គម្រោង​អភិវឌ្ឍ​កោះនរា​ មកដល់​ពេលនេះចាយ​វិនិយោគ​អស់​ជាង ៣០០ លាន​ដុល្លារ​

បើតាមការ​បញ្ជាក់​ពី​អ្នក​ឧកញ៉ា​ ពុង ឃាវសែ បាន​បង្ហាញ​ខ្ទង់​ចំណាយ​លើ​ការ​វិនិយោគ​អភិវឌ្ឍ​កោះនរាមកដល់ពេលនេះ​​អស់​ជាង ៣០០ លាន​ដុល្លារ និង​គ្រោង​ចាយ​ខ្ទង់​រយលាន​ដុល្លារ​ទៀត​លើការអភិវឌ្ឍ​ទាំង​មូល។

ថ្លែង​ក្នុងពិធីសម្ពោធ​ស្ពានកោះនរា​ អ្នក​ឧកញ៉ា ពុង ឃាវសែ អគ្គនាយកក្រុមហ៊ុន OCIC បាន​បង្ហាញ​ពី​កញ្ចប់​ចំណាយដើម្បី​រៀបចំ​អភិវឌ្ឍ​កោះនរាជា​ទីក្រុង​ឆ្លាតវ័យ Smart City លើការ​សាងសង់​ហេដ្ឋារចនាសម្ព័ន្ធមានដូចជា ការ​សាងសង់​​ប៉េតុង​ច្រាំង​ទន្លេ ប្រព័ន្ធលូក្រោម​ដី​ អំពូល​ភ្លើង​ប្រភេទ​សូឡា ប្រព័ន្ធ​កាមេរ៉ា ផ្លូវ សួនច្បារ ការ​សាងសង់ស្ថានីយទឹកស្អាត ជាពិសេស​ស្ពាន​​ភ្ជាប់​ពី​កោះពេជ្រ​មក​កោះនរា ​និង​ហេដ្ឋារចនាមស្ព័ន្ធរូបវន្ត​ជាច្រើនទៀត។

អ្នកឧកញ៉ា​ថា គ្រាន់តែ​ចំណាយលើប្រាក់បៀវត្សកម្មករ វិស្វករជាង ៥០០ នាក់ ក្នុង​មួយ​ខែ​អស់​ជាង ៣០ ម៉ឺន​ដុល្លារ និង​តម្រូវការកំលាំងកម្មករ​ប្រមាណ ១២០០ នាក់ ដែល​ត្រូវ​ការចំណាយលើប្រាក់បៀរវត្សប្រហែល ៥០ ម៉ឺនដុល្លារក្នុងមួយខែ​។ បើតាម​អ្នក​ឧកញ៉ា ការ​ចំណាយមកដល់ពេលនេះអស់ជាង ៣០០ លាន​ដុល្លារ និង​ការ​អភិវឌ្ឍ​​គ្រោង​ចំណាយ​ខ្ទង់​រយលាន​ដុល្លារ​ទៀត។

ការ​ចាប់ផ្តើម​អភិវឌ្ឍ​ទីក្រុង​រណប​កោះនរា ​ក្នុង​អំឡុង​ពេល​ផ្ទុះ​កូវីដ ១៩ ដែល​ប៉ះពាល់​ដំណើរការ​អភិវឌ្ឍ ប៉ុន្តែ​ដោយសារ​មាន​វិធានការ​គ្រប់គ្រង​ការ​រាលដាល​និង​យុទ្ធនាការ​ចាក់ស្រោច​​វ៉ាក់សាំង នាំ​ឲ្យ​ដំណើរការ​អភិវឌ្ឍ​ប្រព្រឹត្តិ​ទៅ​តាម​ផែនការ ជាពិសេស​ការ​​ស្ពាន​កោះនរា​ដែល​សាងសង់​សម្រេច​បាន​មុន​ផែនការ​។

អ្នក​ឧកញ៉ា ពុង ឃាវសែ បាន​បញ្ជាក់ថា​ តាមរយៈ​ស្ពានតភ្ជាប់ពីកោះនរាមកកោះពេជ្រ បានកាត់បន្ថយនិង​សម្រួល​ការ​ធ្វើ​ដំណើរ​របស់ពលរដ្ឋ​បានយ៉ាងច្រើន។ អ្នកឧកញ៉ា​បានលើកពីចរាចរណ៍​ធ្វើ​ដំណើរពី​​វិមានឯករាជ្យ​មក​​វត្តនិរោធន៍ក្នុង​ខណ្ឌ​ច្បារអំពៅ ដែល​មុន​បើកឲ្យប្រើប្រាស់ស្ពាន​​តភ្ជាប់​កោះពេជ្រ​មកកោះនរា​​បណ្តោះអាសន្ន​ ​ការធ្វើ​ដំណើរ​ទៅមកតំបន់ទាំងពីរ​​​ដោយសារ​​មាន​ការកកស្ទះត្រូវ​ចាយពេលពី​​ ១ ម៉ោង ទៅ ២ ម៉ោង​ក្នុង​ចម្ងាយ​ផ្លូវ​តែ​ជាង ៥ គីឡូម៉ែត្រ។

អ្នក​ឧកញ៉ា​បានបន្ត​ថា ហេដ្ឋារចនាសម្ព័ន្ធ​នៅ​ទីក្រុងរណបកោះនរានឹង​ត្រូវ​បញ្ចប់​នៅក្នុងឆ្នាំ ២០២៥ ខាងមុខ ដោយ​ត្រូវ​ចំណាយខ្ទង់រយលានដុល្លារបន្ថែមទៀត ដោយមិនរាប់បញ្ចូលការសាងសង់អគារនោះទេ៕