អ្នកចិញ្ចឹមត្រីធ្លាក់ចុះ ៦០ ភាគរយ ក្រោយចំណីឡើងថ្លៃ តម្លៃត្រីថោក

ការចិញ្ចឹមត្រីរបស់សមាជិកក្នុងសមាគម មានការធ្លាក់ចុះប្រមាណជិត ៦០ ភាគរយ បន្ទាប់ពីមានប្រជាកសិករ មួយចំនួនបានផ្អាកការចិញ្ចឹម និងមួយចំនួនទៀតកាត់បន្ថយបរិមាណត្រីចិញ្ចឹមក្នុងស្រះ ក្រោយតម្លៃចំណីត្រី មានការកើនឡើង ខណៈត្រីមានតម្លៃទាបខ្លាំងនៅអំឡុងខែ ឧសភា កន្លងទៅ ធ្វើឱ្យអ្នក​ចិញ្ចឹមពុំសូវទទួលបាន​ប្រាក់ចំណេញ ឬប្រឈមនឹងការខាតបង់។ នេះបើតាមការបញ្ជាក់របស់លោក ឡែមផូរ សុថាវរិទ្ធិ គណៈកម្មការប្រតិបត្តិ នៃសមាគមវារីវប្បករកម្ពុជា។

ថ្លែងប្រាប់កម្ពុជាថ្មី លោក ឡែមផូរ សុថាវរិទ្ធិ បានឱ្យដឹងថា កត្ដាចម្បងដែលធ្វើឱ្យអ្នកចិញ្ចឹមមានការធ្លាក់ចុះ ដោយសារមានការខាតបង់ ព្រោះវារីវប្បករចូលចិត្តចិញ្ចឹមតាមបែបប្រពៃណី ដោយមិនអនុវត្តតាមស្ដង់ដារបច្ចេកទេស ឱ្យបានត្រឹមត្រូវ ដូចជា ការដាក់កូន ត្រីលើសចំណុះ និងខ្ជះខ្ជាយនៃការប្រើប្រាស់ចំណីហួសកំណត់​ ជាដើម។

លោកបន្តថា បច្ចុប្បន្ននេះ វត្ថុធាតុដើមមានតម្លៃថ្លៃ ពោលគឺចំណីគ្រាប់ឡើងថ្លៃពី ២០-៣០ ភាគរយ ចំណីដែលមាន ធាតុផ្សំសំខាន់ៗ ដូចជា កន្ទក់មានតម្លៃឡើងដល់ជាង ៦០០រៀល ទៅ ១ ៣០០ រៀលក្នុងមួយគីឡូ និងឧបករណ៍ប្រើប្រាស់ផ្សេងៗទៀត ខណៈតម្លៃត្រីនៅដដែល។

បើតាមលោក សុថាវរិទ្ធិ គិតត្រឹមឆ្នាំ ២០២៣ បរិមាណទិន្នផលមិនមានកំណើននៅឡើយទេ ព្រោះមានអ្នកឈប់ ចិញ្ចឹមខ្លះ នៅរក្សាបរិមាណចិញ្ចឹមដដែល ឬកាត់បន្ថយការចិញ្ជឹម ឬមិនទាន់ហ៊ានបង្កើនបរិមាណចិញ្ចឹម នៅស្ថានភាពតានតឹងនេះ។

រយៈពេលជាង ២ឆ្លាំកន្លងមក ប្រធានគណៈកម្មការប្រតិបត្តិ គូសបញ្ជាក់ថា ខេត្តគោលដៅសំខាន់ៗ ៦ ដែលចិញ្ចឹមត្រី ច្រើន រួមមាន៖ ខេត្តកណ្តាល កំពង់ធំ កំពង់ចាម ពោធិ៍សាត់ សៀមរាប និងខេត្តបាត់ដំបង។ ដោយឡែកខេត្ត ដែលមាន ការថយចុះអ្នកចិញ្ចឹមច្រើនជាងគេនោះគឺ ខេត្តកំពង់ធំ និងខេត្តពោធិ៍សាត់។

អ្នកជំនាញវារីវប្បកម្ម បានលើកឡើងថា ចាប់ពីខែ កក្ដដា ឆ្នាំ ២០២៣ មកដល់បច្ចុប្បន្ន តម្លៃត្រីប្រា ចន្លោះពី ៤ ២០០រៀល ទៅជាង ៥ ០០០ រៀល, ត្រីអណ្ដែងពី ៤ ០០០​ ទៅជាង ៥ ០០០ រៀល និងត្រីពោមានតម្លៃកើនពី ៧ ៥០០រៀល ទៅ ​៨ ០០០រៀល។

សូមបញ្ជាក់ថា គិតមកដល់ពេលនេះ សមាជិករបស់សមាគមសរុបចំនួន ១០៦៣ នាក់ ក្នុងនោះអ្នកចិញ្ចឹម ៧៥៣ នាក់ ស្មើនឹងជាង ៧០០ កសិដ្ឋាន (សិដ្ឋានខ្នាតតូច មធ្យម និងខ្នាតធំ)៕

អត្ថបទ៖ ផល ធារិត