​ក្រុមហ៊ុនដេញថ្លៃគម្រោងធ្វើផ្លូវឃុំ មួយ ​នៅខេត្តស្ទឹងត្រែង ជាប់ឈ្មោះក្នុងបញ្ជីខ្មៅ

រដ្ឋបាលខេត្តស្ទឹងត្រែងបានសម្រេចដាក់ក្រុហ៊ុនដេញថ្លៃគម្រោងសាងសង់ផ្លូវ ឃុំ-សង្កាត់មួយក្នុងបញ្ជីខ្មៅមិនឱ្យទទួលបានសិទ្ធលើការដេញថ្លៃគម្រោងទៀតនោះទេ បន្ទាប់ពីរកឃើញថា ក្រុមហ៊ុនមួយនេះ ឃុបឃិតគ្នាជាមួយមន្ត្រីបច្ចេកទេសបំប៉ោងគម្រោង​យកលុយអស់រាប់លានរៀល។

យោងតាមលិខិតរបស់រដ្ឋបាលខេត្តស្ទឹងត្រែងបញ្ជាក់ថា ក្រុមហ៊ុនសុធីរាជ ឃិនស្ត្រាក់សិន ដែលមានលោក ម៉ៅ អេង ជាប្រធានក្រុមហ៊ុនត្រូវដាក់ឲ្យស្ថិតនៅក្នុងបញ្ជីខ្មៅ។ សេចក្តីសម្រេចនេះធ្វើឡើងបន្ទាប់ពីក្រុមហ៊ុនមួយនេះដេញថ្លៃបានគម្រោងស្ថាបនាផ្លូវមួយខ្សែចម្ងាយ ១០ គីឡូម៉ែត្រនៅឃុំស្រែសំបូរ ស្រុកសៀមប៉ាង និងផ្លូវចាក់បេតុងមួយខ្សែនៅសង្កាត់ស្រះឬស្សី​ក្រុងស្ទឹងត្រែង សម្រាប់កញ្ចប់ថវិកាឆ្នាំ ២០២៤។

កាលពីដើមឆ្នាំ ២០២៣ ក្រុមហ៊ុនមួយនេះ ក៏ធ្លាប់ត្រូវបានក្រុមហ៊ុនចំនួន ៤បានដាក់ពាក្យបណ្ដឹងទៅរដ្ឋបាលខេត្ត និងក្រសួងពាក់ព័ន្ធមួយចំនួនប្តឹងក្រុមហ៊ុនឈ្មោះ សុធារាជ ឃិនស្ត្រាក់សិន ដោយចោទប្រកាន់ថា បានឃុបឃិតគ្នាជាមួយមន្ត្រីបច្ចេកទេសបំប៉ោងគម្រោងដើម្បីយកលុយរាប់លានរៀល។

ក្រោយពីមានបាតុភាពបែបនេះរដ្ឋបាលខេត្តស្ទឹងត្រែងបានកែសម្រួលមន្ត្រីទាំងនោះ និងសម្រេចដាក់ក្រុមហ៊ុនមួយនេះឲ្យស្ថិតនៅក្នុងបញ្ជីខ្មៅពុំមានសិទ្ធិដេញថ្លៃលើគម្រោងណាមួយតទៅទៀតនោះទេ។

ប្រភពពីមន្ត្រីក្នុងការដាក់ឲ្យដេញថ្លៃបានបង្ហើបឲ្យដឹងថា ចាប់ពីថ្ងៃទី ៥ មករាឆ្នាំ ២០២៤ ក្រុមហ៊ុនសុធីរាជ​ឃិនស្ត្រាក់​សិន ស្ថិតក្នុងបញ្ជីខ្មៅហើយ គម្រោងសាងសង់ផ្លូវជាង ១០ គីឡូម៉ែត្រនៅឃុំស្រែសំបូរស្រុកសៀមប៉ាង និងផ្លូវចាក់បេតុងនៅសង្កាត់ស្រះឫស្សី ក្រុងស្ទឹងត្រែងដែលជាកញ្ចប់ថវិការស្ថាបនាផ្លូវឆ្នាំ ២០២៤ អាចនឹងបន្តឲ្យអ្នកបន្ទាប់ដេញថ្លៃបាន ឬនឹងត្រូវរៀបចំគម្រោងដេញថ្លៃសារជាថ្មីទៀត៕

អត្ថបទ៖ ងិនលីម