ស្រុកគងពិសី ដង្ហែក្បួនផ្សព្វផ្សាយ​គោលនយោបាយភូមិឃុំសុវត្ថិភាព យកឃុំ​មហាឬស្សីមុនគេ ​

រដ្ឋបាលស្រុកគងពិសី ​នៅព្រឹកថ្ងៃទី ១៧ ខែមករា ឆ្នាំ២០២៤ បានរៀបចំពិធីដង្ហែក្បួនយុទ្ធនា​ការ​ដើម្បីផ្សព្វផ្សាយ​អំពីគោលនយោបាយ ភូមិ ឃុំ សង្កាត់មានសុវត្ថិភាព នៅឃុំមហាឬ្សី ស្រុកគងពិសី ខេត្តកំពង់ស្ពឺ។ ​

​លោកអភិបាលស្រុកគងពិសីបានលើកថា គោលបំណងដែលដង្ហែក្បួនផ្សព្វផ្សាយ​គោលនយោបាយ ភូមិ ឃុំ សង្កាត់មានសុវត្ថិភាពនេះគឺដើម្បីឱ្យប្រជាពលរដ្ឋយល់ដឹងកាន់តែច្បាស់ និងដើម្បីធានាសន្តិសុខជូនប្រជាពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ថែមពីនោះក៏បានចុះបិទលេខទំនាក់ទំនងនៅតាមខ្នងផ្ទះរបស់កងកម្លាំងរបស់ស្រុក ដើម្បីឱ្យពួកគាត់បានដឹង និងមានការអ្វីមួយដើម្បីទំនាក់ទំនងមកផ្ទាល់ ដែលមានហេតុការផ្សេងៗកើតឡើងនៅក្នុងមូលដ្ឋាន។

លោកបានបន្តថា នឹងបន្តបិទ​លេខទូរស័ព្ទប៉ុស្តិ៍រដ្ឋបាល អធិការស្រុក អាវុធហត្ថស្រុក មណ្ឌលសុខភាព និងរដ្ឋបាល​ឃុំឱ្យបានគ្រប់ខ្នងផ្ទះដើម្បីងាយស្រួលទំនាក់ទំនង ទាន់ពេលវរលា ពេលមានករណីផ្សេងៗ អំពើហិង្សា ល្បែងស៊ីសង ចោលួច។ នៅក្នុងការចូលរួមយុទ្ធនាការផ្សព្វផ្សាយនេះដែរក៏សិស្សានុសិស្ស និងកងកម្លាំងប្រមាណ ៥០០នាក់ជាង។

សូមជម្រាបផងដែរថា នេះជាលើកដំបូងដែលស្រុកគងពិសីបានអនុវត្តផ្សព្វផ្សាយគោលនយោបាយភូមិ ឃុំ សង្កាត់មានសុវត្ថិភាព ដែលចាប់ផ្តើមអនុវត្តថ្ងៃដំបូងនៅឃុំមហាឬស្សី ហើយរដ្ឋបាលស្រុកក៏នឹងត្រៀមរៀបយុទ្ធនាការនេះខាងមុខនេះឱ្យបានគ្រប់ទូទាំងស្រុកតែម្តង៕