ព័ត៌មានជាតិ

សម្រាប់រៀបចំពិធីបុណ្យសមុទ្រលើកទី១០ ជុំទី៣ នៅខេត្តកែបចាប់ពីថ្ងៃទី១រហូតដល់ថ្ងៃទី៣ ខែធ្នូ ឆ្នាំ ២០២៣ ខាងមុខនេះ

បានផុស

៣ years មុន

នៅ

ថ្ងៃព្រហស្បតិ៍ ២៨ កញ្ញា ២០២៣

ដោយ

កែប ៖ នាថ្ងៃទី២៨ ខែកញា ឆ្នាំ២០២៣នេះ លោក ទិត ចន្ថា រដ្ឋលេខាធិការប្រចាំការក្រសួងទេសចរណ៍ និង លោក សោម ពិសិដ្ឋ អភិបាលខេត្តកែប បានដឹកនាំកិច្ចប្រជុំជាមួយអង្គភាពពាក់ព័ន្ធដើម្បីសម្រាប់រៀបចំពិធីបុណ្យសមុទ្រលើកទី១០ ជុំទី៣ នៅខេត្តកែបដើមខែធ្នូឆ្នាំ ២០២៣នាពេលខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សោម ពិសិដ្ឋ អភិបាលខេត្តកែប មានប្រសាសន៍ថា ឱ្យមន្ទីរអង្គភាពពាក់ព័ន្ធដើម្បីក្រៀមសម្រាប់រៀបចំពិធីបុណ្យសមុទ្រលើកទី១០ ជុំទី៣ នៅខេត្តកែបឆ្នាំនេះ និងកំណត់យកថ្ងៃប្រារព្ធពិធីជាផ្លូវការគឺ នៅថ្ងៃទី១រហូតដល់ថ្ងៃ៣ ខែធ្នូ ឆ្នាំ២០២៣នាពេលខាងមុខ។

រៀបចំពិធីព្រឹត្តិការណ៍បុណ្យសមុទ្រ ដ៏អស្ចារ្យសម្រាប់ខេត្តកែបដើម្បីបង្ហាញអោយពិភពលោកបានដឹងភាព ជោគជ័យរបស់កម្ពុជា នឹងមានការរីកចម្រើន សេដ្ឋកិច្ច សង្គមកិច្ច និងធានាបាននៅសុវត្ថិភាពសម្រាប់ប្រជាពលរដ្ឋ ភ្ញៀវទេសចរ និងអ្នកវិនិយោគ ដែលមកលេងកំសាន្ដនៅប្រទេសកម្ពុជា ក៏ដូចជាខេត្តកែបរបស់យើងផងដែរ។

ក្នុងនោះដែរ លោក សោម ពិសិដ្ឋអភិបាលខេត្តកែប បានប្តេជ្ញាចិត្ត ណែនាំជំរុញដល់មន្ទីរអង្គភាពពាក់ព័ន្ធនានា ក្នុងរយៈពេលពីរខែនេះ ត្រូវយកចិត្តទុកដាក់ខិតខំ ចំពោះការកែលំអឱ្យមានសោភ័ណ្ឌភាព សម្អាតអនាម័យបរិស្ថាន ថែរក្សាសន្តិសុខ សុវត្ថិភាព សណ្ដាប់ធ្នាប់សាធារណៈ ទាំងកន្លែងប្រារព្ធពិធី និងកន្លែងផ្សេងៗទៀត ឱ្យបានសមរម្យ ដូចនេះសូមគ្រប់មន្ទីរទាំងអស់ សហការគ្នាធ្វើយ៉ាងណាឱ្យការងារនេះប្រព្រឹត្តទៅបានយ៉ាងរលូន ទាំងការគ្រប់គ្រងទុកដាក់សំរាម កាកសំណល់រឹងរាវ ក្នុងពេលរៀបចំព្រឹត្តិការណ៍ និងក្រោយពេលព្រឹត្តិការណ៍ចប់។

លោក ទិត ចន្ថា រដ្ឋលេខាធិការប្រចាំការក្រសួងទេសចរណ៍បានបញ្ជាក់ឱ្យដឹងថា ព្រឹត្តិការណ៍បុណ្យសមុទ្រជុំទី ៣នៅខេត្តកែប ជាព្រឹត្តិការណ៍មួយដ៏ធំជួយលើកស្ទួយ វិស័យទេសចរណ៍ខេត្ត នឹងបង្កើនប្រាក់ចំណូលដល់ប្រជាពលរដ្ឋក្នុងមូលដ្ឋានខេត្តកែប ម្យ៉ាងទៀតបុណ្យសមុទ្រនេះនឹងរួមចំណែកជួយផ្សព្វផ្សាយពីសក្តានុពលវិស័យទេសចរណ៍ក្នុងខេត្តកែប ក៏ដូចជាប្រទេសកម្ពុជាទាំងមូលឱ្យល្បីល្បាញសាកសមជាតារារះនាទិសនារតី ហើយក៏ជាព្រឹត្តិការណ៍មួយដែលជួយជំរុញឱ្យកំណើនសេដ្ឋកិច្ចខេត្តកែប កាន់តែរីកចម្រើនមួយកម្រិតទៀត។

ក្នុងនោះដែរ លោកបន្ថែមថា បុណ្យសមុទ្រនៅឆ្នាំនេះ មានការរៀបចំកម្មវិធីជាច្រើនដូចជា រត់ប្រណាំង និង ប្រដាល់គុណខ្មែរ មហោស្រពម្ហូបអាហារ តាំងពិព័រណ៍សមិទ្ធផលនានា និងការប្រគំតន្ដ្រីមហាជន។ល។

ទោះជាយ៉ាងណា លោក ទិត ចន្ទថា រដ្ឋលេខាធិការក្រសួងទេសចរណ៍ស្នើឱ្យរដ្ឋបាលខេត្តកែប និងមន្ទីរពាក់ព័ន្ធទាំងអស់គួរពិនិត្យរកកន្លែងទីតាំងណាសម្របសម្រួលដែលសាកសមសម្រាប់ប្រារព្ធពិធីបុណ្យសមុទ្រនេះ ហើយសូមឱ្យខិតខំកៀរគររកដៃគូធ្វើកិច្ចសហការជាមួយវិស័យឯកជន និងគ្រប់មន្ទីរពាក់ព័ន្ធដើម្បីត្រៀមឱ្យព្រឹត្តិការណ៍បុណ្យសមុទ្រលើកទី១០ ជុំទី៣ នៅខេត្តកែបបានប្រព្រឹត្តទៅដោយភាពរលូនបានជោគជ័យ៕

ដោយ ៖ សឹង រ៉ាត់