សម្ដេចតេជោ ហ៊ុន សែន ទទួលបានរូបថតមួយសន្លឹករបស់សម្ដេច ដែលថតដោយអ្នកយកព័ត៌មានបរទេស កាលពីឆ្នាំ ១៩៩៣

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ទទួលបានរូបថតមួយសន្លឹករបស់សម្ដេច ដែលត្រូវបានថតដោយអ្នកយកព័ត៌មានបរទេស កាលពីឆ្នាំ ១៩៩៣។ សម្ដេចតេជោ ហ៊ុន សែន មិនដែលបានឃើញរូបថតមួយសន្លឹកនោះទេ កាលពីកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចតេជោ ហ៊ុន សែន បានសរសេរនៅលើបណ្ដាញសង្គមតេលេក្រាម នៅល្ងាចថ្ងៃទី ៤ ខែកក្កដា ឆ្នាំ ២០២៣នេះថា កាលពីព្រឹកមិញ សម្ដេច បានទៅចូលរួមកម្មវិធីមង្គលការកូនស្រីរបស់លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ដែលនៅទីនោះ សម្ដេច បានទទួលរូបថតមួយសន្លឹក ដែលសម្ដេចមិនដែលបានឃើញពីមុនមកឡើយ។

បើតាមសម្ដេចតេជោ ហ៊ុន សែន រូបថតនេះ ត្រូវបានថតដោយអ្នកយកព័ត៌មានបរទេស កាលពីថ្ងៃទី ២៤ ខែឧសភា ឆ្នាំ ១៩៩៣ នៅពេលដែលសម្ដេច និងភរិយាទៅបោះឆ្នោតនៅរួមខេត្តកំពង់ចាម ដែលកាលពេលណោះ គឺការបោះឆ្នោតរៀបចំដោយអ៊ុនតាក់។

សម្ដេចតេជោ ហ៊ុន សែន បានឲ្យដឹងបន្តថា រូបថតនេះត្រូវបានដាក់ដេញថ្លៃនៅប្រទេសបារាំង ដែលលោកស្រី ឆេង និព័ន្ធ កូនស្រីរបស់លោកស្រី ភឿង សកុណា ដេញថ្លៃបាន និងយកមកប្រគល់ឲ្យសម្ដេច នៅថ្ងៃរៀបការរបស់ខ្លួន។

សម្ដេចតេជោ ហ៊ុន សែន បានសរសេរបន្តថា «ខ្ញុំ និងភរិយាសូមអរគុណក្មួយស្រី ឆេង និព័ន្ធ និងស្វាមីដែលបានខិតខំចំណាយកម្លាំង និងថវិកាដេញថ្លៃទិញ យករូបថតដ៏កម្រនេះប្រគល់ឲ្យខ្ញុំ។ បើគិតពីឆ្នាំ ១៩៩៣ មកដល់ឆ្នាំ ២០២៣ មានរយៈពេល ៣០ឆ្នាំគត់ ដែលពេលនោះ ខ្ញុំមានអាយុ ៤១ឆ្នាំ ឯភរិយាខ្ញំមានអាយុ ៣៩ឆ្នាំ»៕