មន្រ្តីមន្ទីរពេទ្យខេត្តកោះកុង សង្ឃឹមមុតមាំថា ថៃនឹងបន្តជួយលើកស្ទួយវិស័យសុខាភិបាលបន្ថែម

អនុប្រធានមន្ទីរពេទ្យបង្អែកខេត្តកោះកុង បានបង្ហាញក្តីជឿជាក់មុតមាំថា រាជរដ្ឋាភិបាល ស្ថានទូតថៃនៅកម្ពុជា នឹងបន្តជួយលើកស្ទួយវិស័យសុខាភិបាលក្នុងខេត្តមួយនេះបន្ថែមទៀត ដោយឈរលើស្មារតីកិច្ចប្រតិបត្តិការរវាងប្រទេសជិតខាង។

ការបង្ហាពីជំនឿជាក់បែបនេះរបស់លោកវេជ្ជបណ្ឌិត ពិន សេរីវឌ្ឍនៈ អនុប្រធានមន្ទីរពេទ្យបង្អែកខេត្តកោះកុង ធ្វើឡើងក្រោយការទទួលស្វាគមន៍គណៈប្រតិភូស្ថានទូតថៃប្រចាំនៅកម្ពុជាចុះពិនិត្យហេដ្ឋារចនាសម្ព័ន្ធដែលថៃធ្លាប់ឧបត្ថម្ភជួយកន្លងទៅមក។

លោកអនុប្រធានមន្ទីរពេទ្យខេត្តបន្តថា កន្លងទៅទីភ្នាក់ងារកិច្ចសហប្រតិបត្តិការអន្តរជាតិថៃ បានកសាងអគារសង្រ្គោះរបួសធ្ងន់ និងព្យាបាលទារក អគារបោកគួកកម្ចាត់មេរោគ រថយន្តសង្រ្គោះបន្ទាន់ និងសម្ភារៈវេជ្ជសាស្រ្តមួយចំនួនទៀតដល់មន្ទីរពេទ្យដែលជាចំណុចអាទិភាពមួយផ្តល់ទំនុកចិត្តដល់ពលរដ្ឋគ្រប់រូបមកទទួលសេវា។

បើតាមលោក ពិន សេរីវឌ្ឍនៈ ចាត់តាំងពីមានអគារសង្រ្គោះបន្ទាន់ ក៏ដូចជាហេដ្ឋារចនាសម្ព័ន្ធសុខាភិបាលជាបន្តបន្ទាប់មក អត្រាចំនួនអ្នកជំងឺកាន់តែមានទំនុកចិត្តច្រើនមកទទួលសេវាពិនិត្យព្យាបាលជំងឺផ្សេងៗក្នុងមន្ទីរពេទ្យ។ មិនត្រឹមប៉ុណ្ណោះទេ មន្ទីរពេទ្យមានដាក់ចេញនូវទស្សនៈវិស័យអាទិភាពច្រើនដល់មន្រ្តីរាជការសុខាភិបាល និងបុគ្គលិកដែលកំពុងបម្រើការងារប្រកបដោយក្រមសីលធម៌វិជ្ជាជីវៈ។

លោកវេជ្ជបណ្ឌិត ពិន សេរីវឌ្ឍនៈ ក៏បន្តស្នើសុំដល់ភាគីថៃ ធ្វើយ៉ាងណាជួយបង្កើនកិច្ចសហប្រតិបត្តិការទទួលបញ្ចូនអ្នកជំងឺទៅព្យាបាលនៅប្រទេសថៃតាមច្រកព្រំដែនបានលឿនឆាប់រហ័ស បណ្តុះបណ្តាលជំនាញសុខាភិបាលដល់មន្រ្តីបន្ថែម និងសម្ភារៈបរិក្ខាមួយចំនួនទៀតផង។

ទាក់ទិននឹងសំណើផ្ទាល់មាត់នេះដែរ ត្រូវបានលោក ឈើតកៀត អាត់ថាកន ឯកអគ្គរាជទូតថៃនៅកម្ពុជា ទទួលយកពិនិត្យពិភាក្សាជាមួយរាជរដ្ឋាភិបាល និងដៃគូអភិវឌ្ឍន៍អន្តរជាតិពាក់ព័ន្ធ។ លោកឯកអគ្គរាជទូតថៃប្រចាំនៅកម្ពុជា វាយតម្លៃខ្ពស់ពីសមិទ្ធផល ព្រមទាំងភាពរីកចម្រើនច្រើនអំពីវិស័យសុខាភិបាលនៃមន្ទីរពេទ្យបង្អែកខេត្តជំនួសមកវិញនូវការផ្តល់ទំនុកចិត្តពីប្រជាពលរដ្ឋ៕

អត្តបទ៖ សិរីវឌ្ឍនៈ