ព័ត៌មានជាតិ

កម្ពុជា-ឥណ្ឌា រំលេចការពង្រឹងពង្រីកទំនាក់ទំនងលើគ្រប់វិស័យ

បានផុស

៨ ខែ មុន

នៅ

ថ្ងៃពុធ ២០ កញ្ញា ២០២៣

ដោយ

កម្ពុជា-ឥណ្ឌា ធ្វើការកត់សម្គាល់នូវទំនាក់ទំនង និងកិច្ចសហប្រតិបត្តិការប្រទេសទាំងពីរ ដោយបានរំលេចពីការពង្រឹង និងពង្រីកទំនាក់ទំនងលើគ្រប់វិស័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីរសៀលថ្ងៃអង្គារ ទី ១៩ ខែកញ្ញា ឆ្នាំ ២០២៣ ឯកឧត្តម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានទទួលជួបលោកស្រី Devyani Khobragade ឯកអគ្គរដ្ឋទូត នៃសាធារណរដ្ឋឥណ្ឌាប្រចាំកម្ពុជា តបតាមការស្នើរបស់ស្ថានទូតឥណ្ឌា នៅទីស្ដីការក្រសួងមុខងារសាធារណៈ។

នាឱកាសនោះ លោកស្រីឯកអគ្គរដ្ឋទូត បានអបអរសាទរជូនចំពោះឯកឧត្ដមរដ្ឋមន្ត្រី ដែលទទួលបានការផ្ដល់សេចក្ដីទុកចិត្តពីរាជរដ្ឋាភិបាលកម្ពុជា ក្នុងតួនាទីថ្មី សម្រាប់អាណត្តិទី ៧ ខណៈឯកឧត្ដមរដ្ឋមន្ត្រី ក៏បានចូលរួមអបអរសាទរសាធារណរដ្ឋឥណ្ឌា ចំពោះភាពជោគជ័យ នៃការធ្វើជាម្ចាស់ផ្ទះកិច្ចប្រជុំកំពូល G20 ថ្មីៗនេះ ក្នុងទីក្រុងញូដេលី ផងដែរ។

ឯកឧត្ដមរដ្ឋមន្ត្រី និងលោកស្រីឯកអគ្គរដ្ឋទូត បានធ្វើការកត់សម្គាល់នូវទំនាក់ទំនង និងកិច្ចសហប្រតិបត្តិការកម្ពុជា-ឥណ្ឌា ដោយ «រំលេចពីការពង្រឹង និងពង្រីកទំនាក់ទំនងលើគ្រប់វិស័យ ទាំងនៅកម្រិតទ្វេភាគី និងក្នុងវេទិកាពហុភាគី ហើយនឹងការបន្តរក្សាទំនាក់ទំនង ឈរលើមូលដ្ឋានផ្ដល់ប្រយោជន៍ដល់ជាតិ និងប្រជាជន នៃប្រទេសទាំងពីរ»។

ជាមួយគ្នានេះ ថ្នាក់ដឹកនាំទាំងពីរ ក៏បានចែករំលែកអំពីស្ថានភាព និងកិច្ចការក្នុងវិស័យមុខងារសាធារណៈ នៃប្រទេសកម្ពុជា និងឥណ្ឌា ព្រមទាំងពិភាក្សា ផ្លាស់ប្ដូរបទពិសោធន៍លើរចនាសម្ព័ន្ធ និងការងាររដ្ឋបាលសាធារណៈជារួមផងដែរ។

គួរជម្រាបថា តាមរយៈកិច្ចសំណេះសំណាលនេះទៀតសោត បានអនុញ្ញាតឲ្យស្ថាប័នទាំងពីរ បន្តពិភាក្សា និងគិតគូររួមគ្នាលើគំនិតផ្ដួចផ្ដើម និងកិច្ចសហប្រតិបត្តិការថ្មីៗ បន្ថែម ឆ្ពោះទៅមុខ ក្នុងវិស័យមុខងារសាធារណៈ ជាពិសេសលើការបណ្ដុះបណ្ដាល ឬ កម្មវិធីអភិវឌ្ឍន៍សមត្ថភាពនានាដែលពាក់ព័ន្ធ៕

អត្ថបទ ៖ ពិសី