ព័ត៌មានជាតិ

អភិបាលខេត្តពោធិ៍សាត់អរគុណពលរដ្ឋទូទាំងខេត្ត ដែលបោះឆ្នោតជូនគណបក្សប្រជាជនកម្ពុជាឈ្នះលើសលប់

បានផុស

៣ years មុន

នៅ

ថ្ងៃពុធ ២ សីហា ២០២៣

ដោយ

ពោធិ៍សាត់ ៖ លោក ខូយ រីដា អភិបាលនៃគណអភិបាលខេត្តបានថ្លែងអំណរអរគុណយ៉ាងជ្រាលជ្រៅជូនចំពោះយាយតា ប្រជាពលរដ្ឋគ្រប់ភូមិឃុំសង្កាត់ទូទាំងខេត្តពោធិ៍សាត់ទាំងអស់ ដែលស្រឡាញ់គាំទ្រ និងជឿជាក់មកលើគណបក្សប្រជាជនកម្ពុជាឈ្នះលើសលប់ភ្លូកទឹកភ្លូកដី កន្លងទៅនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីលោកអភិបាលខេត្តនិងភរិយាបានអញ្ជើញទៅសួរសុខទុកម្ដាយនៅឯស្រុកកំណើតរបស់លោកក្នុងភូមិស្វាយចាន់ ឃុំស្វាយលួង ស្រុកកណ្ណៀង ខេត្តពោធិ៍សាត់ ដោយជម្រាបម្ដាយលោកថា ខេត្តពោធិ៍សាត់យើងឈ្នះឆ្នោតដាច់គេទូទាំងប្រទេសក្នុងចំណាត់ថ្នាក់លេខ១។

លោក ខូយ រីដា ក៏បានពាំនាំការសួរសុខទុក្ខពីសម្តេចតេជោ ហ៊ុន សែន នាយករដ្ឋមន្ត្រី ឯកឧត្តមបណ្ឌិត ហ៊ុនម៉ាណែត បេក្ខជននាយករដ្ឋមន្ត្រីថ្មី ចំពោះប្រជាពលរដ្ឋគ្រប់រូបរស់នៅក្នុងខេត្តពោធិ៍សាត់ដែលបានគាំទ្រគណបក្សប្រជាជនកម្ពុជារបស់បងប្អូនប្រជាពលរដ្ឋពិតជាត្រឹមត្រូវតាមកាលៈទេសៈ ពីព្រោះប្រទេសកម្ពុជាយើងឆ្លងកាត់សង្គ្រាមរាប់រយឆ្នាំមកហើយ។

លោកអភិបាលខេត្តបានបន្តថា ក្នុងសម័យតេជោ ហ៊ុន សែន ជានាយករដ្ឋមន្ត្រី សម្តេចបានលះបង់គ្រប់បែបយ៉ាងដើម្បីស្វែងរកសន្តិភាព និងការអភិវឌ្ឍន៍ប្រទេសជាតិ ជូនប្រជាពលរដ្ឋហើយធ្វើមានកេរ្តិ៍ឈ្មោះល្បីល្បាញពេញនៅលើឆាកអន្តរជាតិបន្ថែមទៀតផង។ ជាមួយនឹងភាពជោគជ័យនៃការគាំទ្ររបស់បងប្អូនប្រជាពលរដ្ឋទូទាំងខេត្តពោធិ៍សាត់ លើគណបក្សប្រជាជនកម្ពុជា លើសលប់ភ្លូកទឹកភ្លូកដីនោះ លោកអភិបាលក៏បានសន្យាទៅនឹងបងប្អូនដោះស្រាយទុក្ខលំបាកបងប្អូនគ្រប់ទីកន្លែង ក្នុងផ្លូវសន្តិភាពជានិច្ច៕

ដោយ ៖ លាន គ្រន