សមាគមធនាគារ និងមីក្រូហិរញ្ញវត្ថុកម្ពុជា បំភ្លឺជុំវិញការចោទប្រកាន់​លើមន្ត្រីឥណទានខេត្តរតនៈគិរី

សមាគមធនាគារនៅកម្ពុជា (ABC) និងសមាគមមីក្រូហិរញ្ញវត្ថុកម្ពុជា (CMA) បានការយកចិត្តទុកដាក់ទៅលើ​ការចោទប្រកាន់ទាក់ទងទៅនឹងការធ្វើអត្តឃាត និងការប៉ុនប៉ងធ្វើអត្តឃាត ដោយសារការបង្ខំលើការ​ប្រមូលបំណុល​ពីមន្ត្រីឥណទាននៃគ្រឹះស្ថានធនាគារ និងហិរញ្ញវត្ថុ នៅក្នុងខេត្ត រតនៈគិរី។ នេះបើយោងតាមខ្លឹមសារ​ក្នុងសេចក្តីថ្លែង​ការណ៍​របស់សមាគមទាំងពីរ នៅថ្ងៃទី ០៩ ខែ សីហា ឆ្នាំ ២០២៣នេះ។

ស្ថាបនទាំងពីរ បានគូសបញ្ជាក់ថា សមាគមបាននិងកំពុងធ្វើការយ៉ាងសស្រាក់សស្រាំលើរបៀបវារៈនៃការផ្ដល់កម្ចីប្រកប​ដោយការទទួលខុសត្រូវ និងការដាក់ចេញនូវគោលការណ៍ការពារអ្នកប្រើប្រាស់របស់គ្រឹះស្ថានធនាគារ និងហិរញ្ញ​វត្ថុនៅកម្ពុជា។

ទាក់ទងនឹងករណីចោទប្រកាន់នេះ សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា បានស្នើឱ្យគ្រឹះ​ស្ថាន​នីមួយៗ ដែលមានឈ្មោះនៅក្នុងរបាយការណ៍នោះ ធ្វើការត្រួតពិនិត្យឱ្យបានហ្មត់ចត់ ទៅលើករណីចោទ​ប្រកាន់​ទាំងអស់នោះ។ ដើម្បីធានាបាននូវភាពត្រឹមត្រូវ និង ភាពមិនលម្អៀងលើលទ្ធផលនៃការរកឃើញចំពោះបញ្ហានេះ សមាគមយល់ឃើញថា ចាំបាច់នឹងមានការស៊ើបអង្កេតឯករាជ្យមួយ ផ្សេងទៀត ប្រសិនបើពិតជាមានការ​ប្រព្រឹត្តិខុស​ពីសំណាក់គ្រឹះស្ថានហិរញ្ញវត្ថុជាសមាជិកមែននោះ សមាគមទាំងពីរ នឹងគាំទ្រ​យ៉ាងខ្លាំងក្លាចំពោះ​ចំណាត់ការវិន័យ​លើគ្រឹះស្ថានធនាគារ និងមីក្រូហិរញ្ញវត្ថុឬ បុគ្គលពាក់ព័ន្ធ វិធានការដ៏ម៉ឺងម៉ាត់នេះគឺជាការចាំបាច់ ដើម្បីរក្សាកេរ្តិ៍ឈ្មោះ និងទំនុកចិត្តសាធារណជន មកលើប្រព័ន្ធធនាគារ។

ពាក់ព័ន្ធនឹងបញ្ហានេះ ដោយមានការគាំទ្រពី ធនាគារជាតិនៃកម្ពុជា សមាគមទាំងពីរ អះអាងថា នឹងបន្តចូលរួមយ៉ាង​សកម្មក្នុងការលើកកម្ពស់ ទាំងរបៀបវារៈចំណេះដឹងផ្នែកហិរញ្ញវត្ថុ និងលទ្ធភាពទទួលបានហិរញ្ញវត្ថុ រួមជាមួយ​នឹងការធានាថា សមាជិកទាំងអស់របស់សមាគមប្រកាន់ខ្ជាប់​នូវគោលការណ៍នៃការផ្ដល់​កម្ចីប្រកបដោយការ​ទទួលខុសត្រូវ និងការអនុវត្តឱ្យបានហ្មត់ចត់នូវក្រមប្រតិបត្តិសម្រាប់គ្រឹះស្ថានធនាគារ និងហិរញ្ញវត្ថុ។

លើសពីនេះទៀត សមាគមបញ្ជាក់ថា នឹងបន្តពិនិត្យមើលលើគោលនយោបាយ​នៃការវាយតម្លៃឥណទានរបស់​គ្រឹះស្ថានហិរញ្ញវត្ថុនីមួយៗ និងគោលនយោបាយប្រមូលបំណុលរួមបញ្ចូលទាំងការកែលម្អចាំបាច់ ដើម្បីធានាបាន​នូវដំណោះស្រាយត្រឹមត្រូវ និងសមស្របដែលអាចទទួលយកបាន ទាំងចំពោះផលប្រយោជន៍​របស់អតិថិជន និងផលប្រយោជន៍របស់ធនាគារ/គ្រឹះស្ថានមីក្រូហិរញ្ញវត្ថុ៕