ដំណើរការកែសន្លឹកកិច្ចការ​បេក្ខជនប្រឡងមន្ត្រីកសិកម្មឃុំ ឆ្នាំ ២០២៣ ចាប់ផ្ដើមនៅព្រឹកនេះ រំពឹង​រួច​រាល់ក្នុងសប្ដាហ៍នេះ​

​ដំណើរការកែសន្លឹកកិច្ចការរបស់បេក្ខជន​ប្រឡងប្រជែងជ្រើសរើសមន្ត្រីកសិកម្មឃុំ ឆ្នាំ២០២៣ ​ចាប់ផ្ដើមនៅព្រឹកថ្ងៃទី ១៨ ខែធ្នូ ឆ្នាំ ២០២៣ នៅសាលាភូមិន្ទរដ្ឋបាល រំពឹងថា នឹងរួចរាល់ក្នុង រយៈពេល ១ សប្ដាហ៍។

​ឯកឧត្តម ហ៊ុន ម៉ានី រដ្ឋមន្ត្រីក្រសួងមុខងារសាធារណៈមានប្រសាសន៍ថា ​ដំណើរការកំណែ​ចាប់ផ្ដើមនៅព្រឹកថ្ងៃទី ១៨ ខែធ្នូ ឆ្នាំ ២០២៣ ​ដោយគ្រោងចំណាយពេលប្រមាណ ១ សប្ដាហ៍ ពោលគឺត្រឹមថ្ងៃទី ២៤ ​ដែលក្រុមការងារកំណែអាចបញ្ចប់បាន។

នៅព្រឹកថ្ងៃទី ១៨ ខែធ្នូ ឆ្នាំ ២០២៣ ឯកឧត្តម ហ៊ុន ម៉ានី បានអញ្ជើញពិនិត្យមើលដំណើរការកំណែ នៃការប្រឡងប្រជែង​​ជ្រើសរើសមន្ត្រីកសិកម្មឃុំ ដែលបង្ហាញពីការយកចិត្តទុកដាក់យ៉ាងហ្មត់ចត់ក្នុងការប្រឡងប្រជែងមន្ត្រីកសិកម្មឃុំ ឆ្នាំ២០២៣។

ក្រសួងមុខងារសាធារណៈបានរៀបចំគណៈកម្មការរៀបចំការប្រឡងតាក់តែងវិញ្ញាសារប្រឡងជ្រើសរើសមន្ត្រីកសិកម្មឃុំ ឆ្នាំ ២០២៣ នៅព្រឹកថ្ងៃទី ១៧ ខែធ្នូ ឆ្នាំ ២០២៣ ហើយប្រឡងភ្លាមក្នុងថ្ងៃតែមួយ ដើម្បីធានាតម្លាភាព និងយុត្តិធម៌ មិនមានការបែកវិញ្ញាសា។

ការប្រឡងជ្រើសរើសមន្ត្រីកសិកម្មឃុំ លើកដំបូងបានចាប់ផ្ដើមនៅវេលាម៉ោង ១២៖០០ ថ្ងៃទី ១៧ ខែធ្នូ ឆ្នាំ ២០២៣ ដែលមានវត្តមានអង្គភាពប្រឆាំងអំពើពុករលួយចូលរួមសង្កេតការណ៍ ខណៈក្រសួងក៏បានបំពាក់កាំមេរ៉ាសុវត្ថិភាពតាមបន្ទប់ប្រឡង៕