មកស្គាល់ប្រភេទត្បូងមានតម្លៃថ្លៃបំផុតខ្ទង់ ១០ម៉ឺនដុល្លារ របស់កម្ពុជា

កម្ពុជា មានសម្បត្តិធម្មជាតិមានតម្លៃជាច្រើន កប់នៅក្នុងដី។ ជាក់ស្តែងដូចជា ធនធានរ៉ែ និងត្បូងជាដើម។

ប្រទេសកម្ពុជា មានរ៉ែត្បូងមានតម្លៃជាច្រើនប្រភេទ ដូចជា ត្បូង ruby , sapphire , zircon , period, aquamarine, amethyst and topaz។ ត្បូងដែលមានតម្លៃថ្លៃជាងគេ គឺត្បូងទទឹម(ruby), ត្បូងកណ្តៀង(blue sapphire) , ត្បូងប៊ុត (yellow sapphire) និងត្បូងបឹងកាចាក់(green sapphire) ដែលមានភាពរឹងធុន និងការសឹក៩ចុច (ពេជ្រ១០ចុច)។ ប៉ុន្តែប្រភេទត្បូងទាំងនេះ ជាប្រភេទត្បូងកម្រ។ ត្បូងមួយប្រភេទទៀត ដែលកំពុងពេញនិយម នៅមានក្នុងទឹកដីខេត្តរតនគិរី គឺត្បូង blue Zircon (ត្បូងរតនគិរី) មានកម្រិតរឹង៧.៥ ចុច ដែលស្ថិតនៅយ៉ាងជ្រៅជាង១០ម៉ែត្រក្នុងដី។ zircon មានពីរពណ៌គឺ blue Zircon and yellow Zircon។

លោក ជា  វុទ្ធី  ម្ចាស់ហាង VT GEMSTONE លក់គ្រឿងអលង្ការ និងត្បូងធម្មជាតិ បានឱ្យកម្ពុជាថ្មីដឹងថា ត្បូងទាំងនេះ មានតម្លៃថ្លៃជាងគេនៅប្រទេសកម្ពុជា និងមានភាពស្រស់ស្អាតពីធម្មជាតិទាំងទឹក  ពន្លឺ  និងរាង។

អ្នកជំនាញត្បូងរូបនេះ បានលើកឡើងអំពីតម្លៃដូច្នេះថា ត្បូងទទឹម(ruby) ទំហំ ១០ការ៉ាត់ មានតម្លៃជិត១០ម៉ឺនដុល្លារ ឬលើស ១០ម៉ឺនដុល្លារ ទៅតាមទឹក និងភាពស្អាត។ ដោយឡែក ត្បូងកណ្តៀង ១០ការ៉ាត់ មានតម្លៃចាប់ពី ៥ម៉ឺនដុល្លារ ឡើងទៅ។ ចំណែកត្បូងរតនគិរី (Zircon) ទំហំ ១០ការ៉ាត់ មានតម្លៃចាប់ពី ១ពាន់ដុល្លារឡើងទៅជាង ១ពាន់ដុល្លារ។

បើតាមលោក វុទ្ធី ត្បូងក្នុងប្រទេសកម្ពុជា មាននៅខេត្ត ប៉ៃលិន  រតនគិរី  មណ្ឌលគិរី  កំពង់ធំ  តាកែវ និងព្រះវិហារ។ សព្វថ្ងៃខេត្តដែលមានត្បូងច្រើនជាងគេ គឺខេត្តរតនគិរី សម្បូរទៅដោយត្បូង zircon។

សូមបញ្ជាក់ថា វិស័យត្បូងនៅកម្ពុជា នៅមានកម្រិតនៅឡើយ បើធៀបនឹងប្រទេសជិតខាង ដោយសារកម្ពុជា មិនទាន់​មានសាលាបណ្តុះបណ្តាល ឬមហាវិទ្យាល័យសិក្សាអំពីប្រភេទត្បូង ដូចប្រទេសជិតខាងឡើយ ជាពិសេស​ទៅលើបច្ចេក​ទេសដុត និងច្នៃ។ បច្ចេកទេសដុត និងកែច្នៃត្បូងនៅកម្ពុជា ភាគច្រើនចេះតគ្នា ឬធ្វើតាមទំនៀមទម្លាប់បុរាណ ដែលមិន​ត្រូវតាមស្តង់ដារទីផ្សារក្រៅស្រុក។

រីឯវិសយ័គ្រឿងអលង្ការកម្ពុជា មានការរីកចម្រើន និងអភិវឌ្ឍកើនឡើងជាលំដាប់ ដោយមានការច្នៃប្រឌិតខ្ពស់​ទាំងដោយ​ដៃ និងម៉ាស៊ីនទំនើប។ នេះជាការបញ្ជាក់របស់លោក ជា វុទ្ធី៕