រដ្ឋទូតមីយ៉ាន់ម៉ា អរគុណកម្ពុជាដែលបានខិតខំ ជួយដោះស្រាយវិបត្តិនៅក្នុងប្រទេសរបស់ខ្លួន

ឯកអគ្គរដ្ឋទូតមីយ៉ាន់ម៉ាប្រចាំនៅកម្ពុជា បានសម្ដែងការអរគុណចំពោះរាជរដ្ឋាភិបាលកម្ពុជា ដែលបានគាំទ្រមីយ៉ាន់ម៉ានៅក្នុងក្របខ័ណ្ឌអាស៊ាន ជាពិសេសកិច្ចខិតខំរបស់កម្ពុជាក្នុងការជួយដោះស្រាយវិបត្តិនយោបាយនៅក្នុងប្រទេសមីយ៉ាន់ម៉ា នាពេលកន្លងមក។

លោកឯកអគ្គរដ្ឋទូតមីយ៉ាន់ម៉ាសម្ដែងការអរគុណបែបនេះ ក្នុងឱកាសដែលលោកបានបញ្ចប់បេសកកម្មការទូតនៅកម្ពុជា ហើយបានចូលជួបជម្រាបលាលោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីក្រសួងការបរទេសកម្ពុជា កាលពីថ្ងៃទី២៦ ខែធ្នូ ឆ្នាំ២០២៣ នាទីស្ដីការក្រសួងការបរទេសកម្ពុជា។ ក្នុងជំនួបនេះ លោកឯកអគ្គរដ្ឋទូត Thit Linn Ohn បានថ្លែងអំណរគុណយ៉ាងជ្រាលជ្រៅចំពោះកិច្ចខិតខំប្រឹងប្រែង និងការគាំទ្ររបស់កម្ពុជាចំពោះមីយ៉ាន់ម៉ានៅក្នុងក្របខ័ណ្ឌអាស៊ាន ដើម្បីដោះស្រាយវិបត្តិនយោបាយនៅក្នុងប្រទេសមីយ៉ាន់ម៉ា ដែលជាការរួមចំណែកដល់សន្តិភាព ស្ថិរភាព និងការអភិវឌ្ឍនៅក្នុងប្រទេសមីយ៉ាន់ម៉ា។

ទន្ទឹមនោះ ទាំងលោកសុខ ចិន្តាសោភា រដ្ឋមន្ត្រីការបរទេសកម្ពុជា និងលោកឯកអគ្គរដ្ឋទូត បានកត់សម្គាល់ដោយការពេញចិត្តចំពោះទំនាក់ទំនង និងកិច្ចសហប្រតិបត្តិការដ៏ជិតស្និទ្ធរវាងកម្ពុជា-មីយ៉ាន់ម៉ា ដែលបានកសាងឡើងលើមូលដ្ឋានដ៏រឹងមាំនៃមិត្តភាព សាមគ្គីភាព និងកិច្ចសហប្រតិបត្តិការយូរអង្វែង ជាពិសេសតាមរយៈការផ្លាស់ប្តូរទស្សនកិច្ចកម្រិតខ្ពស់រវាងថ្នាក់ដឹកនាំនៃប្រទេសទាំងពីរ។

គួរជម្រាបថា ក្នុងនាមជាប្រធានអាស៊ាន ក្នុងឆ្នាំ២០២២ កន្លងទៅ កម្ពុជា ជាពិសេសសម្ដេចតេជោ ហ៊ុន សែន ដែលជាអតីតនាយករដ្ឋមន្ត្រីនៃកម្ពុជា បានសម្រេចចាត់តាំងឱ្យមានប្រេសិតពិសេសរបស់ប្រធានអាស៊ានស្ដីពីវិបត្តិនៅមីយ៉ាន់ម៉ា ដែលកាលនោះ អតីតប្រមុខការទូតកម្ពុជា លោក ប្រាក់ សុខុន ត្រូវបានតែងតាំងជាប្រេសិតពិសេសនេះ។ ជាមួយគ្នានេះ ទាំងសម្ដេចតេជោ និងលោក ប្រាក់ សុខុន ក៏បានផ្ដើមដំណើរទស្សនកិច្ចការងារទៅកាន់ប្រទេសមីយ៉ាន់ម៉ាជាបន្តបន្ទាប់​ ដើម្បីជួបជាមួយគ្រប់ភាគីទាំងអស់នៅមីយ៉ាន់ម៉ាក្នុងការជួយសម្របសម្រួលដោះស្រាយវិបត្តិក្នុងប្រទេសដែលសមាជិកអាស៊ានមួយនេះ៕