញយ៉ាងសន្សឹមៗ ក្រោយរាជរដ្ឋាភិបាល បានទប់ស្កាត់ការ​ឆ្លងរាលដាលជំងឺកូវីដ-១៩ ធ្វើឱ្យគ្រប់ផ្នែកទាំងអស់មានសន្ទុះល្អប្រសើរ។

ដូចអ្វីដែលលោកឧកញ៉ា​ សំ សុខនឿន ធ្វើការព្យាករខាងលើរយៈពេល ៥-៧ឆ្នាំទៀត ស្ថានភាពវិស័យអចលនទ្រព្យ​អាចនឹងមានទីផ្សារល្អ ស្របពេលដែលសេដ្ឋកិច្ចក៏នឹងមានកំណើនខ្ពស់ផងដែរ៕