ព័ត៌មានជាតិ

ឯកឧត្ដម ហ៊ុន ម៉ានី ៖ «បោះឆ្នោតជូនគណបក្សប្រជាជនកម្ពុជា គឺ បោះឆ្នោតការពារអត្ថប្រយោជន៍របស់យើង និងក្រុមគ្រួសារយើង»

បានផុស

៣ years មុន

នៅ

ថ្ងៃសុក្រ ២១ កក្កដា ២០២៣

ដោយ

ឯកឧត្ដម ហ៊ុន ម៉ានី អនុប្រធានទី ១ នៃក្រុមការងារគណបក្សចុះជួយខេត្តកំពង់ស្ពឺ និងជាអ្នកតំណាងរាស្ត្រមណ្ឌលកំពង់ស្ពឺ បានលើកឡើងថា នៅថ្ងៃទី ២៣ ខែកក្កដា ឆ្នាំ ២០២៣ខាងមុខ ប្រជាពលរដ្ឋខ្មែរ ដែលមានឈ្មោះក្នុងបញ្ជីបោះឆ្នោត នឹងអញ្ជើញទៅបោះឆ្នោតជ្រើសតាំង តំណាងរាស្រ្ដ នីតិកាលទី ៧ទាំងអស់គ្នា ហើយ «បោះឆ្នោតជូនគណបក្សប្រជាជនកម្ពុជា គឺ បោះឆ្នោតការពារអត្ថប្រយោជន៍របស់យើង និងក្រុមគ្រួសារយើង»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅលើទំព័រហ្វេសប៊ុកនាព្រឹកថ្ងៃទី ២១ ខែកក្កដានេះ ឯកឧត្ដម ហ៊ុន ម៉ានី បានមានប្រសាសន៍ថា ក្នុងនាមអ្នកគាំទ្រគណបក្សប្រជាជនកម្ពុជា ដែលបានមើលឃើញ និងយល់ច្បាស់ពីការដឹកនាំ ទស្សនវិស័យ និងគោលនយោបាយរបស់គណបក្សក្នុងការដឹកនាំប្រទេសជាតិឆ្ពោះទៅរកត្រើយសន្តិភាព សូមប្រជាពលរដ្ឋខ្មែរទាំងអស់ បោះឆ្នោតជូនគណបក្សប្រជាជនកម្ពុជា ដែលមានលេខរៀងទី ១៨ និងមានរូបសញ្ញាទេវតាបាចផ្កាជាសម្គាល់។

ឯកឧត្ដម ហ៊ុន ម៉ានី គូសបញ្ជាក់ថា «បោះឆ្នោតជូនគណបក្សប្រជាជនកម្ពុជា គឺ បោះឆ្នោតការពារអត្ថប្រយោជន៍របស់យើង និងក្រុមគ្រួសារយើង»។ ឯកឧត្ដម ហ៊ុន ម៉ានី គូសបញ្ជាក់ទៀតថា «ថ្ងៃទី ២៣ ខាងមុខនេះ បងប្អូនប្រជាពលរដ្ឋទាំងអស់ នឹងចេញទៅបោះឆ្នោតដើម្បីជ្រើសរើសតំណាង ដែលខ្លួនគិតថា អាចផ្ញើជោគវាសនាប្រទេសជាតិលើបាន តាមរយៈសន្លឹកឆ្នោតមួយសន្លឹករបស់ខ្លួន»។

ឯកឧត្ដម ហ៊ុន ម៉ានី បន្ថែមថា ព្រឹកនេះ សមាជិក សមាជិកា គណបក្សប្រជាជនកម្ពុជាគ្រប់ទិសទី បានមូលមីជួបជុំ បង្ហាញទឹកចិត្ត និងការប្ដេជ្ញាចិត្តក្នុងការបន្តគាំទ្រគណបក្សប្រជាជនកម្ពុជា និងធានារក្សាបានជ័យជម្នះក្នុងការបោះឆ្នោតជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣។ សម្រែកហ៊ោបន្ទរតាមជ័យឃោសនារបស់កងទ័ពទេវតា បង្ហាញពីស្មារតីគាំទ្រ ស្រលាញ់ និងជឿជាក់ ប្រកបដោយភាពស្វាហាប់មកលើការដឹកនាំរបស់គណបក្សប្រជាជន។

ជាមួយគ្នានេះ ឯកឧត្ដម ហ៊ុន ម៉ានី ក៏បានថ្លែងអំណរគុណ និងកោតសរសើរ ចំពោះសមាជិក សមាជិកាគណបក្សប្រជាជនកម្ពុជាគ្រប់រូប ដែលបានយកអស់កម្លាំងកាយ ចិត្ត ចូលរួមក្នុងយុទ្ធនាការរកសំឡេងឆ្នោតជូនគណបក្សក្នុងរយៈពេល ២០ ថ្ងៃ កន្លងទៅនេះ៕

អត្ថបទ ៖ ពិសី