លោកទេសរដ្ឋមន្ត្រី​ លី​ ធុជ​ ដឹកនាំកិច្ចប្រជុំគណៈកម្មការនានានៃ​អនុសញ្ញា​អូតាវ៉ា​ ដើម្បីសម្របសម្រួលកិច្ចការពាក់ព័ន្ធកិច្ចប្រជុំឆ្នាំ ២០២៤

នៅថ្ងៃទី ២៧ ខែវិច្ឆិកា ឆ្នាំ ២០២៣ លោកបណ្ឌិត លី ធុជ ទេសរដ្ឋមន្ត្រី ក្នុងនាមជាប្រធានសន្និសីទត្រួតពិនិត្យឡើងវិញលើកទី ៥ នៃអនុសញ្ញាអូតាវ៉ា បានដឹកនាំកិច្ចប្រជុំគណៈកម្មការនានា ដើម្បីសម្របសម្រួលកិច្ចការដែលពាក់ព័ន្ធនឹងកិច្ចប្រជុំផ្លូវការ និងក្រៅផ្លូវការរបស់គណៈកម្មការ នៃអនុសញ្ញាសម្រាប់ឆ្នាំ ២០២៤។

គណៈកម្មការ នៃអនុសញ្ញាអូតាវ៉ាមានចំនួន ៤៖ គណៈកម្មការអនុវត្តមាត្រា ៥ គណៈកម្មការជួយជនរងគ្រោះ គណៈកម្ម ការពង្រឹងកិច្ចសហប្រតិបត្តិការ និងជំនួយ និងគណៈកម្មការអនុលោមភាពសហប្រតិបត្តិការ ដែលមានឯកអគ្គរដ្ឋទូត/រាជទូតប្រចាំនៅទីក្រុងហ្សឺណែវជាសមាជិក មកពីប្រទេសកូឡុំប៊ី ស៊ុយអែត ថៃ អង់គ្លេស ស្លូវេនៀ ហ្សំបាវ៉េ ប៊ូគីណូបាសូ ហូឡង់ អាល់ហ្សឺរី ជប៉ុន តួកគី ដាណឺម៉ាក ន័រវេស្ស និងអាហ្វ្រិកខាងត្បូង។

ក្នុងនោះដែរ មានអ្នកអង្កេតការណ៍មកពីអង្គការអន្តរជាតិមួយចំនួន តំណាងអង្គការសហប្រជាជាតិ គណៈកម្មការកាក​បាទក្រហមអន្តរជាតិ អង្គការ ICBL និងអង្គការ GICHD។ លោកទេសរដ្ឋមន្ត្រី ក្នុងនាមសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងអំណរគុណគណៈកម្មការ និងអ្នកអង្កេតការណ៍ទាំងអស់ ចំពោះការគាំទ្រកម្ពុជា និងបានបន្តកិច្ចប្រជុំរៀបចំផែនការការងារ សម្រាប់អនុវត្តក្នុងឆ្នាំ ២០២៤ តាមបែបបទ និងនីតិវិធីរបស់អនុសញ្ញា៕