រដ្ឋបាលស្រុកទឹកឈូ រៀបចំទូកត្រៀមប្រណាំង​ដើមខែវិច្ឆិកាខាងមុខ

នៅថ្ងៃទី២២ ខែតុលា ឆ្នាំ២០២៣នេះ លោក អ៊ឹម  ច័ន្ទសោធន អភិបាលស្រុកទឹកឈូ បានដឹកនាំមន្រ្តីសាលាស្រុក និងអ្នកពាក់ព័ន្ធ ដើម្បីរៀបចំពិធីលើករាសីប្រោសព្រំដល់ទូកង ទឹកឈូសែនជ័យ ដើម្បីដាក់ទៅក្នុងទីលានហ្វឹកហាត់ ត្រៀមចូលរួមប្រណាំងអបអរ ក្នុងពិធីបុណ្យ អុំទូក  បណ្ដែតប្រទីប  អកអំបុក  និងសំពះព្រះខែរយៈពេល​ពីរថ្ងៃចាប់ពីថ្ងៃទី១០ដល់ថ្ងៃទី ១១ ខែវិច្ឆិកាឆ្នាំ២០២៣ ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចប្រជុំសាមញ្ញ លើកទី៥៣ របស់ក្រុមប្រឹក្សាខេត្តកំពត កាលពី ថ្ងៃទី២០ ខែតុលា ឆ្នាំ២០២៣កន្លងមក​នេះលោក  ម៉ៅ ធនិន អភិបាលខេត្តកំពតមានប្រសាសន៍ថា បើមិនមានការប្រែប្រួលនោះទេ រដ្ឋបាលខេត្តកំពត បានសម្រេចជ្រើសរើសយកថ្ងៃទី១០-១១ ខែវិច្ឆិកា ឆ្នាំ ២០២៣ ដើម្បីប្រារព្ធពិធីប្រណាំងទូកង ខ្នាតប្រពៃណី​និងធ្វើឡើងនៅតាមបណ្ដោយឆ្នេរព្រែកកំពង់បាយ នៅមុខសាលា ខេត្តកំពតចាស់តែម្តង។

លោក ម៉ៅ ធនិន អភិបាលខេត្តកំពត ក៏បានលើកឡើងទៀតថា នៅខេត្តកំពត ត្រូវរៀបចំឱ្យព្រឹត្តិការណ៍​ប្រណាំង​ទូកងខ្នាតប្រពៃណីឱ្យធំជាងមុន ដើម្បីទាក់ទាញយកភ្ញៀវទេសចរជាតិនិងអន្តរជាតិ ឱ្យមកលេង​កម្សាន្តនៅខេត្តកំពត កាន់តែច្រើនបន្ថែមទៀត ដើម្បីបង្កើតប្រាក់ចំណូលដល់ប្រតិបត្តិករ នៅក្នុងពិធីព្រឹត្តិការណ៍មួយនេះ និងបង្កើតឱ្យ​មានព្រឹត្តិការណ៍ធំៗ កម្សាន្តឱ្យសប្បាយបានច្រើន។

រដ្ឋបាលខេត្តកំពត បានរៀបចំធ្វើការប្រណាំងទូកងខ្នាតប្រពៃណីនេះចំនួន ២លើក រួចមកហើយនៅ​ក្នុងឆ្នាំ២០២២​កន្លងទៅ ដោយលើកទី១ គឺប្រណាំងទូកង ខ្នាតប្រពៃណី និងលើកទី២ ប្រណាំងទូកនេសាទ ហើយសម្រាប់ឆ្នាំនេះ​រដ្ឋបាលខេត្តធ្វើការប្រណាំងទូកង ខា្នតប្រពៃណី ដើម្បីអបអរសាទរព្រះរាជពិធីបុណ្យអុំទូក អកអំបុក សំពះព្រះខែ និងបណ្តែតប្រទីបនេះនិងមានព្រឹត្តិការណ៍ប្រគុំតន្ត្រី ហើយនិងមានការបាញ់កាំជ្រួច តាំងពិព័រណ៍ ភូមិមួយ ផលិតផលមួយនៅក្នុងពិធីប្រណាំងទូកចំនួន២ថ្ងៃនេះផងដែរ។

អត្ថបទ៖ សឹង រ៉ាត់