ព័ត៌មានជាតិ

លោក កើត ឆែ ៖ ក្រុមសាងសង់កំពុងពន្លឿនការងារធ្វើស្ពានកោះនរាឱ្យហើយមុនបុណ្យអុំទូក

បានផុស

៧ ខែ មុន

នៅ

ថ្ងៃសុក្រ ១១ សីហា ២០២៣

ដោយ

លោក កើត ឆែ អភិបាលរងរាជធានីភ្នំពេញ បានឱ្យដឹងថា ក្រុមការងារសាងសង់ស្ពានកោះនរា កំពុងខិតខំពន្លឿនគម្រោងនេះ ដើម្បីឱ្យប្រជាពលរដ្ឋអាចធ្វើដំណើរបានមុនព្រះរាជពិធីបុណ្យអុំទូកខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអភិបាលរងក្រុង បានសរសេរនៅលើហ្វេសប៊ុកផ្លូវការដូច្នេះថា« ស្ពានកោះពេជ្រ និងកោះនរា កាន់តែជិតភ្ជាប់និស្ស័យក្រោមម្លប់តេជោសន្តិភាព…សូមគោរពដឹងគុណដ៏ជ្រាលជ្រៅបំផុត ចំពោះសម្តេចតេជោ បិតាស្ថាបនិកសន្តិភាពរបស់ប្រជាពលរដ្ឋកម្ពុជាយើង»។

លោក អ៊ុង រ៉ូន ក្រុមបច្ចេកទេសសាងសង់ស្ពាន បានលើកឡើងថ្មីៗនេះថា ស្ពានកោះនរាឆ្ពោះទៅកោះពេជ្រនេះ បានបើកការដ្ឋានដំណើរការសាងសង់កាលពីថ្ងៃទី២៦ ខែតុលា ឆ្នាំ២០២០។ លោកថា ស្ពាននេះ អាចជួយសម្រួលដល់ការធ្វើដំណើរចេញពីទឹកដីខណ្ឌច្បារអំពៅឆ្ពោះទៅមជ្ឈមណ្ឌលកោះពេជ្រ ដែលបច្ចុប្បន្នបង្កឲ្យមានការកកស្ទះចរាចរណ៍ជារៀងរាល់ថ្ងៃ បើទោះជាសាលារាជធានីភ្នំពេញដាក់សាឡាងសម្រាប់ចម្លងអ្នកដំណើរជាប់ការដ្ឋានស្ពានកោះនរាឆ្ពោះទៅកោះពេជ្ររហូតដល់ទៅ៤គ្រឿងយ៉ាងណាក្តី ក៏នៅតែកកស្ទះដដែល។

លោក កើត ឆែ បានលើកឡើងថា ស្ពានខ្សែកាបកោះពេជ្រ-កោះនរានេះ ជាការភ្ជាប់ចរាចរណ៍កណ្តាលរាជធានីភ្នំពេញ ទៅមកផ្លូវជាតិលេខ១ នឹងអាចកាត់បន្ថយការកកស្ទះចរាចរលើស្ពានព្រះមុនីវង្សទាំងពីរ ក្រោយពីស្ពាននេះដាក់ឱ្យដំណើរការ។

ស្ពាននេះមានប្រវែង ៨២៤ ម៉ែត្រ កម្ពស់ ៧០ ម៉ែត្រ ជាស្ពានបេតុងខ្សែកាប ឆ្លងកាត់ទន្លេបាសាក់ ពីតំបន់កោះពេជ្រ ទៅកាន់តំបន់អភិវឌ្ឍន៍កោះនរា ចំណាយទុនវិនិយោគ ៣៨លានដុល្លារអាមេរិក សាងសង់ដោយក្រុមហ៊ុនវិនិយោគទុនអណិកជនកម្ពុជា (OCIC) ក្រោមការគ្រប់គ្រងរបស់រដ្ឋបាលរាជធានីភ្នំពេញ៕