ប្រធានគណបក្សយុវជនកម្ពុជា ៖ វិសោធនកម្មច្បាប់បោះឆ្នោត ជាការដាក់លក្ខខណ្ឌដល់អ្នកចង់ឈរឈ្មោះបោះឆ្នោត

ប្រធានគណបក្សយុវជនកម្ពុជា បានគូសបញ្ជាក់ជាថ្មីថា លោកគាំទ្រពេញទំហឹងចំពោះការធ្វើវិសោធនកម្មច្បាប់ ស្ដីពី ការបោះឆ្នោត ដែលសំដៅកែទម្រង់ “សិទ្ធិឈរឈ្មោះឲ្យគេបោះឆ្នោត” ដោយលោកថា នេះជាការដាក់លក្ខខណ្ឌ សម្រាប់អ្នកដែលចង់ឈរឈ្មោះឲ្យគេបោះឆ្នោតឲ្យ។

លោកបណ្ឌិត ពេជ្រ ស្រស់ ប្រធានគណបក្សយុវជនកម្ពុជា មានប្រសាសន៍ប្រាប់កម្ពុជាថ្មីថា ការធ្វើវិសោធនកម្មច្បាប់ ស្ដីពី ការបោះឆ្នោត គឺជារឿងដ៏ត្រឹមត្រូវមួយ សម្រាប់ដាក់លក្ខខណ្ឌដល់អ្នកដែលចង់ឈរឈ្មោះឲ្យគេបោះឆ្នោតឲ្យ ដែលត្រូវធ្វើជាគំរូគេក្នុងការចេញទៅបោះឆ្នោត។

លោកលើកឡើងថា «អញ្ចឹងបើសិនជាយើងវិសោធនកម្មច្បាប់នេះទៅ ដាក់លក្ខខណ្ឌឲ្យអ្នកដែលចង់ធ្វើនយោបាយ កុំបំផ្លាញជាតិខ្លួនឯង កុំដឹកនាំគេចូលរួមបំផ្លាញជាតិខ្លួនឯង ដោយមិនទៅបោះឆ្នោត អញ្ចឹងត្រូវមានលក្ខខណ្ឌតឹងរ៉ឹងមួយ សម្រាប់​អ្នកនយោបាយ មិនថាតែក្រុមខ្ញុំទេ មិនថាអ្នកនយោបាយណាទេ ឲ្យតែប្រឡូកក្នុងឆាកនយោបាយ ត្រូវយកជាតិដាក់លើក្បាល និងប្រជាពលរដ្ឋដាក់លើដើមទ្រូង នោះទើបជាតិ និងប្រជាពលរដ្ឋយើងរីកចម្រើន»។

ប្រធានគណបក្សយុវជនកម្ពុជា បានអំពាវនាវឲ្យប្រជាពលរដ្ឋខ្មែរដែលមានឈ្មោះក្នុងបញ្ជីបោះឆ្នោត សូមអញ្ជើញទៅបោះឆ្នោតជ្រើសតាំង តំណាងរាស្រ្ដ នីតិកាលទី ៧ នៅថ្ងៃទី ២៣ ខែកក្កដា ឆ្នាំ ២០២៣ខាងមុខឲ្យបានគ្រប់ៗគ្នា ដោយមិនត្រូវជឿតាមការញុះញង់របស់ក្រុមអ្នកនយោបាយនៅក្រៅប្រទេស ដែលចង់បំផ្លាញជាតិឯងនោះឡើយ។

លោកបណ្ឌិត ពេជ្រ ស្រស់ បានបន្ថែមថា «ដូច្នេះការធ្វើវិសោធនកម្មនេះមួយ គឺខ្ញុំគាំទ្រពេញទំហឹងព្រោះអ្នកនយោបាយនោះហើយ ដែលអំពាវនាវឲ្យបំផ្លាញជាតិខ្លួនឯងដោយអត់ដឹងខ្លួន ដូច្នេះត្រូវដាក់លក្ខខណ្ឌឲ្យអ្នកយោបាយតឹងរ៉ឹងបន្តិច បើអ្នកឯងមិនទៅបោះឆ្នោតផង អ្នកឯងចង់ឈរឲ្យគេបោះឆ្នោត អាហ្នឹងត្រូវតែពិចារណាឲ្យបានគ្រប់ជ្រុងជ្រោយ»។

សូមជម្រាបថា នៅថ្ងៃទី ៣ ខែកក្កដា ឆ្នាំ ២០២៣នេះ ក្រុមប្រឹក្សាធម្មនុញ្ញ បានសម្រេចជាឯកច្ឆន្ទថា ច្បាប់ ស្ដីពី វិសោធនកម្មច្បាប់បោះឆ្នោត ដែលរដ្ឋសភាបានអនុម័តនៅថ្ងៃទី ២៣ ខែមិថុនា ឆ្នាំ ២០២៣ នាសម័យប្រជុំរដ្ឋសភាលើកទី ៩ នីតិកាលទី ៩ ហើយព្រឹទ្ធសភាបានពិនិត្យ និងឲ្យយោបល់ឯកភាពទាំងស្រុងលើទម្រង់ និងគតិច្បាប់ដោយឥតកែប្រែ និងចាត់ទុកជាការប្រញាប់ ក្នុងសម័យប្រជុំលើកទី ១០ នៃព្រឹទ្ធសភានីតិកាលទី ៤ នាថ្ងៃទី ២៩ ខែមិថុនា ឆ្នាំ ២០២៣ ត្រូវបានប្រកាសថា ស្របនឹងរដ្ឋធម្មនុញ្ញ៕  

អត្ថបទ៖ សួស សិត