សម្តេចតេជោ ហ៊ុន សែន សម្រេចរក្សាទុកមន្ត្រីទាំងអស់​សម្រាប់អាណត្តិថ្មី កែទម្រង់តែរដ្ឋមន្រ្តី​តាមស្ថាប័នមួយចំនួនតែប៉ុណ្ណោះ

សម្តេចតេជោ ហ៊ុន សែន នាយករដ្ឋមន្រ្តី បានបញ្ជាក់ថា មន្ត្រីក្នុងអាណត្តិចាស់ជារដ្ឋលេខាធិការ អនុរដ្ឋលេខាធិការ ឬទីប្រឹក្សារាជរដ្ឋាភិបាល ដែលបានតែងតាំងរួចមកហើយ​ ត្រូវរក្សាឋានៈ តួនាទីដដែល មានតែរដ្ឋមន្ត្រីប្រតិភូអម​នាយករដ្ឋមន្ត្រី និងរដ្ឋមន្រ្តីតាមស្ថាប័នមួយចំនួនតែប៉ុណ្ណោះ ដែលមានការកែទម្រង់។ សម្តេចតេជោ លើកឡើងបែបនេះ តាមរយៈសារជាសំឡេង នៅព្រឹកថ្ងៃទី ២៩ ខែ កក្កដា ឆ្នាំ ២០២៣។

តាមរយៈសារជាសំឡេងនេះ សម្ដេចតេជោ ហ៊ុន សែន មានប្រសាសន៍ថា «យើងនឹងរក្សាទុកនៅមន្ត្រីទាំងអស់ ជារដ្ឋលេខាធិការ អនុរដ្ឋលេខាធិការ ឬទីប្រឹក្សារាជរដ្ឋាភិបាល ដែលបានតែងតាំងរួចមកហើយឲ្យបន្តតទៅទៀត »។ 

សម្ដេចតេជោ ហ៊ុន សែន កបានបញ្ជាក់ទៀតថា «សម្រាប់អ្នកកាន់មុខតំណែងមុខងារសាធារណៈ​មិនមានបញ្ហា​ជាចំណោទនោះទេ លើកលែងតែអ្នកទាំងនោះមានដល់អាយុចូលនិវត្តន៍ ទើបអាចចូលនិវត្តន៍។ សម្រាប់មុខងារ​សាធារណៈ នឹងមិនត្រូវប៉ះពាល់នោះឡើយ ជាអគ្គនាយកដ្ឋាន អគ្គនាយករង ប្រធាននាយកដ្ឋាន អនុប្រធាននាយកដ្ឋាន ប្រធានការិយាល័យ អភិបាលខេត្ត អភិបាលរងខេត្ត អភិបាលស្រុក អភិបាលរងស្រុកខណ្ឌ គឺមិនត្រូវបានប៉ះ​ពាល់នោះទេ មេទាហានគ្រប់ជាន់ថ្នាក់ មេប៉ូលីសគ្រប់ជាន់ថ្នាក់ មិនត្រូវបានប៉ះពាល់ទេ លើកលែងតែអ្នកនោះមាន​អាយុចូលនិវត្ត គឺត្រូវចូលនិវត្តន៍តាមច្បាប់ »។ 

បើតាមសម្ដេចតេជោ ចំពោះមុខងារខាងនយោបាយ ដែលតែងតាំងជាថ្នាក់រដ្ឋលេខាធិការ អនុរដ្ឋលេខាធិការ​នៅតាម​ក្រសួងទាំងនោះនៅតែបន្តការងារ លើកលែងតែម្ចាស់ខ្លួនសូមលាឈប់ដោយសារកត្តាអាយុ ឬមានជំងឺច្រើន ។

សម្តេចតេជោ ហ៊ុន សែន ស្នើឱ្យនាយករដ្ឋមន្រ្តី និងរដ្ឋមន្រ្តីក្រោយ បន្តការយកចិត្តទុកដាក់ទៅលើកិច្ចការ​ដែលត្រូវដោះស្រាយជាមួយមន្ត្រីចាស់ៗ មន្ត្រីនៅមុខតំណែងបច្ចុប្បន្នត្រូវឲ្យមានបន្តការងារតទៅទៀត ដោយ​គ្មានការកែប្រែ លើកលែងតែសាមីខ្លួនឈប់៕