ព័ត៌មានជាតិ

មកដឹងប្រវត្តិទូកងដ៏ល្បីប្រកួតមិនដែលចាញ់នៅវត្តឯករង្សីខេត្តបាត់ដំបង ត្រៀមចូលរួមប្រកួតនៅភ្នំពេញ

បានផុស

៣ years មុន

នៅ

ថ្ងៃសៅរ៍ ៤ វិច្ឆិកា ២០២៣

ដោយ

ព្រះគ្រូចៅអធិការវត្តឯករង្សី លោកតា ចម ចិត្រ មានសង្ឃដីកាប្រាប់ពីប្រវត្តិទូកង “នរិន្ទរង្សី សពិជ័យចិត្របុត្រ” ដែលល្បីខ្ទរខ្ទារជាទូកដ៏ខ្លាំងនៅខេត្តបាត់ដំបង ដែលតែងតែនាំជ័យជំនះគ្រប់ការប្រកួតរហូតអ្នកស្រុកហៅរហ័សនាមអធិរាជស្ទឹងសង្កែ។

លោកតា ចម ចិត្រ មានសង្ឃដីកាប្រាប់ថា ទូកដ៏ល្បីនៅខេត្តបាត់ដំបងនេះមានប្រភពយកមកពីតំបន់កោះញ៉ែកក្នុងខេត្តមណ្ឌលគីរី ដែលបានដឹកមកដល់វត្តឯករង្សីក្នុងទឹកដីខេត្តបាត់ដំបងកាលពីឆ្នាំ២០១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកតាចៅអធិការមានសង្ឃដីកាអះអាងថា ទូកងមួយនេះគឺរូបលោកតាផ្ទាល់ និងព្រះគ្រូមង្គលចរិយា វុឌ្ឍីសារ៉ាត់ សេងវឌ្ឍន៍ ចៅអធិការវត្តសិរីមង្គល ស្រុកមង្គលបុរី បន្ទាយមានជ័យ ព្រមទាំងលោក វណ្ណ វណ្ណ: ដែលផ្តួចផ្តើមបង្កើតឡើងដោយគ្មានជំនួយពីខាងក្រៅទេ។

ទូកនេះមានប្រវែង ៣៣,៨ ម៉ែត្រ មានចំណុះ ៧២ នាក់ ធ្វើឡើងពីដើមគគីយកពីតំបន់កោះញ៉ែកខេត្តមណ្ឌលគីរី ដែលជាតំបន់សម្បូរទៅដោយដើមគគីធំៗ។ ចំណែកឈ្មោះទូក “នរិន្ទរង្សី សពិជ័យចិត្របុត្រ” គឺលោកតាជាអ្នកដាក់ផ្ទាល់។

ទូកង “នរិន្ទរង្សី សពិជ័យ ចិត្របុត្រ” ដែលនៅក្រោមការគ្រប់គ្រងរបស់វត្តឯករង្សី កន្លងទៅបានជួបហេតុការណ៍ដោយមានដើមពង្រមួយដើម បាក់រលំសង្កត់បង្កការខូចខាតមួយចំនួនតែមិនប៉ះពាល់ធ្ងន់ធ្ងរនោះទេ។ យ៉ាងណាមិញក្នុងការចូលរួមប្រកួតថ្នាក់ខេត្តដែលរៀបចំឡើងកាលពីពេលថ្មីៗនេះ ទូកងដ៏ល្បីដែលពលរដ្ឋផ្តល់រហ័សនាមថាអធិរាជស្ទឹងសង្កែនេះនៅតែគ្រងតំណែងជាប់ជយលាភីលេខ ១ ពីការប្រកួតប្រជែង។

ដោយឡែកសម្រាប់ការចូលរួមការប្រកួតថ្នាក់ជាតិនៅរាជធានីភ្នំពេញ បើតាមព្រះគ្រូចៅអធិការវត្តឯករង្សី មិនទាន់សង្ឃឹមយ៉ាងណានោះទេ ខណះមានទូកខ្លាំងៗច្រើនមកពីបណ្តាខេត្តផ្សេងៗ។ យ៉ាងណាក៏នឹងប្រឹងប្រែងឲ្យបានលទ្ធផលល្អដូចរដូវកាលមុនៗ។

ព្រះគ្រូចៅអធិការវត្តឯករង្សីបានបញ្ជាក់ថា ខណៈការប្រកួតប្រជែងប្រណាំងអុំទូកដែលរៀបចំឡើងនៅរាជធានីភ្នំពេញកាន់តែកៀកមកដល់ ការដឹកជញ្ជូនយកទៅប្រកួតអាចធ្វើឡើងតាមផ្លូវគោកដែលមានសុវត្ថិភាពជាង បើសិនផ្លូវទឹកមានការប្រែប្រួល៕

អត្ថបទ៖ សៅ សារិទ្ធ

Related Topics:ខេត្តបាត់ដំបង