សេដ្ឋកិច្ច

សមាគមធនាគារ ពង្រឹងភាពធន់ និងសុវត្ថិភាពឌីជីថល ក្នុងវិស័យហិរញ្ញវត្ថុ

បានផុស

២ ខែ មុន

នៅ

ថ្ងៃព្រហស្បតិ៍ ២១ ឧសភា ២០២៦

ដោយ

ស្របពេលដែលវិស័យហិរញ្ញវត្ថុរបស់កម្ពុជាកាន់តែមានលក្ខណៈឌីជីថល និងប្រទាក់ក្រឡាគ្នា សុវត្ថិភាពឌីជីថល បានលេចចេញជាអាទិភាពដ៏សំខាន់សម្រាប់ការពារអ្នកប្រើប្រាស់ ស្ថាប័ន និងការពង្រឹងទំនុកចិត្តលើសេដ្ឋកិច្ចឌីជីថលរបស់ប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាគមធនាគារនៅកម្ពុជា (ABC) កាលពីថ្ងៃទី២០ ខែឧសភា បានរៀបចំទិវាសុវត្ថិភាពឌីជីថលឆ្នាំ២០២៦ នៅសណ្ឋាគារសុខាភ្នំពេញ ដោយផ្តោតលើប្រធានបទ «ការពង្រឹងភាពធន់ និងសុវត្ថិភាពឌីជីលក្នុងវិស័យធនាគារ និងហិរញ្ញវត្ថុនៅកម្ពុជា»។

កម្មវិធីនេះជាវេទិកាដ៏សំខាន់សម្រាប់កិច្ចពិភាក្សាអន្តរវិស័យ ចែករំលែកចំណេះដឹង និងបន្តសហការដើម្បីពង្រឹងប្រព័ន្ធអេកូឡូស៊ីហិរញ្ញវត្ថុឌីជីថល ប្រឆាំងទៅនឹងការកើនឡើងនៃការគំរាមកំហែងផ្នែកសាយប័រដែលកាន់តែមានភាពស្មុគស្មាញជាងមុន។

លោក រ័ត្ន សោភ័ណ ប្រធានសមាគមធនាគារនៅកម្ពុជា បានលើកឡើងថា៖ «ការកើនឡើងយ៉ាងឆាប់រហ័សនៃប្រតិបត្តិការតាមប្រព័ន្ធឌីជីថល ក៏អាចបង្កើនហានិភ័យនៃការរំខានទៅដល់ប្រព័ន្ធ ការវាយប្រហារតាមប្រព័ន្ធអ៊ីនធើណិត ការក្លែងបន្លំ/ការឆបោក បទល្មើសបច្ចេកវិទ្យា និងការលេចធ្លាយទិន្នន័យផងដែរ។ ឧប្បត្តិហេតុទាំងនេះ អាចបណ្តាលឱ្យមានការខាតបង់ផ្នែកហិរញ្ញវត្ថុដោយផ្ទាល់ ប៉ុន្តែអ្វីដែលផ្តល់ផលប៉ះពាល់ដ៏ធំបំផុតនោះគឺទំនុកចិត្ត»។

លោកប្រធានសមាគមធនាគារនៅកម្ពុជា បានបន្តថា ទំនុកចិត្ត គឺជាមូលដ្ឋានគ្រឹះរបស់វិស័យធនាគារ។ ប្រសិនជាទំនុកចិត្តត្រូវបានបំផ្លាញ គឺពិបាកក្នុងការស្តារឡើងវិញណាស់។ ដូច្នេះសុវត្ថិភាពឌីជីថល មិនគ្រាន់តែជាបញ្ហាបច្ចេកវិទ្យាតែមួយមុខប៉ុណ្ណោះនោះទេ ប៉ុន្តែគឺជាការទទួលខុសត្រូវរបស់ក្រុមប្រឹក្សាភិបាល ថ្នាក់ដឹកនាំ គណៈគ្រប់គ្រង និងបុគ្គលិករបស់ស្ថាប័នគ្រប់លំដាប់ថ្នាក់។

ស្របពេលដែលសេដ្ឋកិច្ចឌីជីថលកម្ពុជាបន្តរីកចម្រើន សុវត្ថិភាពឌីជីថល (Cybersecurity) បានក្លាយជាអាទិភាពដ៏សំខាន់សម្រាប់ស្ថិរភាពហិរញ្ញវត្ថុ កិច្ចការពារអ្នកប្រើប្រាស់ និងទំនុកចិត្តផ្នែកសេដ្ឋកិច្ច។ ការពង្រឹងភាពធន់នឹងសាយប័រ ទាមទារឱ្យមានកិច្ចសហការប្រកបដោយនិរន្តរភាព រវាងស្ថាប័នហិរញ្ញវត្ថុ និយ័តករ ភ្នាក់ងារអនុវត្តច្បាប់ អ្នកផ្តល់សេវាបច្ចេកវិទ្យា និងអ្នកប្រើប្រាស់។ តាមរយៈការបន្តកិច្ចសហប្រតិបត្តិការនេះ កម្ពុជាអាចកសាងប្រព័ន្ធអេកូឡូស៊ីហិរញ្ញវត្ថុឌីជីថលដែលមានសុវត្ថិភាព ទំនុកចិត្ត និងភាពធន់ជាងមុន។

លោកឧត្តមសេនីយ៍ឯក ជា ពៅ អគ្គស្នងការរងនគរបាលជាតិកម្ពុជា បានបញ្ជាក់ពីសារៈសំខាន់នៃកិច្ចសហប្រតិបត្តិការជិតស្និទ្ធរវាងស្ថាប័នអនុវត្តច្បាប់ និយ័តករ ស្ថាប័នហិរញ្ញវត្ថុ ដៃគូបច្ចេកវិទ្យា និងសាធារណជន ដើម្បីទប់ស្កាត់ រកឱ្យឃើញ និងឆ្លើយតបទៅនឹងឧក្រិដ្ឋកម្មតាមអ៊ីនធើណិត។

លោក លន់ សំអុល អគ្គនាយករងត្រួតពិនិត្យ បានបញ្ជាក់ពីការបន្តប្តេជ្ញាចិត្តយ៉ាងមុតមាំរបស់ធនាគារជាតិនៃកម្ពុជាក្នុងការត្រួតពិនិត្យបទប្បញ្ញត្តិយ៉ាងតឹងរ៉ឹង និងយកចិត្តទុកដាក់ខ្ពស់ ចំពោះស្ថិរភាព ភាពរឹងមាំ និងភាពធន់នៃប្រព័ន្ធធនាគារ។

លោកសំអុល បានបន្តថា៖ “ដើម្បីឆ្លើយតបទៅនឹងការវិវឌ្ឍន៍ថ្មីៗនៃបច្ចេកវិទ្យា នៅដើមឆ្នាំ២០២៦នេះ ធនាគារជាតិនៃកម្ពុជា បានដាក់ចេញសេចក្តីណែនាំស្តីពីការគ្រប់គ្រងហានិភ័យបច្ចេកវិទ្យា និងសាយប័ររបស់គ្រឹះស្ថានធនាគារ និងហិរញ្ញវត្ថុ ហៅកាត់ថា TCRMG 2026 ដែលបានធ្វើបច្ចុប្បន្នកម្មពីសេចក្តីណែនាំចាស់ស្តីពីការគ្រប់គ្រងហានិភ័យបច្ចេកវិទ្យា (TRMG)ឆ្នាំ២០១៩។”

លោកសំអុលបន្តទៀតថា សេចក្តីណែនាំថ្មី មិនត្រឹមតែជាការរឹតបន្តឹងផ្នែកបទប្បញ្ញត្តិនោះទេ ប៉ុន្តែបានដាក់ចេញនូវគោលការណ៍ច្បាស់លាស់ និងតម្រូវការចាំបាច់នានាសម្រាប់គ្រឹះស្ថានហិរញ្ញវត្ថុអនុវត្ត ដើម្បីទប់ស្កាត់ និងកាត់បន្ថយហានិភ័យសាយប័រឱ្យស្ថិតនៅកម្រិតទាបំផុត តាមរយៈការវាយតម្លៃហានិភ័យប្រចាំ ការពង្រឹងហេដ្ឋារចនាសម្ព័ន្ធការពារ និងការរៀបចំផែនការឆ្លើយតបពេលមានឧប្បត្តិហេតុ៕

Related Topics:សមាគមធនាគារនៅកម្ពុជា