​បង្ហើរខ្លែង អុំទូកផ្កាចារសមុទ្រ​ ជាកម្មវិធីកម្សាន្តត្រៀមរៀបចំ នៅខេត្តកែប ក្នុងឱកាសបុណ្យឆ្លងឆ្នាំ​សកល​

អភិបាលរងខេត្តកែប លោក ប៊ុន យោង ​បានឱ្យដឹងថា​ ​រដ្ឋបាលខេត្តកែបបានត្រៀមរៀប​ចំកម្មវិធីសប្បាយ​ជាច្រើន ក្នុងឱកាសបុណ្យឆ្លងឆ្នាំសកលខាងមុខនេះ។

កម្មវិធីកម្សាន្តទាំងនោះរៀប​ចំឡើង​រយៈពេល២ថ្ងៃ ចាប់ពីថ្ងៃទី ៣០ ដល់ថ្ងៃទី ៣១ ខែធ្នូ ដើម្បីបង្កើតនូវភាពសប្បាយរីករាយ និងផ្ដល់ជូនដល់ភ្ញៀវទេសចរជាតិ និងអន្តរជាតិ ដែលបានមកលេងលម្ហែកម្សាន្តនៅខេត្តកែប ក្នុងឱកាសពិធីបុណ្យឆ្លងឆ្នាំសកល ២០២៣ ចូល ២០២៤។

កម្មវិធីដែលគ្រោងនឹងរៀបចំធ្វើឡើងរួមមាន​ ពិធីបង្ហើរខ្លែងខ្មែរ ពិធីអុំទូកផ្កាចារសមុទ្រ ប្រគុំតន្ត្រី អុជកាំជ្រួច និងបង្ហោះគោម។

​ខេត្តកែបជាខេត្តនៅជាប់មាត់សមុទ្រ ​ជាគោលដៅនៃការសម្រាកឆ្លងឆ្នាំសកលដ៏មានអត្ថន័យ ​របស់​ប្រជាពលរដ្ឋនៅក្នុងពិភពលោក ក្នុងនោះខេត្តកែប សម្បូរដោយឆ្នេរសមុទ្រ​ជាច្រើនកន្លែង ​និង​មាន​កន្លែងដើរលេងកម្សាន្ត ដែលសុទ្ធសឹងជាគោលដៅខ្ពស់ក្នុងការសម្រាកកម្សាន្ត នាឱកាសពិធីបុណ្យ​ឆ្លងឆ្នាំសកលនាពេលខាងមុខនេះ ក្រៅពីឆ្នេរសមុទ្រ ខេត្តកែបក៏នៅមានកន្លែងកម្សាន្ដ​ជាច្រើន​ទៀត​ដូចជាកន្លែង កសិទេសចរណ៍ តំបន់ភ្នំវល្លិ៍ ដែលមានចម្ការម្រេច និងទីលានប្រ​ណាំង​សេះផងដែរ៕

អត្ថបទ៖ សឹង រ៉ាត់