ផ្សារណាត់ថ្មីខេត្តតាកែវ នឹងបញ្ចប់ការសាងសង់​នៅដំណាច់​ខែកញ្ញានេះ

រដ្ឋបាលក្រុងដូនកែវកាលពីពេលថ្មីៗនេះ បានអះអាងថា ការកសាងផ្សារណាត់នៅតែបន្តសាងសង់ដដែល ដោយផ្ទុយពីការចុះផ្សាយរបស់សារព័ត៌មានមួយចំនួនថា អ្នកវិនិយោគសំណង់ផ្សារណាត់ បានផ្អាកការ​សាងសង់មួយរយៈសង្ស័យថាក្ស័យធន។

ផ្អែកតាម​សេចក្ដីប្រកាស​របស់រដ្ឋបាល​​ក្រុងដូនកែវ ដែលបានបញ្ជាក់ជូនអាជីវករ ពាណិជ្ជករនិងសាធារណជនថា ការសាងសង់ផ្សារណាត់នៅតែបន្តសាងសង់ដដែល ទោះបីមានការយឺតយ៉ាវបន្តិចក៏ពិតមែន តែមកដល់ពេលនេះ ដំណើរការសាងសង់សម្រេចបានប្រមាណជា៩០ភាគរយហើយ គឺនៅតែបញ្ចប់ការធ្វើតូប ការដាក់ទ្វារមូរ ការដាក់​ជណ្ដើរយន្ត បង្កាន់ដៃជណ្ដើរ បង្គន់អនាម័យ និងការលាងសម្អាតតែប៉ុណ្ណោះ។

ជាមួយគ្នានោះរដ្ឋបាលក្រុងដូនកែវ ក៏បានបញ្ជាក់យ៉ាងច្បាស់ថា កាលពីថ្ងៃទី៣០ ខែសីហា ឆ្នាំ២០២៣ លោក កង អាណាន់ អភិបាលក្រុងដូនកែវបានរៀបចំកិច្ចប្រជុំសម្របសម្រួលជាមួយនឹងអ្នកវិនិយោគសំណង់ផ្សារណាត់ ហើយ​ជាលទ្ធផលអ្នកវិនិយោគសន្យាថានឹងបញ្ចប់ការសាងសង់តូប និងការងារដែលសេសសល់ឲ្យហើយរួចរាល់ត្រឹមថ្ងៃទី៣០ ខែកញ្ញា ឆ្នាំ២០២៣។ ចំណែកជាន់ផ្ទាល់ដីវិញបានរៀបចំរួចរាល់ហើយបងប្អូនអាជីវករ និងចូលមកលក់ដូរនៅថ្ងៃទី០៣ ខែកញ្ញា ឆ្នាំ២០២៣។
សូមបញ្ជាក់ថា  ផ្សារណាត់ថ្មីនេះគឺមានទីតាំងស្ថិតនៅភូមិ១ សង្កាត់រកាក្នុង ក្រុងដូនកែវ ខេត្តតាកែវ មានទំហំ១៥ម៉ែត្រ គុណ៨០,១៥ ម៉ែត្រ កម្ពស់៣ជាន់ និងមានតូបប្រមាណជាង៤០០តូប ដោយបានចាប់ផ្តើមបុកគ្រឹះនៅថ្ងៃទី១៨ ខែមីនា ឆ្នាំ២០២១  តាមគម្រោងត្រូវបញ្ចប់ការសាងសង់ចុងឆ្នាំ២០២២។ មកដល់ថ្ងៃទី០៤ខែកញ្ញា ឆ្នាំ២០២៣នេះ  ការសាង​សង់​នៅតែដំណើរការដោយគ្រោងបញ្ចប់ការសាងសង់ឲ្យរួចរាល់នៅចុងខែកញ្ញានេះ៕

អត្ថបទ ៖ វីរៈ