អ្នកជំនាញ នឹងបង្ហាញពីការធ្វើទីផ្សារ បែបឌីជីថលសម្រាប់សហគ្រាស​ នៅកម្ពុជា

គណៈកម្មាធិការសេដ្ឋកិច្ច និងធុរកិច្ចឌីជីថល នឹងបណ្ដុះបណ្តាល អំពីការធ្វើទីផ្សារបែបឌីជីថលសម្រាប់សហគ្រាស នៅកម្ពុជា ដើម្បីជួយពង្រឹងសមត្ថភាព និងជំនាញធ្វើទីផ្សារឌីជីថល ទៅកាន់បណ្ដាលម្ចាស់អាជីវកម្ម ឬសហគ្រាស​ធុនតូច និងមធ្យម។

បើតាមគណៈកម្មាធិការសេដ្ឋកិច្ច និងធុរកិច្ចឌីជីថល វគ្គបណ្តុះបណ្តាលនេះ នឹងប្រព្រឹត្តិទៅរយៈពេល ៧សប្តាហ៍ ចាប់ពីដើមខែ តុលា ដល់ខែវិច្ឆិកា ចូលរួមដោយឥតគិតថ្លៃ។

លោក យីម សំណាង អ្នកជំនាញទីផ្សារ មានបទពិសោធន៍ជាង ១០ ឆ្នាំ លើការបង្កើតមាតិកា នឹងធ្វើជាអ្នកបណ្តុះ បណ្តាល ផ្នែកទីផ្សារ និងសេវាកម្មប្រឹក្សាយោបល់ ដើម្បីជួយឱ្យអាជីវកម្មរីកចម្រើន និងកាន់តែរីកចម្រើន នៅក្នុង វិស័យនេះ។

គណៈកម្មាធិការសេដ្ឋកិច្ច និងធុរកិច្ចឌីជីថល បានគូសបញ្ជាក់ថា សិក្ខាកាមចូលរួមនឹងទទួលបាននូវចំណេះដឹង ទាក់ទងនឹងប្រធានបទចំនួន ៦ រួមមាន៖ ការណែនាំអំពីវិធីលក់៖ ស្វែងរកទីផ្សារ និងគោលបំណងនៃការលក់។  ការយល់ដឹងអំពីជំនាញ និងប្រព័ន្ធ៖ ឧបករណ៍ដែលត្រូវការដើម្បីធ្វើទីផ្សារអនឡាញ។ ការធ្វើទីផ្សារមាតិកា៖ ស្វែង យល់ពីប្រភេទនៃវេទិកាផ្សព្វផ្សាយ ក្បួនដោះស្រាយ និងរបៀបបង្កើត។ ការផ្សព្វផ្សាយពាណិជ្ជកម្មតាមប្រព័ន្ធ អ៊ីនធឺណិត៖ ការផ្សព្វផ្សាយពាណិជ្ជកម្មតាមបណ្ដាញ Tik Tok។ ការផ្សព្វផ្សាយពាណិជ្ជកម្មតាមប្រព័ន្ធអ៊ីនធឺណិត៖ ការផ្សព្វផ្សាយពាណិជ្ជកម្មតាមគេហទំព័រ Facebook និងការផ្សព្វផ្សាយពាណិជ្ជកម្មតាមប្រព័ន្ធអ៊ីនធឺណិត៖ បំប្លែង ការលក់តាម Messenger៕

អត្ថបទ៖ ផល ធារិត