មន្រ្តីនគរបាលជាតិ៧៤នាក់មកពីវៀតណាមមានសុខភាពល្អធម្មតាទេ

លោកជ្ជបណ្ឌិត កែ រដ្ឋា ប្រធានមន្ទីរសុខាភិបាលខេត្តស្វាយរៀងបានឲ្យដឹងនៅព្រឹកថ្ងៃទី៣០ មករានេះថា មន្រ្តីនគរបាលជាតិចំនួន៧៤នាក់ ជាសិក្ខាកាមបញ្ចប់វគ្គបណ្ដុះបណ្ដាលថ្នាក់ជំនាញតម្រួត និងពន្ធនាគារដែលទើប​វិល​ត្រឡប់មកពីប្រទេសវៀតណាមកំពុងធ្វើចត្តាឡីស័ករយៈពេល១៤ថ្ងៃមានសុខភាពល្អធម្មតាមិនមានអ្វីគួរឲ្យព្រួយបារម្ភនោះទ។

លោកបានបន្តថា ដោយឡែកចំពោះមន្ត្រី២នាក់ ដែលមានអាការៈក្តៅខ្លួន ក្អកផ្តាសាយដែលធ្វើចត្តាឡីស័កនៅមន្ទីរពេទ្យបង្អែកជម្ភូនោះក៏មានសុខភាពល្អដែរ។លោកបានបន្តទៀតថា ក្រុមការងារមន្ទីរសុខាភិបាលខេត្តស្វាយរៀងបានយកសំណាកមន្ត្រីទាំង៧៤នាក់ទៅធ្វើតេស្តរកជំងឺកូវីដ១៩រួចហើយកាលពីម្សិលមិញហើយលទ្ធផលនឹងដឹងនៅយប់នេះ។

លោកវេជ្ជបណ្ឌិត កែ រដ្ឋា បានបន្ថែមថា យើងត្រូវយកសំណាក់ពីពួកគាត់ចំនួន២ដងហើយ បើសិនលទ្ធផលតេស្តអវិជ្ជមានទើបយើងអនុញ្ញឲ្យពួកគាត់វិលត្រឡប់ទៅផ្ទះរៀងៗខ្លួនវិញ។ លោកបានបន្តថាក្នុងចំណោម៧៤នាក់នោះយើងបានដាក់ឲ្យធ្វើចត្តាឡីស័កនៅមណ្ឌលបាវិតចំនួន១៨នាក់នៅមណ្ឌលចត្តាឡីស័កនៅស្វាយរៀងចំនួន៥០និង២នាក់ទៀតធ្វើចត្តាឡីស័កនៅមន្ទីរពេទ្យបង្អែកជម្ភូ។

យ៉ាងណាក៏ដោយ លោកវេជ្ជបណ្ឌិត កែ រដ្ឋាបានអំពាវនាវដល់និស្សិតខ្មែរដែលកំពុងរៀននៅវៀតណាមកុំអាលទាន់​វិលត្រឡប់មកស្រុកនាពេលចូលឆ្នាំនេះសូមបន្តស្នាក់នៅវៀតណាមនិងនៅលេងនៅវៀតណាមសិនទៅកុំមកស្រុកដើម្បីការពារការឆ្លងរីករាលដាលជំងឺកូវីដ១៩ខណៈប្រទេសវៀតណាមកំពុងផ្ទុះជំងឺនេះក្នុងសហគមន៍ ។

មន្រ្តីនគរបាលជាតិ៧៤នាក់នោះដឹកនាំដោយលោកវរសេនីយ៍ឯក អុល សុភ័ក្រ្ត នាយការិយាល័យផែនការ នៃនាយកដ្ឋានបុគ្គលិកបានធ្វើដំណើរពីប្រទេសវៀតណាមនៅព្រឹកថ្ងៃទី២៨ ខែមករា ឆ្នាំ២០២១ចូលមកប្រទេសកម្ពុជាតាមប៉ុស្តិ៍នគរបាលច្រកទ្វារព្រំដែនអន្តរជាតិបាវិតបន្ទាប់ពីបានបញ្ចប់វគ្គបណ្ដុះបណ្ដាលថ្នាក់ជំនាញតម្រួត និងពន្ធនាគារ នៅមហាវិទ្យាល័យតម្រួតប្រជាជន នៃក្រសួងនគរបាលវៀតណាម៕

សំអឿន