បច្ចេកវិទ្យា

ជំនាញទីផ្សារឌីជីថល ៥ ប្រភេទ អ្នកទីផ្សារត្រូវតែរៀនដាច់ខាត

បានផុស

២ years មុន

នៅ

ថ្ងៃចន្ទ ៣០ ឧសភា ២០២២

ដោយ

ការអភិវឌ្ឍន៍បច្ចេកវិទ្យា និងសេដ្ឋកិច្ចយ៉ាងឆាប់រហ័ស តម្រូវឲ្យសហគ្រិន និងអ្នកទីផ្សាររៀន ទីផ្សារឌីជីថល ។ មិនត្រឹមតែការលក់តាមអ៊ីនធឺណិតប៉ុណ្ណោះទេ ទីផ្សារឌីជីថល គឺជាអាជីពដែលរួមបញ្ចូលគ្នានូវទីផ្សារ SEO ការរចនាគេហទំព័រ ប្រព័ន្ធផ្សព្វផ្សាយសង្គម ការសរសេរចម្លង និងច្រើនទៀត។ វាមិនងាយស្រួលទេ ប៉ុន្តែប្រសិនបើអ្នកអាចរៀនបានទាំងអស់ ពិតណាស់អ្នកមានតម្លៃជាងដៃគូប្រកួតប្រជែងរបស់អ្នក។ ជាជំហានដំបូង មានជំនាញទីផ្សារឌីជីថលទាំងប្រាំខាងក្រោម ដែលធ្វើឲ្យអ្នកភ្លឺស្វាងជាងមុន ក្នុងនាមជាអ្នកទីផ្សារ។

១ ការវិភាគទិន្នន័យ

ការវិភាគទិន្នន័យ ផ្ដោតលើដំណើរការទិន្នន័យពីការប្រមូល ដំណើរការព័ត៌មានផ្សេងៗពីអន្តរកម្មតាមអ៊ីនធឺណិតផ្សេងៗជាមួយទីផ្សារគោលដៅ និងដំណើរការទិន្នន័យតាមតម្រូវការ ដើម្បីសម្រេចបាននូវគោលដៅរំពឹងទុក។ អន្តរកម្មលើអ៊ីនធឺណិតនេះ អាចស្ថិតក្នុងទម្រង់នៃខ្លឹមសារ ដែលទីផ្សារគោលដៅឆ្លើយតប ប្រតិបត្តិការលើអ៊ីនធឺណិត ការស្វែងរកបទ និងប្រភពពាក់ព័ន្ធផ្សេងទៀត។ ជាមួយនឹងអន្តរកម្មនេះ អ្នកអាចប្រមូលទិន្នន័យ សម្អាតទិន្នន័យដែលមិនចាំបាច់ វិភាគវា និងជួយធ្វើការសម្រេចចិត្តទីផ្សារប្រកបដោយប្រសិទ្ធភាព។

២ SEO SEO (Search Engine Optimization)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គឺជាជំនាញនៃការបង្កើតចំណាត់ថ្នាក់គេហទំព័ររបស់ក្រុមហ៊ុន នៅលើទំព័រដំបូងនៃម៉ាស៊ីនស្វែងរក។ ដើម្បីឲ្យអតិថិជនសក្ដានុពល កាន់តែចាប់អារម្មណ៍ក្នុងការចុចលើវា នៅពេលដែលពួកគេកំពុងស្វែងរកផលិតផល ឬសេវាកម្មរបស់ក្រុមហ៊ុនដែលអ្នកធ្វើការឲ្យ។ ប្រសិនបើគេហទំព័ររបស់ក្រុមហ៊ុនស្ថិតនៅលើទំព័រដំបូង ក្នុងលទ្ធផលស្វែងរក នោះវាបង្ហាញថាការមើលឃើញរបស់វា ទៅកាន់អតិជន កាន់តែមានភាពប្រសើរឡើង។ នេះសបង្ហាញថា អតិថិជនសក្ដានុពលអាចរុករកផលិតផល ឬសេវាកម្មដែលផ្ដល់ដោយក្រុមហ៊ុនរបស់អ្នក កាន់តែងាយស្រួល។ ជាការពិតណាស់ នេះអាចបង្កើនចំនួននៃការលក់ និងចរាចរណ៍គេហទំព័ររបស់ក្រុមហ៊ុនទ្វេគុណ។

៣ ការបង្កើតមាតិកា

អ្នកអាចបង្កើតមាតិកាឌីជីថលផ្សេងៗតាមរយៈប្លក់, Twitter, TikTok, Instagram, Facebook និងផ្សេងៗទៀត។ គំនិតវីដេអូ ពាក្យទាក់ទាញ និងការនិទានរឿង គឺជាជំនាញដែលមិនអាចកាត់ថ្លៃបាននៅក្នុងឧស្សាហកម្មនេះ។ ភាពដើម និងភាពសម្បូរបែប គឺជាអាវុធដ៏មានឥទ្ធិពលនៅក្នុងជំនាញនេះ។ វាមិនមែនជារឿងចម្លែកទេ សម្រាប់អ្នកនិយមលេងអ៊ីនធឺណិត ដែលទន្ទឹងរង់ចាំមាតិកាដ៏គួរឲ្យរំភើប ដែលអ្នកបង្កើត។ ពីនេះ អ្នកអាចបញ្ចូលផលិតផល និងសេវាកម្មរបស់ក្រុមហ៊ុនអ្នកបានថែមទៀតផង។

៤ CRM(ការគ្រប់គ្រងទំនាក់ទំនងអតិថិជន)

ការតាមដានបទពិសោធន៍របស់អ្នកប្រើប្រាស់ អាចជួយក្រុមហ៊ុនឲ្យយល់ពីតម្រូវការ ដែលផ្លាស់ប្តូរកាន់តែខ្លាំងឡើងរបស់ពួកគេ។ អ្នកទីផ្សារឌីជីថល ប្រាកដជាត្រូវអភិវឌ្ឍជំនាញ CRM ដើម្បីបង្កើនប្រសិទ្ធភាព បទពិសោធន៍របស់អតិថិជន។ វានឹងកាន់តែល្អ ប្រសិនបើអ្នកអាចភ្ជាប់អ្នកប្រើប្រាស់ជាមួយនឹងកម្រិតអារម្មណ៍ កាន់តែច្រើនទៅកាន់ក្រុមហ៊ុន។ ប្រសិនបើរឿងនេះកើតឡើង កម្រិតនៃភាពស្មោះត្រង់របស់អ្នកប្រើប្រាស់ចំពោះផលិតផល និងសេវាកម្មរបស់ក្រុមហ៊ុននឹងកាន់តែខ្ពស់។

៥ ប្រព័ន្ធផ្សព្វផ្សាយសង្គម

ប្រព័ន្ធផ្សព្វផ្សាយសង្គម គឺជាកន្លែងដែលក្រុមហ៊ុន និងទីផ្សារគោលដៅធ្វើអន្តរកម្ម។ ការពិតនេះ អនុញ្ញាតឲ្យអ្នកទីផ្សារឌីជីថលជីកជ្រៅទៅក្នុងប្រព័ន្ធផ្សព្វផ្សាយសង្គម សម្រាប់ជាប្រយោជន៍របស់ក្រុមហ៊ុនក្នុងការបញ្ជូនសារដែលពាក់ព័ន្ធទៅកាន់ទីផ្សារគោលដៅ។ មិនត្រឹមតែការបង្ហោះខ្លឹមសារនៅលើប្រព័ន្ធផ្សព្វផ្សាយសង្គមប៉ុណ្ណោះទេ អ្នកទីផ្សារឌីជីថលក៏ត្រូវតែរក្សាគុណភាពមាតិកា ភាពពាក់ព័ន្ធ នៃមាតិកា និងអន្តរកម្មរវាងក្រុមហ៊ុន និងទីផ្សារគោលដៅផងដែរ។ អ្នកទីផ្សារគ្រប់រូប ត្រូវតែបង្កើតយុទ្ធសាស្ត្រប្រព័ន្ធផ្សព្វផ្សាយសង្គមមួយ ស្របតាមវេទិកាប្រព័ន្ធផ្សព្វផ្សាយសង្គមដែលបានប្រើ។ នេះគឺជាអ្វីដែលធ្វើឲ្យអ្នកទីផ្សារត្រូវតែមានភាពច្នៃប្រឌិត និងមានឆន្ទៈក្នុងការសាកល្បងមុខងារថ្មីៗ ដែលជារឿយៗត្រូវបានផ្តល់ដោយវេទិកាប្រព័ន្ធផ្សព្វផ្សាយសង្គមនីមួយៗ។

ជារួម ទីផ្សារឌីជីថល គឺជាឧស្សាហកម្មដ៏លំបាក រីករាយ និងច្នៃប្រឌិត។ មិនថាអ្នកនឹងផ្តោតលើការបង្កើតមាតិកា ឬរៀនជំនាញទីផ្សារឌីជីថលទាំងអស់នោះទេ ឧស្សាហកម្មនេះ គឺគួរឲ្យចាប់អារម្មណ៍ខ្លាំងណាស់ ហើយតែងតែត្រូវការដោយក្រុមហ៊ុននានា។ ដូច្នេះសម្រាប់អ្នកដែលមានគំនិតច្នៃប្រឌិត និងចូលចិត្តបញ្ហាប្រឈម វាមិនពិបាកទេ ក្នុងការសាកល្បងអាជីពអ្នកទីផ្សារឌីជីថលនាពេលអនាគត៕

ប្រែសម្រួល៖ សាង ស្រីល័ក្ខ

ចុចអាន៖ជំនាញទីផ្សារឌីជីថល៖ ធ្វើទីផ្សារតាមការផ្ញើម៉ែលមិនដែលហួសសម័យទេ

ចុចអាន៖ហេតុផល ៥ យ៉ាងដែលយើងគ្រប់គ្នាគួរមាន ប្លក់ផ្ទាល់ខ្លួនលើអ៊ីនធឺណិត