រដ្ឋបាលរាជធានី​នឹងពង្រីកលូប្រឡាយ​ឲ្យ​ធំជាងមុន​ដើម្បីបញ្ចៀសការជន់លិច

រដ្ឋបាលរាជធានីភ្នំពេញនឹងពង្រីកលូប្រឡាយបង្ហូរទឹកពីតូចទៅធំ ដំឡើងស្ថានីយបូមទឹក​ឲ្យ​កាន់តែធំជាងមុននិងការដំឡើងស្ថានីយបូមទឹកថ្មីថែមទៀត ដើម្បីបញ្ចៀសការជន់លិចដោយជំនន់ទឹកភ្លៀងនៅក្នុងភូមិសាស្រ្តរាជធានីភ្នំពេញ ស្របពេលដែលប្រជាពលរដ្ឋរស់នៅភ្នំពេញមានភាពស៊ីវីល័យ។ នេះជាការលើកឡើងរបស់លោក ឃួង ស្រេង អភិបាលនៃគណៈអភិបាលរាជធានីភ្នំពេញខណៈលោកដឹកនាំកិច្ចប្រជុំ រៀបចំផែនការវិនិយោគហេដ្ឋារចនាសម័្ពន្ធប្រព័ន្ធលូ និងប្រព័ន្ធ​រំដោះទឹកសម្រាប់បញ្ចៀសការជន់លិចនៅភូមិសាស្រ្តរាជធានីភ្នំពេញ ជាមួយអភិបាលខណ្ឌទាំង ១៤ និងមន្ទីរពាក់ព័ន្ធ នាព្រឹកថ្ងៃទី ០៤ ខែតុលា ឆ្នាំ២០២៣ នៅសាលារាជធានីភ្នំពេញ។

លោក ឃួង ស្រេង មានប្រសាសន៍លើកឡើងថា រាជធានីភ្នំពេញ ការរៀបចំប្រព័ន្ធលូ​ប្រឡាយរំដោះទឹកបានល្អប្រសើរ រហូតទទួលបានការកោតសរសើរពីអន្តរជាតិនិងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី។ ទោះបីជាយ៉ាង​ណាក្តីក៏នៅតែមានបញ្ហាប្រឈមខ្លះ ដែលទាមទារ​ឲ្យ​​រួមគ្នាដើម្បីរកដំណោះស្រាយធ្វើយ៉ាងណាបញ្ចៀស​​ឲ្យ​បានពីការ​លិចលង់​នៅពេលដែលមានភ្លៀងធ្លាក់ខ្លាំងនិងយូរម្តងៗ។

លោក ឃួង ស្រេង បន្តថា ការប្រជុំនេះមានគោលបំណងប្រមូលព័ត៌មានជុំវិញប្រព័ន្ធលូប្រឡាយឲ្យ​បានគ្រប់ជ្រុងជ្រោយ ដើម្បីរិះរកវិធានការថ្មីៗបន្ថែមទៀត ឈានទៅរកការរំដោះទឹកក្នុងរាជធានីភ្នំពេញ​ឲ្យ​បានកាន់តែល្អប្រសើរ និងប្រើប្រាស់បានយូរអង្វែងពិសេសការបង្វែរផ្លូវទឹកពីខេត្តកំពង់ស្ពឺកុំចូលមករាជធានីភ្នំពេញ។

លោក ឃួង ស្រេង បានបន្ថែមទៀតថា តាមគោលការណែនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី រាជធានីភ្នំពេញ ក្នុងរយៈពេល ៤ ឆ្នាំ ត្រូវអភិវឌ្ឍន៍ហេដ្ឋារចនាសម្ព័ន្ធក្រោមដី​ឲ្យ​បានល្អ ធ្វើយ៉ាងណាកុំឲ្យ​មានការគំរាមកំហែង​ពីជំនន់ទឹកភ្លៀង។ ការងារនេះរដ្ឋបាលរាជធានីភ្នំពេញនឹងប្រជុំជាមួយក្រសួងសេដ្ឋកិច្ចនិងហិរញ្ញវត្ថុ មន្ទីរសាធារការនិងដឹកជញ្ជូនរាជធានីភ្នំពេញ និងមន្ទីរធនធានទឹក​ និងឧតុនិយមរាជធានីភ្នំពេញ​រៀបចំជាផែនការដាក់ទៅអន្តរក្រសួង ដើម្បី​អនុវត្តលើការងារនេះបន្តទៀត។

ក្នុងឱកាសនោះដែរ លោក ឃួង ស្រេង​ក៏បានលើកឡើងពីការគិតគូរចំពោះប្រព័ន្ធលូប្រឡាយ ដែលត្រូវកែលម្អឡើងវិញ ពិសេសគឺការពង្រីកប្រឡាយបង្ហូរទឹកពីតូចទៅធំ ការដំឡើងស្ថានីយបូមទឹក​ឲ្យ​កាន់តែធំជាងមុននិងការដំឡើងស្ថានីយបូមទឹកថ្មីថែមទៀត។ លោកបន្តថា ស្របពេលដែលប្រជាពលរដ្ឋរស់នៅរាជធានីភ្នំពេញ មានភាពស៊ីវីល័យ រដ្ឋបាលរាជធានីភ្នំពេញនឹងរៀបចំជាគម្រោងធំមួយ ដើម្បីដោះស្រាយការលិចលង់ដោយជំនន់ទឹកភ្លៀងនៅរាជធានីភ្នំពេញបានយូរអង្វែងចាប់ពី ២០ ទៅ ៣០ ឆ្នាំ ។

លោកសាំ ពិសិដ្ឋ ប្រធានមន្ទីរសាធារការនិងដឹកជញ្ជូនរាជធានីភ្នំពេញបានលើកឡើងផងដែរថា ការស្ថាបនាប្រព័ន្ធ លូ នៅរាជធានីភ្នំពេញគិតមកដល់ឆ្នាំ២០២២ ស្ថាបនាបានបណ្តាញលូប្រវែងជាង ៩២៤ គីឡូម៉ែត្រ ហើយ​នឹងបន្តស្ថាបនាប្រព័ន្ធលូប្រឡាយជាបន្តបន្ទាប់ទៀត។ បញ្ហាសំខាន់គឺត្រូវ​រក្សា​ឲ្យ​បាននៅអាងស្តុបទឹកដើម្បីរំដោះ​ទឹកចេញពីភ្នំពេញ៕

អត្ថបទ៖ ស្រីរ័ត្ន