មន្ត្រីជំនាញជលផលហាមអ្នកនេសាទចូលក្នុងអន្លង់អភិរក្សសត្វផ្សោតទើបកើតថ្មី

កូនសត្វផ្សោតទើបកើតថ្មីមួយក្បាលស្ថិតនៅអន្លង់ផ្សោតត្បូងខ្លា ចំណុចកន្ទុយកោះជ្រឹម ក្នុងឃុំអូរម្រះ ស្រុកសៀមបូក ខេត្តស្ទឹងត្រែងដែលមានអាយុកាលប្រមាណជាង២០ថ្ងៃតែប៉ុណ្ណោះ នាយខណ្ឌជលផលហាមអ្នកនេសាទចូលនេសាទអន្លង់អភិរក្សសត្វផ្សោត ប្រជាសហគមន័នេសាទកោះជ្រីម ត្រូវនាំគ្នាបង្កើនការអភិរក្សឱ្យមានប្រសិទ្ធភាព។

លោក ស្រី សំវិចិត្រ នាយខណ្ឌជលផលខេត្តបានបញ្ចាក់ថា៖ នេះជាសមិទ្ធផលថ្មីមួយទៀតរបស់យើងទាំងអស់គ្នាហើយប្រជាសហគមន៍នេសាទ ត្រូវសហការជាមួយមន្ត្រីឆ្នាំ និងអាជ្ញាធរមានសមត្ថកិច្ចបង្កើនការអភិរក្សឱ្យមានប្រសិទ្ធភាព។

លោកបន្តថា៖ កិច្ចការងារនេះយើងត្រូវធ្វើល្បាតឱ្យបានញឹកញាប់ ហាមការធ្វើនេសាទនៅក្នុងតំបន់ស្នូល និងតំបន់រណប ព្រោះសត្វផ្សោតវាធ្វើការបំលាស់ទី ទៅមកនៅខែវស្សា ទឹកឡើងធំ ក្នុងរដូវបិទនេសាទនេះ ហើយប្រសិនបើប្រទះឃើញមានមងសន្ទូច ដាក់ក្នុងតំបន់ហាមឃាត់ទាំងនេះ ត្រូវប្រមូលយកមកបំផ្លាញចោល។

លោក សា ថាន ប្រធានសហគមន៍នេសាទកោះជ្រីម បានបញ្ជាក់ថា៖ ជារៀងរាល់ថ្ងៃប្រជាសហគមន៍បានសហការជាមួយមន្ត្រីឆ្នាំចុះ ធ្វើល្បាតក្នុងមួយថ្ងៃ៣លើក ដើម្បីបង្កើនការការពារកូនសត្វផ្សោតនេះ។

លោកបន្តថា៖ នៅក្នុងរដូវបិទនេសាទផងនិងមានការយល់ដឹងពីប្រជាអ្នកនេសាទផងមិនមានអ្នកទៅដាក់មង ចងសន្ទូចនៅក្នុងតំបន់ហាមឃាត់នោះទេ។

មន្ត្រីអភិរក្សសត្វផ្សោត បានឱ្យដឹងថា កូនផ្សោតកើតថ្មីនេះ ត្រូវបានប្រទះ ឃើញនៅវេលាម៉ោង ១២កាលពីថ្ងៃទី០២ ខែកញ្ញា ឆ្នាំ២០២៣ កន្លងមកនៅក្នុងក្រុមហ្វូងសត្វផ្សោតធំ ដែលមានចំនួនប្រមាណប្រាំបីក្បាល នៅចំណុចកន្ទុយកោះជ្រឹម ក្នុងអន្លង់ផ្សោតត្បូងខ្លា ក្នុងឃុំអូរម្រះ ស្រុកសៀមបូក ខេត្តស្ទឹងត្រែង ក្នុងពេលដែលមន្ត្រីក្រុម អង្គការ WWF បានបំពេញការងារចុះអង្កេតស្ថានភាពសត្វផ្សោតទន្លេមេគង្គ។

សូមបញ្ជាក់ថា កូនសត្វផ្សោតដែលបានប្រទះឃើញថ្មីនេះ គឺជាកូនសត្វផ្សោតទី៧ដែលក្រុមផ្នែកអភិរក្សរបស់អង្គការ WWF បានធ្វើកំណត់ត្រា ចាប់ពីខែមករារហូតមកទល់ខែកញ្ញានៅក្នុងឆ្នាំ២០២៣ នេះ៕

អត្ថបទ៖ ងិនលីម